Login

TALEPE FALE'OLOA E TOLU ONA O LE FIA ULA SIKALETI

ausage@samoanews.com

Na fa'ailoa e le ali'i o Siaosi Va'a Jr i luma o le fa'amasinoga, e tasi le mafua'aga na ala ai ona ia auai i le osofa'iga ma le talepeina o fale'oloa e tolu i le amataga o le tausaga nei, o le fia ula lea i se sikaleti.

E tolu fale'oloa na tu'uaia e le malo le ali'i o Va'a Jr, sa la osofa'ia ma le ali'i o Ryan Pite i le po o le aso 10 Ianuari 2012, ae ina ua fesiligia e le ali'i fa'amasino sili lagolago ia Lyle L.  Richmond le ali'i o Va'a Jr  pe aisea na la osofa'ia ai ma Pite faleoloa ia, na ata le alii ona faapea lea o lana tali, “Oi, na mafua ona ma osofa'ia fale'oloa na ona o le fia ula  lava i se tapa’a.”

E fa moliaga mamafa lea ua tali ioe Va'a Jr i luma o le fa'amasinoga sa ia fa'atinoina, ma o ia moliaga e aofia ai le talepe fale i le tulaga lua, lua moliaga o le taupulepule e fa'ataunu'u le moliaga o le talepe fale, atoa ai ma le moliaga o le gaoi.

Na fa'amatala e Va'a Jr i le fa'amasinoga e fa'apea, o le fale'oloa muamua lava na la  osofa'ia ma Pite, la te le i o ai i totonu, ae sa la taumafai e a'apa atu i fafo e aumai ni 'oloa mai totonu, peita'i sa  iloa mai i la'ua e se fafine Saina sa i totonu, ma vala'au mai ai loa ia te i la'ua e o 'ese.

“Na mafua  ona ma taumafai e osofa'i le  fale'oloa lea,  ona ua lagona lava le  fia ula i se tapa’a,” o le tala lea a Va'a Jr i le fa'amasinoga.

Ina ua le manuia le la taumafaiga ma Pite i le fale'oloa lea, na ta'ua ai loa e Va'a Jr lo la aga'i atu i le fale'oloa lona lua, le Super Star, lea na taumafai ai loa lana uo o Pite e talepe u’amea o lo o poloka ai fa'amalama o le fale'oloa, ae iloa mai ai loai la'ua e le pule, ma la va'aia ai le tamaloa Saina ua savali atu ia te i la'ua ma se samala.

“Na ma toe solomuli i fafo ma taufa'alelei i le ali'i Saina lea, ae ou iloa atu loa le mea pu’eata o lo o tu mai i le isi itu o le fale'oloa, ma ou fai ai loa ia Pite e tago e talepe le mea pu’eata, ma sa usita’i ai fo'i Pite i la’u fa'atonuga,” o le molimau lea a Va'a Jr.

O le fale'oloa lona tolu na talepe e Va'a Jr ma lana uo, o le Leone Store, lea na tu’i e Pite le tioata tele o lo o pito i luma i se ma’a, ma la a'apa atu ai loa i totonu ma si'i mai pusa pulu kamu ma pepa  siakelati ma la o loa ma 'ave.

Ina ua fesiligia e le ali'i fa'amasino ia Va'a Jr  pe aisea na la talepeina ai le fale'oloa lea, na tali le ua molia, “o le fia ula lava i se tapa’a.”

O lo o taofia pea i le to'ese le ali'i o Va'a Jr e fa'atali ai le aso 31 Me lea ua fa'amoemoe e lau ai lona fa'asalaga i luma o le fa'amasinoga maualuga. O isi moliaga na totoe ai fa'asaga ia te ia ua solofua e le malo.

Na ta'ua e le loia a le malo o Cabel Poag, o le solitulafono o le talepe fale ma le gaoi, o se tasi lea o solitulafono ua matauina le fa'atupulaia i le atunu'u i le taimi nei, ae maise ai lava tupulaga talavou.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.