Login

TOLOFUAVALELEI: “E LE PALA'A'AI SAMOA”

ausage@samoanews.com

Na te'ena e le afioga i le ali'i faipule ia Tolofuavalelei Falemoe Leiataua manatu o ni isi mai le teritori e fa'apea, ua mafua ona le vala'aulina le Aeto mai Pago Pago e tausinio i le tu'uga fautasi o le fu’a a Samoa ia Iuni, ona e i ai le lagona pala'ai e ono sola le Aeto ma le siamupini o tu'uga fautasi.

“E leai se agaga fa'apena i le Palemia ma le Komiti o le Fu’a, e le pala'a'ai fo'i Samoa ma la latou fa'ai'uga ua faia, na pau le manatu o le komiti, ia toe fa'aolaola ituaiga tu'uga fautasi sa amata mai ai Samoa ina ua fa'atoa sisi lana ulua’i fu’a i le 50 tausaga talu ai,” o le fetalaiga lea a le tofa Tolofuavalelei, o ia fo'i lea o le isi Ta'ita'ifono o le Komiti o le Fu’a a Samoa, lea o lo o tapenaina sauniuniga o la latou Iupeli Auro lea o le a amata fa'amanatu i le fa'ai'uga o le masina nei mo le umi e tasi le vaiaso.

E felanulanua’i finagalo o le atunu'u na fa'ao'o mai i le Samoa News ina ua fa'alauiloa e le tofa Tolofuavalelei i le masina na te’a nei le fa'ai'uga a le komiti o le fu’a a Samoa, e le fa'atagaina ai ni fautasi e fausia i fausaga fa'aonapo nei, ma fa'aaoga foe sipuni e tausinio i le tu'uga o le fu’a.

Na ta'ua e ni isi o le atunu'u i le Samoa News e fa'apea, e tasi lava le mafua'aga ua ala ai ona le mana'o Samoa e vala'aulia ituaiga fautasi ia e i ai le Aeto mai Pago Pago, ona e mumusu i sola le Aeto ma le siamupini, e pei fo’i ona latou matauina i le tu'uga i le tausaga na te’a nei, lea na toeitiiti ai lava mua le Aeto i le va'a o le Segavao II i se tu'uga mataina ma le finau.

Na ta'ua e ni isi o tamali'i e fiafia i le ta'aloga o le tu'uga fautasi, sa tatau lava ia Samoa ona fai se tu'uga fa'apitoa mo fautasi ia o lo o alo i le foe sipuni ina ia fa'aaoga ai le tautiga o afio'aga ma latou fautasi.

O le vaiaso nei na fa'alauiloa aloa'ia ai e le Ofisa o Mata'upu Tau Samoa e fa'apea, ua leai se fautasi e malaga atu i le vala'aulia a Samoa, ona ua utiuti le taimi e toe fai ai ni tapenaga mo mea e pei ona mana'omia.

Saunoa Tolofuaivalelei ina ua fesiligia e le Samoa News, atonu o le a toe maua se isi avanoa i le sisigafu’a o le tausaga fou, ona maua lea o se isi avanoa e vala'aulia ai ituaiga fautasi ia e fausia i fausaga fa'aonapo nei.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.