Tala ‘oto’oto mai Samoa

TALI MAI OFISA VA’A I LE MAFUA’AGA O LE MAFATIAGA O LANO

I le vevesi ai o le malo o Amerika Samoa i le mata’upu i le tulaga pagatia na o’o i ai le aumalaga mai Lano i Savai’i, lea na malaga mai mo le Sisiga Fu’a a le teritori, ua fa’ailoa mai ai e le ofisa va’a a le Lady Naomi, o le Samoa Shipping Corporation (SSC), e le o latou le mafua’aga o lenei fa’afitauli.

Na ta’ua e le SSC i sa latou fa’amatalaga tusia, e o’o mai i le amataga o lenei vaiaso, e leai lava se fa’asea mai i le aumalaga, ua o’o atu ia i latou.  Ma sa fa’amanino mai e le SSC, o le totogiina o pasese a lenei aumalaga, sa fa’aavanoa ai aso e toe taliu atu ai le malaga.

Na ta’ua e le SSC, o tulafono a le latou kamupani, e pa’u lava i luga o le tagata malaga, po o le aumalaga, le tiute tauave o le toe fa’amautu o aso ma taimi e toe fo’i ai.  Sa fa’aalia e le SSC ia le fiu o tagata o la latou ofisa i totonu o Pago Pago, e fa’afeso’ota’i le aumalaga ae peita’i, e le’i fa’amanuiaina.

Sa fa’aalia fo’i e le SSC e fa’apea, o le tulafono i le taimi e uta ai a latou pasese, o ai lava e muamua i luga o le uafu ma ua mautu a latou pepa, o i latou ia e muamua i totonu o le va’a.  Ae peita’i, na fa’aalia e le SSC, e le’i fa’amautuina e Lano le aso e toe taliu ai le latou faigamalaga, ma o le mafuaaga lea na le maua ai avanoa mo isi, ona ua tumu le latou pasese.

Na ta’ua fo’i e le SSC, e le pa’u i o latou luga pe afai e le mafai ona malaga ni isi, aemaise i latou e galo ona fa’amautu a latou faigamalaga.  Ae peita’i, ua i ai se loto malie i le pulega a le SSC, e toe fa’afo’i pasese na totogi a i latou uma na a’afia i lenei fa’afitauli.

Na fa’aalia e le SSC, ona o se fa’atagana mai i le Minisita o Galuega ma Femalagaaiga, na mafai ai ona toe si’i le fuainumera o pasese na mafai ona la’u e le Lady Naomi, mai i le 220, i le 270.

Na te’ena e le ali’i kovana o Amerika Samoa, le afioga Togiola Tulafono, ia tu’ua’iga na fa’asaga i le malo, ona o lenei fa’alavelave.  Na ta’ua e Togiola, o le pogai o lenei fa’afitauli, e pa’u i luga o le SSC, lea e pulea le Lady Naomi.

TOE TO’ESE NISI TAUSAGA O LONA FA’ASALAGA ONA O LE MATUA O LE SOIFUA

O se tama matua e 66 tausaga, na ta’usala i le fa’amalosi teine, sa lau lona fa’asalaga e nofosala i le falepuipui mo le 13 tausaga, ae peita’i, na toe to’esea e le ali’i fa’amasino, o Pierre slicer, leisi lua tausaga, ona ua va’ai alofa fo’i le fa’amasinoga i tausaga o le soifuaga o lenei ali’i.

Na ulua’i ioe lenei tama matua i molaiga e lua o le fa’amalosi teine ma lona taumafai e faiaiga ma se teineititi talavou, o lona lava aiga.  O le fa’alavelave tau i le fa’amalosi teine, na tula’i mai i le va o Ianuari ma Iulai 2008 fa’apea Setema 2011.

O fa’alavelave i lona taumafai e faiaiga ma se teineititi talavou, sa tula’i mai i le va o Iulai ma Tesema 2008, ae o tua mai o Setema 2011 na fa’ato’a logo ai loa le ofisa o leoleo.

FA’AMANATU LE 100 TAUSAGA O LE MALUMALU EFKS I IVA, SAVAI’I

Na fa’atumulia le afio’aga o Iva i le motu tele i Salafai, i tagata o le nu’u na faimalaga mai i atunu’u mamao, aua le fa’amanatuina o le 100 tausaga, talu ona fa’atuina le malumalu o le Ekalesia Fa’apotopotoga Kerisiano a Samoa (EFKS), i totonu o le nu’u.

I lea sauniga fa’apitoa, na fa’amanuiaina ai se ma’a fa’amanatu aua lea aso fa’apitoa.  O le susuga i le Faifeau Toeaina ia Rev. Elder Solomona Tuatagaloa mai i le afio’aga o Lalomalava, sa na ta’ita’ia le sauniga, i le fa’amalumaluga a le Ta’ita’ifono a le EFKS, Rev. Elder Lale Ieremia.

Na fa’amatala e le susuga i le faifeagaiga ia Tonu Maugafa, lea o lo o tausia nei le ekalesia i Iva, sa ia fiu e saili le uiga o le tausaga “1912” sa tusia i luga o le malumalu, ina ua ia fa’ato’ai galue i totonu o le nu’u.

Na atili fa’afaigata lana sa’iliga ona o le leai o ni tusitusiga o tala fa’asolopito o le ekalesia, seia vagana ai ni tusitusiga mai le taimi o Rev. Manu Tusani i le 1964 seia o’o mai ia Rev. Elder Tufi Faapusa i le 2007.

Ae ua mafai ona fa’amautuina, o le 1912 lea sa tusia i luga o le malumalu, e fa’atatau i le aso 21 o Aperila 1912, le ulua’i sauniga lotu sa fa’ataunu’uina i totonu o lea malumalu.

Source: Samoa Observer