Mautu fa’aiuga Pago Pago e le alu Aeto i le fu’a a Samoa

Ua tasi nei le fa’afitiga o aleaga i le afioga i le Maoputasi ma le afioaga o Pago Pago, o le a le masi’i atu le siamupini o tuuga fautasi a Amerika Samoa mo lenei tausaga i le valaaulia a Samoa mo le fa’amanatuga o le 50 tausaga o lana fu’a, ae o le a malolo ona o nisi o mafua’aga.

“O lea ua tasi le tofa i le afioga i le Maoputasi ma le afioaga, o le a le malaga le Aeto i le valaaulia mai Samoa, ona o lea ua fa’alauiloa mai e Samoa, e le taliaina ni fausaga fautasi fa’aona po nei (hi-tech), e le gata fo’i i lea, o lea ua fa’ailoa mai e le faaaogaina foe sipuni sei vagana ai foe e ta mai i laau Samoa, ma ua manatu le afioaga, e leai se taimi e toe tapena ai le nuu mo ni foe Samoa,” o le saunoaga lea a le afioga i le matua ia Pulu Ae Ae Jr, lea sa fai ma fofoga o le afioaga mo le faalauiloaina mai o lenei mataupu.

O le faaiuga e le masii atu le fautasi a le Aeto i le valaaulia a Samoa, na saunoa i ai le afioga i le Maoputasi, le Senatoa ia Mauga Tasi Asuega, ina ua mae’a ona fefaloa’i finagalo faaalia o Faasuaga ma Ponao’o o le afioaga i le valaaulia mai Samoa lea na auala mai i le Ofisa o Mataupu Tau Samoa.

I se faatalatalanoaga a le Samoa News ma le afioga i le alii Minisita ia Tolofuavalelei Falemoe Leiataua, o ia foi lea o se isi ta’ita’i o le Komiti o Tapenaga o le Fu’a a Samoa i le vaiaso na te’a nei, sa ia faamalamalama mai ai e faapea, ua maea ona tuuina mai le valaaulia a Samoa mo le fautasi e mua ma le tulaga, i le tuuga fautasi o le fu’a a Amerika Samoa i le tausaga nei.

Na pau aiaiga e tatau ona manino i ai Amerika Samoa e pei ona saunoa Tolofuavalelei, e le taliaina e Samoa fautasi o loo fausia i fausaga faaonaponei (hi-tech), e le faaaogaina foi ni foe sipuni, ae na o fautasi lava e fausia i laau samoa ma alo fo’i i foe Samoa.

O lea faaiuga mai le komiti o le fu’a a Samoa e le’i nofo lelei i finagalo o le afioaga o Pago Pago e pei ona saunoa le matua ia Pulu.

“O le Aeto o lo o fausia fo’i i laau ma laupapa e pei fo’i o isi fautasi, e le malamalama la le nuu pe o le a le uiga o lea faaupuga, e le taliaina ni fautasi hi-tech,” o le saunoaga lea a Pulu.

“Matou te faafetaia ma talia ma le agaga faafetai le valaaulia mai le malo o Samoa, peitai ua tasi le filiga o aleaga i le afioga ia Mauga ma le nuu, o le a malolo tama o le Aeto e le malaga atu i Samoa, atonu foi o se avanoa lelei lea mo le nuu e sefe ai tupe aua o le mea moni, o le a tele tupe e faaalu ai ma alu ai foi le taimi i le tau tapenaina o lenei faamoemoe,” o le saunoaga lea a Pulu.

Sa ia taua foi, ana fai foi se faaiuga a le afioaga e malaga pea le fautasi, e le faa faigata foi ona tau saili ni foe Samoa e alo ai, aua e le o se galuega faigofie le tau toe su’eina lea o ni foe Samoa ae o lea ua toe tolu vaiaso faataunuu le faamoemoe a le malo o Samoa.

“Sei vagana o se vavega mai le lagi ona faatoa vave lea ona maua ni foe Samoa e alo ai le va’a, ae atonu o le faaiuga ua faia e le afioaga, o se faaiuga ua talafeagai ma lelei mo lenei faamoemoe,” o le saunoaga lea a Pulu.

O le tofa ia Tuaolo Meto lea ua tofia e le afioaga na te faaooina atu le faaiuga i le Ofisa o Mataupu Tau Samoa, o iina lea na auala atu ai le valaaulia a le malo o Samoa.

E lei manuia taumafaiga a le Samoa News i le tau sailia o se finagalo mai le tofa Nanai Afuola i le aso ananafi, ona sa faailoa mai e le tamaitai na taliina mai le telefoni, o loo pisi o ia i ana fonotaga, ma e le iloa se taimi e mae’a ai.

I se saunoaga a le alii Palemia ia Tuilaepa Lupesoliai Sailele Malielegaoi i luga o le leitio a le 2AP i le vaiaso na te’a nei, sa ia faamautuina mai ai le leai o se avanoa e tausinio ai ituaiga fautasi ia e i ai le fautasi a le afioaga o Pago Pago, Fagasa, Manu’a ma Aoa i tuuga o le fu’a o lenei tausaga.

Na faatusa e le alii Palemia tuuga fautasi e tuutuu ai ituaiga fautasi ia, o tuuga fautasi a vaa laupapa ma ituaiga vaa faila ia e tauva i le ipu a le America’s Cup Race.

E lei mautu mai lava i le taimi nei poo ai fautasi o le a fai ma sui o Amerka Samoa i le fu’a a Samoa i le masina o Iuni.