Login

Saili Togiola nisi avanoa mo lumana’i o fanau aoga atunuu

ausage@samoanews.com

O le tau sailiga o nisi avanoa e mafai ai ona agava’a nisi o fanau mo sikolasipi, o se tasi lea o mataupu na laualuga i se talanoaga sa faia e le alii kovana ma kovana o nisi o Setete a le malo tele,  i le vaiaso na te’a nei.

Na taua e le matua ia Togiola Tulafono e faapea, o se tasi o faafitauli o lo o feagai ma le malo, o le taugata o le totogi o aoga, ma ua avea lea ma itu ua vaapiapi ai avanoa sikolasipi e mafai ona maua e tama ma teine aoga.

“Sa ou talanoa i kovana o nisi o setete o le malo tele ina ia faailoa mai ia te a’u, pe i ai nisi auala e mafai ona latou fesoasoani mai i fanau aoga a Amerika Samoa, e  faataugofie ai le totogi o a latou aoaoga pe afai latou te mananao e o atu e aooga i a latou aoga,” o le saunoaga lea a  Togiola.

O le fesoasoani la lea ua tuuina, ua mafai ai ona tutusa le pili aoga e totogi e tamaiti aoga o lo o aumau i setete nei, ma  fanau aoga a Amerika Samoa e agai atu ma aooga i a latou aoga nei.

Na taua e le alii kovana i luga o lana polokalama i le vaiaso na tea nei e faapea, o lea fesoasoani o le a mafai ai ona faaopoopo isi tamaiti aoga  i le lisi o tamaiti e agavaa i sikolasipi, aua o lea o le a faaitiitia tupe e totogi mo le tama ma le teine aoga e toatasi e pei ona masani ai.

Saunoa Togiola, o le faafitauli o lo o tulai mai i soo se aoga i setete o le malo tele, e toeititi lava a faalima le maualuga o le pili e totogi e fanau mai fafo pe a fa’atusatusa i pili a tamaiti aoga lava ia o le setete.

Mai le faitau selau  ma selau o tama ma teine e faauu mai i Vasega 12 i totonu o aoga maualuluga a le atunuu i tausaga taitasi, pe a na o le 20 i le toa 30 tamaiti aoga e agavaa i sikolasipi, o le isi vaega atoa, a le maua loa se avanoa e aoga ai i le kolisi po o avanoa sikolasipi  ia, o lona uiga ua muta le olaga aoaoina, ma o se tasi lena o auala o lo o taumafai pea le alii kovana e saili ai ni fesoasoani ina ia mafai ona fesoasoani mo fanau aoga a le atunuu.

O le tausaga foi na tea nei na faalauiloa ai e le alii kovana se tasi o ana taumafaiga ina ia faaulufale polokalame ma mataupu e mafai ona ave mo le ta’i 4 tausaga i totonu o le kolisi tuufaatasi, ina ia taofia ai le toe soona malaga o fanau aoga i fafo e aooga ai, ae o le a mafai lava ona saili a latou faailoga i totonu o le atunuu.

“Ua i ai le faamoemoe afai loa ae mautu mai talanoaga  ma fuafuaga e pei ona matou faia ma alii kovana ia, ona i ai lea o le fuafuaga o le a amataina lenei fuafuaga fou i le tausaga aoga fou o loo lumana’i nei, ina ia televave ma lelei fuafuaga mo  le manuia o aoga a fanau mo le  latou lumanai manuia,” o le saunoaga lea a le alii kovana.

E ese mai i taumafai mo le tau sailiina lea o se tulaga manuia mo fanau i le lumanai, o le isi auala lea ua taumafai i ai kovana uma  o le Iunaite Setete e pei ona talanoaina i le latou fonotaga faaletausaga  sa faia i le vaiaso na tea neii North Carolina, o le toe  unaia lea o fanau i le faia o mataupu ma aoaoga Faa Saienitisi, ona ua  maitauina le pau maualalo o togi e maua e tamaiti aoga a Amerika mai isi atunuu o le lalolagi i mataupu tau Saienitisi.

Saunoa Togiola, o lo o tulaga 17 Amerika i atunuu ole lalolagi pe a  faatulaga tamaiti aoga i le mataupu o le Faa Saienisi ma o se tulaga ua maitauina ai le pau maualalo o aoaoga i totonu o le malo tele i le mataupu Saienisi.

O le faanaunauga o alii kovana e pei ona talanoaina i le latou fonotaga, ia toe faamalosia polokalame sa faia i tausaga ua mavae e unaia ai fanau aoga latou te faia gaioiga i mea fou o loo gaosia e pei o TV, telefoni, computer, IPod ma isi lava ituaiga oloa fou ua vaaia le televave o lona agai mai i lenei vaitaimi o le olaga.

Fai mai Togiola, afai e manuia fanau aoga, o le a manuia foi atunuu ma avea ai i latou nei ma taitai mo le lumanai o le malo.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.