(w/ banner) Tala o Faamasinoga

KEIANA TALAESE

O le Aso Faraile o le vaiaso nei lea ua toe tolopo i ai e le Faamasinoga Maualuga le mataupu a le tamaitai o Keiana Talaese ma le tuutuuga, afai e o’o atu i le aso lea ae le’i mautu lava se maliliega e faaiu ai lenei mataupu, o le a faatulaga loa e le faamasinoga le aso e faataunuu ai le faamasinoga autu.

E lua mataupu eseese o lo o tuuaia ai e le malo le tamaitai talavou o Talaese, ona o se faalavelave na tulai mai i le faaiuga o le masina o Fepuari na te’a nei, ina ua taofia o ia ona o tuuaiga i lona umia lea o ni vaega o le laau faasaina o le mariuana, peitai ina ua taofia o ia i lalo o le vaaiga a leoleo, sa sola ese mai i leoleo peitai na mafai ona toe maua o ia e leoleo.

O lo o tuuaia e le malo Talaese i le moliaga o lona umia faasolitulafono o vaega o mariuana, atoa ai ma le sola ese mai lea ao i lalo o le vaavaaiga a leoleo, ae o le taeao ananafi na toe valaauina ai lenei mataupu i luma o le faamasinoga maualuga, ona o se talosaga a le malo i le faamasinoga, i se avanoa e mafai ai ona tuu faatasi mataupu e lua ina ia avea ma mataupu e tasi, ma faigofie ai loa ona tau tuu faatasi se maliliega e faai’u ai lenei mataupu.

Na talia e le faamasinoga le talosaga ina ia toe tolopo le mataupu a Talaese ma le tuutuuga, afai e oo atu i le aso Faraile e le’i taunuu lava i se faaiuga lenei mataupu, o le a faatulaga loa le aso e faia ai le faamasinoga autu.

O Talaese o lo o tuuaia faatasi ma ni alii se toalua, o i laua ia e aofia ai Vaoeli Lafoia ma Hefa Vahe, ina ua agai atu leoleo e faato’a filemu se vevesi na tulai mai i le uafu o Vaa Faila i le masina o Fepuari, ae maua ai ma fualaau faasaina ia te i latou.

O lo o taofia pea i le toese i Tafuna Talaese ina ua le mafai ona totogi le tupe na faatulaga e tatala ai o ia, e faatali ai lana iloiloga i le aso Faraile nei.

O le alii loia ia Cabel Poag o loo tulai mo le malo, ae o le alii loia ia Mike White o loo tulai mo Talaese.

AARON WISDOM

Ua talia e le faamasinoga maualuga le talosaga na faaulu e le malo, ina ia toe tolopo mo le 30 aso le iloiloga na faatulaga i le taeao ananafi a le alii o Aaron Wisdom, e faatali ai le taunuu mai o le faaiuga o suega ua maea ona auina atu i fafo, e suesueina ai vaega o fualaau  faasaina ia o loo tuuaia sa maua i lenei alii, pe o ni fualaau faasaina moni ia mea pe leai foi.

O Wisdom o loo tuuaia i lona umia faasolitulafono o ni vaega o mariuana, umia o se fana e le’i lesitalaina, atoa ai ma lona umia faasolitulafono o ni pulufana.

O ia tu’uaiga na afua mai ina ua maua e alii o le Ofisa o Tiute vaega e pei ona taua i totonu o se container sa siaki i luga o le uafu, lea na aumai i lalo o le igoa o le ua molia.

O loo tumau pea poloaiga o loo tatala ai le ua molia i tua e faatali ai le isi ana iloiloga, lea ua faatulaga e faia leai le aso 30 Me.