Login

Ta’utino se alii e fa faleoloa sa ia osofaia ma ave faagaoi ni oloa

ausage@samoanews.com

Ua talia nei e le Faamasinoga Maualuga maliliega na sainia e Ryan Pite ma le malo, lea e pei ona tautino ai lenei alii i luma o alii faamasino, e fa faleoloa eseese sa ia osofaia, talepe ma gaoi oloa mai totonu.

I le taliaina ai e le faamasinoga o le maliliega na sainia e Pite ma le malo, ua faatulaga ai loa le lauina o lona faasalaga i le aso 31 Me i le itula e 9:00 i le taeao.

E lua mataupu eseese na faila e le malo faasaga i le alii o Pite, ma o ia mataupu e aofia ai osofaiga sa ia faia i ni faleoloa se lua i le aso 7 ma le 8 o Ianuari 2011, ae o le isi mataupu o loo aofia ai osofaiaga sa ia faia i le po o le aso 10 Ianuari, lea e tolu faleoloa na aafia ai e aofia ma se tasi o faleoloa sa ia osofaia i le aso 7 o Ianuari.

O moliaga na tuuaia ai  e le malo lenei alii talavou mai mataupu uma nei e aofia ai le talepe fale i le tulaga muamua, gaoi, taupulepule e faatino le solitulafono o le talepe fale, faomea atoa ai ma le faaleaga meatotino i le tulaga tolu.

Ae i maliliega e lua sa ia sainia ma le malo ma talia e le faamasinoga, ua ta’usala ai Pite i moliaga mamafa e fitu, e aofia ai le moliaga o le faomea i le tulaga lua, lua moliaga o le talepe fale i le tulaga lua, lua moliaga o le gaoi, lua foi  moliaga o le taupulepule e talepe se fale o se isi tagata.

Na taua e Pite e faapea, i le aso 7 Ianuari, na alu ai e faatau mai sana  pusa pia mai le faleoloa o le Super Star. Sa ia alu ma aumai le pusa pia, ona tuu lea i luga o le counter ma sauni o le a totogi,  peitai sa fesili atu  le faatauoloa ia te ia e faaali muamua atu lona ID, peitai sa fai i ai o loo i totonu o lana taga le ID.

Fai mai Pite, na avea le faalavelave soo atu o le fafine Saina lea ia te ia ma fesili atu i lona ID ma itu na ita ai ma tago loa ua una’i, ma sulu ai i le isi pito o le faleoloa ma leaga ai le vae, o le taimi lava foi lea na ia tago atu ai i le pusa  pia ua sii ma tamo’e loa ma  ia i fafo e le’i totogiina.

I le po o le aso 8 o Ianuari na sosoo ai, sa faia ai le la inugapia ma Chris Aumua, ma la agai atu ai loa e piki mai ni tamaitai mai Leone, peitai na la afe i le faleoloa o le Captain Mart ina ua ia lagona le fia inu i nisi pia, ma ia alu ai i totonu ma gaoi mai le pusa pia, pepa sikaleti ma pepa chips, ae faatali atu Aumua i fafo e vaai se isi i alu atu.

I le po o le aso 10 Ianuari, na taua ai e Pite le faia o se la inugapia ma le alii o Siaosi Vaa Jr ma la osofaia ai ni faleoloa se tolu e aofia ai ma le faleoloa o le Super Star lea na ia gaoia  mai ai le pusa pia i ni nai aso e le’i umi atu.

O le faleoloa muamua na taumafai Pite ma Vaa Jr e osofai e le’i mafai ona la ulufale i totonu, ina ua vave ona iloa mai e se tagata sa i totonu taumafaiga e Pite e gagau u’amea o le pa ma la toe foi ese ai loa.

Na la agai atu i le faleoloa lona lua mo  le faamoemoe e talepe ma osofai, peitai na faateia i laua ina ua la vaai se alii Kolea o loo tu mai ma se samala e faafefe ai laua, o lea na la tutu ai loa i fafo ma tau faalili i le alii Kolea lea, mulimuli ane talepe e Pite le mea pu’eata sa i fafo o le faleoloa, ma la toe agai atu loa ma Vaa Jr i le faleoloa mulimuli, lea na tu’i ai loa e Pite le faamalama i se maa, ma la gaoia mai ai pusa lolo ma pusa pulukamu.

Ua malamalama le ua molia, tusa lava pe finau loia mo se faasalaga mama mo ia, e pule le faamasinoga  pe talia pe teena ia fautuaga, ua ia malamalama foi, afia e tuuina mai se faasalaga a le faamasinoga ae le tusa ai lona loto, e le mafai ona toe suia lana tali ioe ua tuuina atu i luma o le faamasinoga.

O lo o taofia pea Pite i le toese i Tafuna e faatali ai le aso lea ua faatulaga e lau ai lona faasalaga.

(The English version of this story, “Men involved in Leone burglary spree enter plea agreements”, is running in today’s Samoa News and can be found on samoanews.com)



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.