FA’AI’U I LE SAMI TULIGA LEOLEO MA SE TAMA’ITA’I A'OGA

Na fa'ai’u i le sami tuliga a leoleo ma se tama'ita'i e 16 tausaga le matua lea sa faia i se vaega o le taulaga i Fagatogo, ina ua masalomia e leoleo o lo o ‘ona le ula lea, ae alu ai i le atoa ma puna i le sami.

Na aga'i atu leoleo ma latou va'aia ai le tama'ita'i lea o lo o i Fagatogo o ia, ona taumafai lea o leoleo e talanoa i ai ona o lo o masalomia le tagofia e lea tama'ita'i o le 'ava malosi, peita'i ina ua taumafai leoleo e talanoa atu i le maula lea, ae na faliu le tama'ita'i ma alu i le atoa ma fai ai loa latou tuliga ma leoleo.

Na ta'ua i fa'amaumauga a le fa'amasinoga e fa'apea, na tamo’e le tama'ita'i lea aga'i i le vaega o lo o i ai le uafu o va'a faila ma oso ai i le sami. Na talosagaina e leoleo se fesoasoani mai le vaega a le Marine Petrol ma mafai ai loa ona toe aumai i luga le tama'ita'i lea ma auina atu loa i le ofisa mo su'esu'ega.

Ua tu'uaia nei e le malo lenei tama'ita'i i moliaga o le tagofia o le ‘ava malosi ae le’i atoa le 21 tausaga, fa'atupu vevesi i nofoaga faitele, atoa ai ma le sola 'ese ma leoleo ao taumafai e taofia fa'apagota o ia.

Na te'ena e le tama'ita'i lea moliaga fa'asaga ia te ia, ma ua toe fa'atulaga ai loa le isi ona iloiloga i le vaiaso fou i luma o le ali'i fa'amasino ia John Ward II.

Na ta'ua e le loia a le malo e fa'apea, e matuia atu se isi tulaga e ono o'o i ai lenei tama'ita'i, pe ana fa'apea e le vave atu i ai leoleo ma toso mai o ia i luga, ona sa ‘ona o ia i le taimi na oso ai i le sami.

O le ua molia o se tama'ita'i a'oga mai se tasi o A'oga Maualuga i le atunu'u, ma ua toe tatala i tua o ia e fa'atali ai le isi ona iloiloga.