Login

Leai ni sa o AS e tausinio i le tu’uga fautasi a Samoa

ausage@samoanews.com

Ua faamaonia mai e le Ofisa o Mataupu Tau Samoa i se feiloaiga ma Tusitala i le taeao ananafi, le leai o se fautasi mai Amerika Samoa nei e malaga i le valaaulia a Samoa, mo le tuuga fautasi e faamanatu ai lana Iupeli Auro i le masina fou.

Na faalauiloa e le tofa Nanai Afuola e faapea, ua tasi nei le filiga o aleaga i le afioga i le  Kovana Sili, le matua ia Togiola Tulafono, faapea ai ma le afioga i le Faatui ia Lefiti Atiulagi le Failautusi Ofisa o Mataupu Tau Samoa, o le a tapua’i Amerika Samoa ma ana Sa na valaaulia mai e Samoa, o le a le tausinio i le tuuga o le fu’a o lenei tausaga.

Saunoa Nanai, o le faaiuga sa faalagolago lea i se tofa saili mai afioaga o Fautasi na valaaulia mai e Samoa, ina ua tasi le faaiuga a nei afioaga, o le a le malaga  a latou fautasi e tali i le valaaulia.

O fautasi e fa na aofia i le valaaulia a Samoa e aofia ai le Aeto mai Pago Pago, Satani mai Nuuuli, Fuao mai Vatia ma le Sharks mai le Aoga Maualuga a Samoana.

“O le faaiuga ua faia e afioaga nei, o le a leai se vaa e malaga i le valaaulia a Samoa, ona ua utiuti le taimi e toe faatinoina ai tapenaga e pei ona manaomia mai e Samoa, e aofia ai le suiina o pine atoa ai ma le sailiina lea o ni foe Samoa,” o le saunoaga lea a Nanai.

Na taua e Nanai i se faatalatalanoaga ma le Samoa News i le vaiaso na te’a nei, e tusa ma le $6,000 e saili e le afioga mo le fausiaina o foe Samoa, ae ese ai le tau mo le toe suiina o pine ma isi lava tapenaga mo le fautasi, ina ia talafeagai ma le manaoga mai Samoa, ma o ia suiga tetele ua mamafa mo afioaga i le taimi nei.

Ae ui i le faaiuga e leai se fautasi e malaga i le valaaulia a Samoa, o le agaga o Amerika Samoa e pei ona fetalai Nanai, o le a mafai lava ona toe sosoo lenei sootaga ma toe tali atu Amerika Samoa i nisi valaaulia i le lumana’i mai Samoa, e pei ona sau ai i tausaga ua mavae.

Na gugulu le toatele o le atunuu ina ua salalau i ni ripoti i Amerika Samoa nei le faaiuga a le komiti o le fu’a a Samoa, e taofia ai le auai atu o fausaga fou o fautasi ua i ai i Amerika Samoa nei, mo le tuuga o le latou sisigafu’a i le masina fou, ma latou taua ai le le mananao o Samoa e malaga atu ituaiga fautasi nei e aofia ai ma le Aeto, ina nei sola ma le siamupini o faigamea i le tai i lenei tausaga.

Ae ui i ia manatu faatasi ai ma le faaiuga ua faia e le malo o Amerika Samoa, na taua e le afioga i le alii Faipule, o ia foi lea o le isi Taitaifono o le Komiti o le Fu’a a Samoa ia Tolofuavalelei Falemoe Leiataua e faapea, e tumau pea le faaiuga ua tasi i ai le Komiti, i le le taliaina lea o ni fautasi o  loo fausia i fausaga faaonaponei, ona o le manatu ia toe faafoi le tulaga sa i ai ulua’i tuuga fautasi a Samoa i le 50 tausaga talu ai.

Na teena foi e le tofa Tolofuavalelei nisi o finagalo e faapea, ua mafua ona faia e le komiti lenei faaiuga, ina ia taofia ai le malaga atu o fautasi o loo fausia i fausaga faaonaponei e aofia ai le Sa o le Aeto mai Pago Pago, lea ua avea ma siamupini o tuuga fautasi o le fu’a a le atunuu i lenei tausaga.

“E leai se agaga faapena i le komiti faapea ai ma le malo o Samoa, na pau le manatu, ia toe faafoi gaioiga sa faatino e Samoa ina ua faatoa sisi lana fu’a i le ulua’i taimi i le 1962, ina ia lagona ai e tagata le taua o le lagona saili malo,” o le saunoaga lea a Tolofuavalelei.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.