Login

Tala o Faamasinoga

ausage@samoanews.com

LOMITUSI UIAGALELEI

O le alii lea o lo o tuuaia i lona sasaina o le ulu o le isi alii i se suo i le vaiaso na te’a nei, ua molia nei e le malo i le moliaga mamafa o le faaoolima i le tulaga lua, ma ua faamoemoe e toe tulai i le taeao nei i luma o le Faamasinoga Maualuga, e iloilo ai pe tuu sa’o atu loa lana mataupu i luma o le Faamasinoga Maualuga e faaauau ai.

O le alii o Lomitusi Uiagalelei na taofia e leoleo ia Me 1, 2012  mai Auasi, ona o se faalavelave lea na manu’a ai se alii ma auina atu i le falema’i mo togafitiga, ina ua faaoolima i ai le ua molia e pei ona tuuaia e le malo.

Ina ua tulai Uiagalelei i le Aso Lulu o le vaiaso na te’a nei i luma o le Faamasinoga Faaitumalo, sa ia teena ai le moliaga o le faatupu vevesi i nofoaga faitele ma le tuutuuga a le malo, o le a latou faila moliaga faaopoopo faasaga ia te ia, lea e pei ona i ai le taeao ananafi.

O le alii loia ia Tala Uiagalelei lea ua avea nei ma loia fautua a le alii o Lomitusi,  o ia foi lea sa ia finauina le talosaga a le ua molia i le taeao ananafi, mo se avanoa e faaitiitia ai le tupe e $10,000 sa faatulaga e le faamasinoga e tatala ai o ia i tua, lea foi na talia e le faamasinoga.

Na taua e le alii loia ia Uiagalelei e faapea, o le ua molia o se tama talavou e fai lona toalua ma lana fanau, ae o loo mamafa fo’i si ona to’alua i le taimi lenei, na o ia sa faigaluega e tausi ai lona aiga.

Fai mai le alii loia, e tusa ai ma faamatalaga o loo taua i le ripoti a leoleo, o loo atagia mai ai i gaioiga sa faia e le ua molia lona taumafai e puipui o ia ma se faalavelave e ono tula’i mai. Fai mai le alii loia, o Lomitusi e le o se tagata e ono sola ese ma le atunuu pe afai ae tatala o ia i tua, ona o loo i ai lona aiga e tausi.

E lei tete’e le malo i le faafinauga a le itu tete’e, ae na pau le faamatalaga a le alii loia ia Blake Hanley, o le  a taoto atu i se faaiuga a le faamasinoga.

Saunoa le alii faamasino ia John Ward, na mafua ona faatulaga e le faamasinoga le $10,000 e tatala ai Lomitusi i tua i le uluai taimi na tulai ai, ona e le’i manino lelei mai tulaga o manu’a na aafia ai le alii sa lavea, peitai o lea ua faailoa atu e le malo, ua toe te’a lea alii i tua mai le falema’i, ma ua sologa manuia foi manu’a na aafia ai lona tino.

I le talia ai e le faamasinoga o le talosaga  a le itu tetee, ua toe faatulaga ai loa le $5,000 e tatala ai Lomitusi i tua e faatali ai taualumaga o lana faamasinoga i lalo o poloaiga e ao ona ia usitai i ai.

O nisi o ia poloaiga e aofia ai le faasa lea ona ia taumafai e faafesootai le alii na aafia i lenei mataupu poo nisi o lona aiga, ua faasa ona ia toe nofo i Auasi ae sui se nofoaga e faamautu ai i lenei taimi, ma aua nei taumafai e sola ese ma le atunuu, ae ia fesootai vavalalata ma lana loia, ma aua nei ona toe soliina se tulafono a le malo.

(English version of this story appears in today’s Court Briefs)

PENE WELLS

O le aso Faraile lea ua faamoemoe le itu a le alii o Pene Wells e tatau ona oo atu i ai ua maea ona sainia sa latou maliliega ma le malo, ma faai’u ai loa le  mataupu e pei ona tuuaia ai o ia e le malo.

O Pene Wells, o se tasi lea e toalima i ai alii mai le kalapu lakapi a Nuuuli o loo tuuaia i le fasiga o se alii laufali mai Samoa, ma o ananafi sa  faamoemoe e tatau ona fofogaina ai la latou maliliega ma le malo, peitai ona o nisi o vaega e le’i maea lelei o ia feutanaiga, na talosaga ai loa lana loia o Ruth Risch-Fuatagavi i le faamasinoga e toe tolopo le iloiloga i le aso Faraile, lea foi na talia e le faamasinoga.

Toe lava o Wells e lei faia i ai se faaiuga a le faamasinoga i lana mataupu, ae o le isi to’afa na muamua atu ia te ia, ua maea ona faia i ai faaiuga a le faamasinoga, lea e aofia ai Selefuti Tago ua tatala i tua ina ua maea ona lau lana faasalaga, o lona uso o Fuata’i Tago lea na tatala i tua i le vaiaso na te’a nei e faatali ai le isi laasaga o lana mataupu, ma isi alii e to’alua ua maea ona la tali ioe i le moliaga o le faaoolima i le tulaga lua, e aofia ai Pelenato Puautolu ma Iopu Siolo o loo taofia pea i le toese i le taimi nei.

O loo tumau pea moliaga faasaga ia Wells e pei ona tuuaia ai o ia e le malo, i le faaoolima i le tulaga muamua ma le  faatupu vevesi i nofoaga faitele.

O loo taofia pea o ia i le toese i le taimi nei e faatali ai le aso Faraile lea o le a toe fofogaina ai lana mataupu.

THOMAS McGOVERN

O le taeao ananafi na toe tatala ai i tua mai le toese i Tafuna le alii o Thomas McGovern i le maea ai lea ona ia tali ioe i le moliaga o le faatupu vevesi i nofoaga faitele, ma ua faanofovaavaaia nei o ia mo le 2 tausaga i lalo o poloaiga a le faamasinoga.

O nisi o ia poloaiga e aofia ai le aua lea nei ona toe soliina se isi tulafono a le malo, a ia auai i ni aoaoga  faafaufautua e fesoasoani ai i le faafitauli o le ava malosi o loo aafia ai lona olaga, ma ia taumafai e auai i ni aoaoga o le a faatulaga e se tasi o Ofisa o le malo e saili ai nisi agavaa ma atamai faaopoopo mo ia ina ia mafai ai ona saili sana galuega e fesoasoani ai i lona aiga faapea ai lona olaga.

O le masina na te’a nei na toe taofia ai foi e leoleo le ua molia i le toese, ina ua tuuaia o ia i lona faia o ni gaioiga e save’u ai le nonofo filemu o tagata, e ala i le ‘ona ma pisapisao, ae o loo faanofovaavaaia o ia.

Saunoa le alii faamasino ia John Ward II, ua tele avanoa ua tuu atu e le faamasinoga i lenei alii, peitai e atagia mai e le o i ai se lesona aoga o ia aoaoina.

E 24 aso na taofia ai McGovern i le toese ma ua manatu le faamasinoga, ua lava lea umi e fai ma ona faasalaga i leneimataupu.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.