Login

Naunau ia fausia uma fautasi ...

ausage@samoanews.com
Susuga Leoititi Maselino Ioane (ata AF)

a afioaga fausaga Samoa

Na taua e le susuga Leoitiiti Maselino Ioane lona faanaunauga o loo i ai, ina ia tofu uma afioaga i Amerika Samoa nei ma fausaga o fautasi, ia e fausia mai i fausaga Samoa, ina ia laina tutusa uma ai ituaiga fautasi e alo e afioaga pe a oo i faigamea i le tai i tausaga uma lava.

I le atoa ai o fautasi e 10 ua maea ona fausia e le susuga Maselino na ia taua ai i le Samoa News e faapea, o lona faanaunauga o loo i ai, ia laugatasia uma nuu i Amerika Samoa ma fautasi e fausia i le fausaga Samoa.

“Ou te le faatauagavale i afioaga ua i ai a latou fautasi o loo fausia i fausaga faaonaponei, peitai i lo’u talitonuga o se tufuga fauvaa, o se tulaga talafeagai le tutusa o fautasi e tutu’u i se tuuga,” o le saunoaga lea a Maselino.

“Ou te manatu ia faatutusa uma fausaga o va’a, ona manaia ai lea ma talafeagai le tuuga - ia tutusa fausaga o vaa, tutusa mamafa, ona su’e loa lea i le malosi ma ivi o le auvaa le vaa e mua,” o le saunoaga lea a Maselino.

Saunoa le susuga Maselino, lea na fausia vaa e tolu ia na tutu’u i le tuuga fautasi  o le fu’a o lenei tausaga, o se tasi o itu e lelei ai fausaga Samoa, e le gata e taugofie mo nuu laiti, ae o mea uma e manoamia i le fausiaina o le va’a e maua uma i Samoa, e le tau okaina mai i fafo.

O fautasi ua fausia e le susuga Maselino i Samoa e aofia ai nisi o fautasi sa avea ma siamupini i tuuga fautasi i Apia e pei o le Savali o le Filemu mai Falelatai, Little Rina, Kionasina, Tamarina ma le Ulalei Bluebird mai Apia, faapea ai ma le La o Samoa mai Lepea, ae mo Amerika Samoa nei, o vaa na fausia e Maselino e aofia ai le vaa a tama aoga a Samoana, Paepae Ulupo’o mai Aua ma le Fuao mai Vatia lea na faatoa fausia i le tausaga nei.

 

Na taua e le susuga Pauli Fetalaiga o Salelologa e faapea, o se tasi o tulaga e tatau ona faia i nisi tuuga fautasi i le lumanai, o le fai eseese lea o tuuga fautasi a vaa ua fausia i fausaga faaonaponei, fai ese le tuuga fautasi a vaa o loo fausia i fausaga Samoa, peitai na saunoa Maselino, e le afaina lea tulaga, na pau le itu ua matagofie ai le tuuga o lenei tausaga o le tulaga malu o le tai.

I le eseese ai o saoasaoa o va’a o loo fausia i le fausaga Samoa, na saunoa ai Maselino e faapea, e mafua ona eseese tulaga o vaa Samoa ia, e mafua mai i le auvaa o loo aloina le va’a.

Sa ia taua foi, o le tele o vaa sa ia fausia na avea ma siamupini i tuuga fautasi i Apia ma Tutuila nei, e tutusa uma e leai se eseesega, ma o fausaga vaa foi ia e lelei mo le sou e lelei foi mo uta i le ‘alo’alo, ae le tutusa ma fausaga fou ia ua a’e mai e na o uta lava i le ‘alo’alo ma le tai malu e lelei ai.

“E tutusa lava fausaga o vaa, e tutusa foi le mamafa atoa ai ma ona foliga vaaia, pau le mea e eseese ai, e eseese i maso, ivi ma le malolosi o le auva’a o loo aloina le va’a, lona uiga afai e lelei le auva’a ona lelei loa lea o le tulaga o le va’a,” o le saunoaga lea Maselino.

Na taua e le tofa Pauli Ivan Williams, o le kapeteni lea o le fautasi a Le Tolotolo o Tamauli mai Salelologa e faapea, afai o le a saoasaoa pea le fausiaina e nisi o afioaga o ituaiga fautasi ia e faaaoga i ai fausaga mai fafo, e tatau la ona ese lava le tuuga a ituaiga  fautasi ia, ese foi tuuga a fautasi o loo fausia i fausaga Samoa.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.