Login

9 MA & 31 BA Faau’uga o le Co Hort 24

frostlehualani@yahoo.com
O se va’aiga lea i nisi o le au faia’oga fa’au’u ma le susuga Mene Taua’a lea sa avea ma latou fofoga taumomoli o le polokalama fa’asolo o le latou aso fa’apitoa. [ata: Leua Aiono Frost]

Mai le vasega fa’au’u o lenei tausaga i le vasega o Faia’oga na a’otauina e le Polokalama so’ofa’atasi a le ASCC ma le Iunivesite o Hawaii, CoHort 24, ua fa’au’uina ai le to’aiva o Faia’oga ua latou umia fa’ailoga o le Masters of Education.

I lea lava vasega e tasi, ua fa’au’uina ai ma le to’a 31 o i latou ua umia fa’ailoga Bachelors of Education i Elementary Education ma i si e to’atolu ma fa’ailoga Bachelors of Arts in Interdisciplinary Studies, ma o ni ulua’i fa’ailoga ia ua umia e ni faia’oga i “Interdisplinary Studies” talu mai ona fa’atautaia le polokalama o le CoHort i le tatou Kolisi Tu’ufa’atasi.

O le manulauti o le fa’au’uga na fa’atulaga e le vasega lona 24 o le CoHort ua fa’ailo mai, “A’oa’oga e Tupu ai Tanu’uga Lelei!” ma na faia fo’i lea ‘au’au ma mea e fa’auia i ai manatu o failauga sa tutula’i mo latou sao i le aso fa’apitoa o le CoHort 24.

Ina ua tula’i le ali’i Sui Fa’atonu Sili o le Matagaluega o A’oga a le Malo, Fatuletoga Philo Jennings, na ia saunoa ai e fa’apea, “O tutupu mai ni taunu’uga lelei i a’oa’oga o lo’o e fa’atautaia i le potu a’oga? O lau fesili le na e te faia, aua o lea ua outou fa’ailoa manino mai i la outou manulauti, o a’oa’oga e tutupu mai ai taunu’uga lelei!”

Peita’i, ona o ia fo’i o se faia’oga, sa ia manatua uma lava faia’oga sa fa’asoa ia te ia lo latou atamai, ma ua moni ai le auau o le aso lenei, o i latoi na e matua tu o ia ma toe tepa i ai, e ave ma fa’ao’o i ai lana fa’afetai, i galuega lelei sa latou faia, ua mafua ai ona ia maua nei manuia o lo’o ola ai.

“Pe afai ua e maua a’oa’oga lelei nei, ua e o’o la e toe fai sau fa’afetai ia i latou na faia nei galuega lelei mo oe, ua e fa’afetai i ou faia’oga, ua e fa’afetai i lou aiga ma matua? ua e fa’afetai i lou faife’au mo talosaga si’itia i po uma, pe ua e fa’afetai i le Atua mo mea uma? Afai e te le’i faia lena tiute, talofa ia te oe, e le o oe se faia’oga lelei!”

O sana fautuaga i le vasega o faia’oga fa’au’u, pe afai e faia a latou a’oa’oga i aso ta’itasi i potu a’oga, “Ia a’oa’o atu i le fanau e pei ona a’oa’oina ai i tatou a’o tatou laiti fo’i e pei o i latou, ma fa’aleleia atili lea o au a’oa’oga e tusa ai o le a’oa’oga ua fa’aau’upegaina ai oe i le taimi nei.”

Ina ua tutula’i fo’i le afioga le Kovana Sili mo lona sao e tima’i ai le vasega o faia’oga fa’au’uina,  sa ia fa’apea ane ia i latou, “O le aso lenei o lo outou fa’aeaga sili, aua sa e galue, aoga ma toe taumafai e faia le lotoifale o le tausiga o le aiga i aso ta’itasi. Lea ua e inu i lou gapatia, ua fa’aeaina oe i lau taumafaiga ua au ma tini taunu’u i le sini na e tauva ai.”

Peita’i i le fa’ai’uga o lana saunoaga, sa ia fa’apea ai, “Ae i ai le mea e tasi ou te augani atu ai ia te outou, ‘aua e te naunau e vave ona pu’e lau va’alele e te alu ese atu ai i Hawaii ma isi setete o Amerika, ae nofo mai mo ni tausaga se lua pe tolu, se’i e toe fa’afo’i i lou malo sou sao e fa’ailoa ai lau fa’afetai i lenei avanoa ma le polokalama matagofie ua aoga ia te oe i lou olaga tausaili le atamai e fa’aleleia atili ai oe ma lau ‘au’aunaga, i lou malo ma ou tagata.”

