Login

Fagogo: O le ‘Au Uso ma le Purinisese mai Initia

[Soso’o ane loa lau faitau i le toe soso’oina o la tatou tala fa’asolo, lea na gata mai i le vaiaso na te’a nei i le taimi lea na faliu ai Lorina o le a savali ‘ese mai le nofoaga lea o le a fa’ataunu’u ai le fa’asalaga o le oti i  si ona tuagane, ae ona fa’alogoina loa se tagata o vala’au atu i lona igoa, Lorina! Lorina ea!.]

E le ’i sese le fa’alogo a le tama’ita’i purinisese o lona tuagane lea o lo o vala’au atu ia te ia, o le mafua’aga lea na toe tu ai ma faliu atu i tua e toe fia va’ai tasi atu isi ona tuagane pele, ae paga lea, e fetaui lava le faliu atu o  le tama’ita’i i tua ae ona va’aia loa le pau ifo i lalo o si ona tuagane ina ua lavea i se fulu a u na fana mai e se fitafita, toe soso’o atu ai ma le isi fulu a u, e le ’i misi lava ma le fatafata.  Na fa’asolo le va’ai a le tama’ita’i purinisese i tagata o lo o laulaututu i luga o le stage lea o lo o fa’ao’o mai ai le fa’asalaga o si ona tuagane ma ia va’aia ai ta’ita’i fitafita uma o le malo o Asuria fa’atasi ai ma lo latou ta’ita’i ia Iasoni, o lo o i ai uma i latou i le taimi lea. “E!, matua faigata lenei va’aiga ua ou va’ai atu i ai, i le fasiotia lea o si o’u tuagane a ’o pupula i ai o’u mata, Kati lo’u tuagane pele, ia manuia lau malaga,” o ‘upu ia na tautalatala ai le loto mafatia  o le tama’ita’i purinisese, ona toe faliu atu loa lea i le ali’i fitafita lea sa la o atu ma toe fai atu i ai, “Se fa’amolemole lau susuga i le ali’i fitafita, pe mafai lava ona ta toe fo’i atu i le taavale se’i momoli a’u i lo’u fale.”

O se aso ‘ese lea i le tala fa’asolopito o le malo o Asuria, ona o se  taimi muamua lea ua mafai ai ona fa’ataunu’u se fa’asalaga  o le oti fa’apenei i luma o le malo, fa’asaga i sui o le aiga tupu o le malo o Initia, aua o le tele lava o tagata e maliliu ma feoti, e maliliu i taimi o osofa’iga ma taua, ae o le ali’i perenise mai Initia o Kati II, o ia le ulua’i tagata  o le aiga tupu o lona malo ua fasiotia fa’apea, ae maise ai fo’i sa molimauina e lona tuafafine ia Lorina, le purinisese o le malo o lo o aumau i totonu o Asuria.

O le fa’ai’uga o la tatou tala, na fa’aauau pea le nofoaiga a le tama o Iasoni ma e le ’i toe i ai se isi malo na fa’asaga tau atu i taimi o le ta’ita’iga a Iasoni, ona o ia o se tupu logologoa ona tala i le lelei o lana tau, toe malosi lana ‘au tau. O le 65 tausaga o le ali’i o Iasoni, tusa lea ua 33 ai tausaga o lana nofoaiga, na oti ai o ia i se gasegase umi lava sa  a’afia ai lona soifua, ma fa’au’uina ai lona atali’i matua o Laneselota III e fai ma tupu o le malo, i le taimi lea o lo o soifua pea le tama’ita’i o Lorina, ua tagata matua fo’i o ia ao fa’aaunu’ua ai pea i totonu o le malo o Asuria. O le fa’ai’uga lena o la tatou tala fa’asolo, ae toe tuli tatao mai le vaiaso fou lea fo’i o le a auina atu ai le isi a tatou tala fa’asolo fou. Soifua.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.