Login

Olimipeka Fa’apitoa - Fanau A’afia i Gasegase Tumau

Nisi o fanau - faatasi ai ma matua, i le amataga o tuuga tamo’e i le aso Faraile mo le Sosaiete a le Olimipeka Fa’apitoa. [ata: Jeff Hayner]

Ina ua mae’a le sisigafu’a o lenei tausaga, na mafuli atu loa le Sosaiete a le Olimipeka Fa’apitoa a Amerika Samoa i le latou Ta’amilosaga fa’apitoa e masani ona fa’atautaia i tausaga ta’itasi ina ia mafai fo’i ona auina atu ni tatou sui agava’a mo lea fa’amoemoe i tauvaga fa’avaomalo ua loma nei.

O le tala mai, e tusa ma le to’a 100 o i latou o sui tauva sa auai ane ina ia saili so latou tulaga e auina atu e le sosaiete ma le tatou malo e tauva i fafo. Ona o le vaega o lo’o tauva e ao ina matua lava tapena mo ta’aloga fa’avaomalo, o lea ua vave ai ona fa’atino nei tauvaga.

E tusa ai ma le saunoaga fa’apitoa a le ali’i taitaifono o le Olimipeka Fa’apitoa, le susuga Tea Poumele, sa ia fa’ailoa mai ai, “O lenei fa’amoemoe ia lava tapena le fanau fa’apitoa mo nei tauvaga, a’o le’i o’o i le 2013 lea faia ai le ta’aloga Olimipeka Fa’apitoa Fa’avaomalo.”

Ua ia fa’ailoa fo’i, e i ai fo’i nisi ta’aloga e faia i le masina o Iulai o lenei lava tausaga, ia toe saili atili ai sui agava’a mo lea lava fa’amoemoe.

I le aso Faraile ua te’a, sa fa’atasia uma ai i latou nei ua fia tauva i le Malae Ta’alo i Veterans Memorial Stadium i Tafuna, ma sa aofia uma i ai fanau talavou, fanau iti ae maise o e fo’i ua matutua e i ai afaina tumau o latou tino.

E le gata ai ia i latou e fia tauva, ae ua aofia fa’atasi ai ma i latou e ofoina o latou taimi e tausoa ai le gaoioiga a i latou o le a tauva, ina ia mautinoa, ua atoatoa lo latou naunau i lenei sao mo lo latou atunu’u, pe a o’o ina tauva fa’avaomalo.

O i latou nei sa sapaia o latou fa’amoemoe e aofia ai matua, o fanau a nisi o matua o aofia i lea vaega o le atunu’u, ma e pele fo’i ia i latou sui tauva nei.Ua fa’atulaga e 10 vaega o le a tauva ai i latou, e aofia ai le 25mita le mamao e savali ai, 50 mita le mamao o le savaliga, 100mita le mamao o le savaliga, 25mita e tamo’e ai, 50 mita e tamo’e ai, 100 mita le tamo’ega, 200 mita le tamo’ega, 100mita le tu’ugafu’a, togi o le polo ma le togi le polo tenisi.

O lenei taumafaiga, ua toe tima’i ai i latou uma ua i ai afaina tumau o latou tino ina ia tauva, ia saili lava ala e toe fa’amalosia ai i latou nei ina ia mitamita e tauva fa’avaomalo mo Amerika Samoa, ma ia fiafia i ai!

O le fa’amoemoe e toe fa’aauau le isi ta’amilosaga o ta’aloga nei e 10 mo i latou e tauva ai ia Iulai 2012, e fa’aleleia atili le latou malosi e tauva ai, ma maua ai ni sui agava’a mo le tatou malo e tauva i Ausetalia lea e faia ai lenei ta’amilosaga o le Olimipeka Fa’apitoa a le Lalolagi i le tausaga fou.

I tausaga ua tuana’i, sa i ai fo’i nisi o le atunu’u sa maua tulaga muamua i tu’uga nei, ma o se mea fiafia lea i le vaega o le Olimipeka fa’apitoa a Amerika Samoa. O lenei fo’i taumafaiga, e toe mana’omia ona ausia fo’i lea matati’a i le tausaga a sau i Ausetalia.

O le Asosi mo le Olimipeka Fa’apitoa e aofia uma ai Matagaluega o lo’o latou nafa ma le tautuaina fa’apitoa o le vasega o i latou e i ai afaina tumau i le tino ma le mafaufau, Vocational Rehabilitation, Polokalama a le DOE Special Education, Matagaluega e Puipuia Aia Tatau a i Latou e i ai Afaina tumau o le tino ma le Mafaufau [OPAD], ma i latou loa o lo’o ofoina mai o latou taimi ma agava’a e a’oa’oina ma tausoa ai le fa’atautaiga o nei ta’aloga mo le Olimipeka Fa’apitoa i Amerika Samoa.

E le’i galo ona fa’afetaia e le susuga le Taitaifono o le Special Olympics nei vaega uma e fa, ma ua ia toe fa’amalosi mai, ina ia le motusia pea le auaunaga mo i latou nei, ia fa’amalosia fo’i lo latou auai e lagolagosua i sui tauva i taimi uma.

O lo tatou faia pea o nei tiute ma fa’ailoa i nei sui fa’apitoa, o lo’o tatou aofia fa’atasi i le lalolagi o mea lelei, po’o le a lava le afaina o i ai latou, e le utuva ai ona tatou aofia i latou i ta’aloga, fa’amasaniga lelei, ma e taua i latou i o tatou olaga i taimi uma a’o tatou ola fa’atasi ai.

“O le manulauti o lenei polokalama, “ia ‘aua lava ne’i ola fa’anoanoa se tasi ona o afaina tumau o le tino ma le mafaufau,” ae ia aofia pea i latou i si mea uma o le olaga e mafai ona tauva ai, fa’amalositino ai, ma ia mautinoa ua tatou aofia i latou i o tatou olaga i aso fai so’o.

O le fa’afetai i le ola ma le malosi, e mafai ona e iloa le ‘ese’esega o i tatou o lo’o sa’oloto i le malosi o le tino ma le mafaufau, pe afai tatou te taga’i ia i latou o lo’o i ai nei lu’iga tumau i o latou olaga! Ia le galo i latou ia tatou tatalo!

saunia: Leua Aiono Frost



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.