O le tama’ita’i na avea ma sui o le vasega fa’au’u, Eleanor Malaga Tagaloa sa avea ma sui o le vasega fa’au’u e na te saunia se latou upu e tali ai le pa’au mai o le mamalu o e na vala’aulia fa’apitoa, o Aiga i matua, ta’ito’alua ma fanau, ae maise o uo mamae ma e masani ua auva’a potopoto i le Lee Auditorium lea na faia ai lea sauniga mamalu.

Na ia fa’afetaia i latou uma ua o mai e fa’amamaluina le latou aso iloga i lo latou ola tausaili le atamai i taleni ua foa’i mai e le Atua e galulue i ai. Ua ia fa’afetaia faia’oga sa fa’asoa ma a’oa’o ia i latou i nei tausaga e tele o le soifuaga, ae silisili lava, sa ia fa’afetaia le Atua e ona mea uma lava, ua mafua ai ona agatonu lea aso fa’apitoa mo i latou uma e to’a 40.

Ina ua mae’a sa tufatufaina loa latou tusi pasi ma i le fa’ai’uga lava, sa vala’auina ai le fa’ailoga fa’apitoa  mo le sui sa ia faia le galuega fa’atino numera muamua i lenei tausaga, ma ua mauaina lea e le tama’ita’i o Si’iva Alama Cornejo Nanai Johnny Roe.

O ia lenei, sa fa’au’u fa’atasi ma si ona tina i lenei vasega o le fa’au’uga 24 CoHort, le tina o Penelope Taotua Ifo Johnny Roe mai Malaeloa.

O pesega ma vi’iga o le fa’au’uga mamalu sa saunia lea e vasega o le Cohort 25, 26 ma le 27. fa’atasi ai ma le pese mulimuli lava sa fofogaina e le vasega fa’ai’uaso ina ua mae’a ona taua’aoina latou tusi pasi, fa’atalofa ma le Kovana, sui o le DOE, ta’ita’ifono o le Komiti Fa’afoe mo A’oa’oga Maualuluga i Amerika Samoa ae maise le vasega o fa’auluuluga o A’oa’oga Tau Faia’oga i le Iuniveste o Hawaii ma le polokalama CoHort.

O le susuga Mene Taua’a sa avea ma fofoga o le latou polokalama fa’asolo o le latou sauniga mamalu o le fa’au’uga, ma sa i ai fo’i ma sui fa’aliliu upu i le gagana faitaga ina ia malamalama fo’i lea ituaiga o a’oa’oga o lo’o fa’atautaia e le vaega o A’oa’oga Fa’apitoa mo le fanau fa’apitoa i le Matagaluega o A’oga.

O le susuga le Faifeau Ekalesia Fa’apotopotoga Kerisiano i Alofau, Rev.Sanerivi Mulitalo, sa avea ma ta’ita’i o le sauniga i le tatalo ma ia toe fa’ai’uina fo’i lea sauniga ile tatalo si’itia i le Atua ona o le fa’amoemoe ua fa’ataunu’uina ma le manuia.

O le lisi o suafa o i latou ua maua fa’ailoga Masters of Education:

Suluia Afuola, Sarah Fegutua’i Chan Kau-Tuiolemotu, Pogaifilemu Coffin, Mary Pauline Lydwina Tavale Iosefo, Rosanna Malae, Leleaga Mata’afa, Tauilo Tonise Matatia, Aitulagi Vainu’upo Fanuaea Tuiasosopo ma Fenui Veve Aifai Tupua.

O i latou na maua fa’ailoga o le Bachelors of Education:

Fauao Aokuso, Edcear Solaita Apulu, Matava’a Faleali’i Atisano’e, Elaine Pualau Avia, Irene Lisa Su’a Fa’atupuinati, Afatia Frost, Fa’au’uga Letoa, Eleanor Malaga, Pisa Maugaotega, Desmond O’Brien, Mary Jane Paulo, Keresesia Puailoa, Alma Si’iva Cornejo Nanai J. Roe, Penelope Taotua Ifo Roe, Stephanie Samia, Malu Tauanu’u Milo, Pa’usetoa Tuiasosopo, Pelema Uta, Cora Taliau So’osemea Afalava, Sene Emere Samau Fa’atoafe, Senerita Kaleopa, Laoletoa Lesi’i, LandylelaleleioFaleniumaFagamalo Kenesareta Kerupi Moi, Meatuai Si’itiaimoega Atualevao Peni, Anntonelli Vaonu’u Failautusi Pola, Marie Lisha Timoteo, Leinati Mua’ava.

I latou ua maua Bachelors of Art in Interdisplinary Studies:

Honey Aigafealofani Peniata Alaelua, Susie Salevasa Lise Levi, Lemasani Tagaloa Tofili.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.