Login

Fautua Togiola LBJ vaavaai si’itaga totogi talavai ma vailaau

ausage@samoanews.com

Ua tu’uina atu e le alii kovana sana tusi i le Komiti Faafoe ma le Pulega a le Falemai o le LBJ i Fagaalu, ina ia iloilo ma le toto’a ni a latou si’itaga mo vailaau ma talavai, ina ia talafeagai ma le manaoga e pei ona tula’i mai i le taimi nei, ina ua le mafai e le Fono Faitulafono ona tali mai i manaoga sa tuuina atu i ai, mo ni fesoasoani tau tupe mo le falema’i.

Na faamaonia e le afioga i le matua ia Togiola Tulafono i luga o lana polokalame i le faaiuga o le vaiaso na te’a nei e fa’apea, o lana tusi lea ua ia tuuina atu i le pulega a le falema’i, e le gata o loo faailoa atu i ai aiaiga uma o le $3 miliona lea na pasia e le Fono mai le Teugatupe o Taui mo Tagata Faigaluega a le malo, ae ua tuuina atu ai fo’i ma sana fautuaga, ina ia faaaoga le avanoa lenei e vaavaai ai loa i ni si’itaga e tuuina atu mo a latou talavai ma vailaau.

A’o le’i faia le faaiuga a le Fono Faitulafono latou te teena ai pili tupe sa faaulu e le kovana i lana fono faapitoa na mae’a atu nei, na saunoa ai foi le alii kovana e faapea, afai e le pasia e le fono pili tupe ua ia faaulu, e tasi lava le auala e aapa i ai le falemai ina ia maua mai ai se tupe e fesoasoani i lana tautua, o le toe faaauau lea o siitaga i ana pili.

“O lea la ua tuuina atu la’u tusi i le pulega a le falemai, ua tatau ona faaaoga le avanoa lea e toe tilotilo ai i a latou totogi o talavai ma vailaau, ma fai se fetu’unaiga ina ia talafeagai ma le malosi o le atunu’u, a ia maua atili ai se seleni e fa’ataunu’uina ai tulaga uma ia, ona ua le mafai ona ausia tulaga sa tu’uina atu ai le talosaga i le fono, ona o le faaiuga e pei ona faia e le Senate,” o le saunoaga lea a le alii kovana.

Saunoa Togiola, o le faaiuga a le Senate ua faia i pili tupe sa tuuina atu i ai, o aga lava ia o galuega, e leai se isi e fau malo i sona manatu, peitai e le avea ia tulaga ma itu e taofia ai galuega mo le toe faafo’iina atu o le aufaigaluega a le falema’i, i le toe mauaina lea o a latou itula o loo faaitiitia.

“E faamalulu atu ai le atunuu ona o ia tulaga i siitaga ua ou fautuaina mo le falema’i, ae ou te manatu o le a i ai pea sina siitaga mo totogi o talavai ma vailaau, ona ua le maua le sini e pei ona ou talosagaina ai le fono,” o le isi lea saunoaga a le alii kovana, faatasi ai ma lana tautinoga, e le muta ai ii taumafaiga a le malo i le tau sailiina lea o se fesoasoani mo le falemai, ae o le a taumafai pea e saili se auala e maua ai se isi fesoasoani mo le falema’i i le lumana’i.

“E le gata ai ii a matou sailiiliga, matou te tu’itu’i atu pea, o le matou tiute tauave lena, e fai pea la matou galuega o le faaoloolo maau atu ma talosaga atu ina ia to maia le tofa a le fono, mo se fesoasoani mo le falema’i a le atunu’u,.”

E faalua ona taua e le alii kovana le upu, “faamalulu atu i le atunuu”, ona e i ai lona talitonuga, o le a aafia foi le atunuu i se isi siitaga a le falemai i talavai ma vailaau.

“Le atunuu e, e faamalulu atu, afai e i ai ni tulaga faapena o le a outou maitauina, e pei o ni siitaga a le falema’i, malu ave i fale o outou finagalo, ae le mafai ai lava ona tatou solomuli i le faafoeina o le tatou falemai, aua e tatau ona tatou fausia pea auala uma ina ia gafatia ai e le falemai ona togafiti ma tusi le soifua maloloina o le atunu’u.”

O le vaiaso na tea nei na faamaea atu ai e le malo le $1.5 miliona mo le falemai, mai le $3 miliona lea na pasia e le fono e non mai le Teugatupe o Taui o Tagata Faigaluega, ma le faamoemoe e totogi i le lafoga e 2% mai totogi o tagata faigaluega lea ua sii i le tausaga lenei.

Na faasea se tama matua i luga o le polokalame ona o lana fualaau na alu atu e toe faatumu mai i le falemai i le vaiaso na te’a nei, peitai sa faailoa ane i ai e le Faletalavai, e tolu itula e faatali ai mo le toe faatumuina lea o lana fagu fualaau ona faatoa piki lea.

Fai mai le tomumu a le tama lea i luga o le polokalame, na fiu e talosaga i le tagata faigaluega a le Faletalavai o ia e mamao le mea e sau ai, e le mafai foi ona faatali mo se 3 itula ae sa tumau pea le faatonuga e tolu itula ona toe piki lea o lana fagu fualaau.

Na faamanino e se tagata faigaluega mai le faletalavai na valaau atu i luga o le polokalame e faapea, ua mafua lea suiga ona e le gata ua faaitiitia itula faigaluega a tagata faigaluega a le falema’i, ae e le lava foi le aufaigaluega a le Fale Talavai e faatinoina lea auaunaga.

Na taua e le alii lea e faapea, e ave le latou faamuamua i gasegase e umi le taimi na faatali ai mo le vaaia o le foma’i e pei o fanau ma tagata matutua, ae o i latou ia e malaga atu e toe faatumu a latou fualaau, a uma ona momoli atu le fagu fualaau i le ofisa mo le toe faatumuina, ona alu lea o le tagata e fai nisi galuega ae toe faatatau atu i le maea ai o le tolu itula mo le pikiina o le fagu fualaau.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.