Login

Talia Ofisa o Aoga se talosaga a le Iuni Lakapi

ausage@samoanews.com

Ua talia aloaia e le Matagaluega o Aoga a le malo (DOE) se talosaga na tuuina atu i ai e le Iuni Lakapi a Amerika Samoa (ASRU), mo se avanoa e faaofi atu ai i totonu o polokalama o taaloga a Aoga Maualuluga, le taaloga lakapi faa peretania, ina ia vave atia’e lenei fa’agatama i tupulaga aoga.

I se fonotaga a le ASRU i le vaiaso nei, na faamaonia mai ai e le Taitaifono o le Iuni, le afioga i le matua ia Togiola Tulafono, lea tulaga.

Saunoa Togiola e faapea, o se faaiuga sa faia e le ASRU ina ia valaaulia aoga maualuluga e tuuina atu ni a latou ‘au e auai i taamilosaga o lo o faagasolo a le Iuni i tausaga uma, ina ia faa faigofie ai ona televave le atina’eina o le taaloga i le atunuu.

“Sa talia fiafia e le Ofisa o Aoga la matou talosaga sa tuuina atu, ma ua faia ai loa le faaiuga a le Ofisa o Aoga, o le tausaga nei o le a tuu ai i totonu o polokalama o taaloga a fanau aoga le latou liki lakapi, ma ua faamoemoe o le masina o Me e amata ai le liki muamua a tama aoga,” o le saunoaga lea a Togiola.

Saunoa le alii kovana, e tolu aoga ua latou taliaina le talosaga a le ASRU ma ua sauni foi e tuuina atu a latou au lakapi ta’ito’a 15 i le liki o le a amataina i le masina fou, ma o aoga ia e aofia ai le aoga Maualuga a Leone, Tafuna ma le NVTHS.

O le faanaunauga a le ASRU o lo o i ai, e le gata i le taamilosaga ta’ito’a 15 mo fanau aoga, ae tatau foi ona i ai ma sa latou taamilosaga ta’ito’a 7 ina ia faamasani ai fanau aoga i le faatinoina o le taaloga.

Ua talosagaina e le alii kovana kalapu lakapi uma i le atunuu ina ia fesoasoani i le atina’eina o le lakapi i totonu o aoga, ina ia mafai ai ona faasoa atu lo latou silafia i faiaoga o le a faafoeina au a aoga.

“E leai se isi auala e sili atu ona televave mo le faaleleia ma le atina’eina o le lakapi i le teritori, nai lo le amata mai i totonu o aoga, o lo’u faanaunauga foi lena o loo i ai, ia le gata i le taaloga football e atina’e i totonu o aoga, a ia maua atu ai foi ma le avanoa o le taaloga lakapi,” o le saunoaga lea a le alii kovana.

Na taua e le peresetene o le Faalapotopotoga o Taaloga Lakapi i le Pasefika (FORU), le afioga Tauiliili Harry Schuster, ina ua fesiligia e le Samoa News, e televave atu le atina’eina o le taaloga lakapi pe afai e amata mai totonu o aoga.

I le avea ai o Tauiliili o se tasi o malo faaaloalogia o le taamilosaga taitoa 7 a le TMO Pago Marist lea na faataunuuina i le faaiuga o le vaiaso na te’a nei, sa maua ai le avanoa e fesiligia ai o ia i le tulaga ua i ai le talosaga a Amerika Samoa i totonu o le IRB, ina ia avea ai Amerika Samoa ma sui tumau o Faalapotopotoga o le Taaloga Lakapi i le lalolagi, le IRB.

Saunoa Tauiliili, o le fonotaga a le IRB lea o lo o loma nei ia Me o le a tuuina atu ai loa i totonu o mataupu o lea fonotaga, le talosaga a Amerika Samoa na tuuina atu i le masina o Oketopa o le tausaga na te’a nei.

Na taua foi e Tauiliili e faapea, ua maea ona la fesootai ma le alii kovana e tusa ai o taualumaga uma o lea faamoemoe, ma ua ia faailoa foi i ai le tulaga ua oo i ai le talosaga sa tuuina atu.

“E tatau ona maea le masina o Me ua maua e le ASRU se tala fiafia e uiga i le latou talosaga sa tuuina atu, o lo’u faanaunauga foi lea o loo i ai, ia mafai ona agai atu pea le atina’eina ma le faaleleia o le taaloga lakapi i Amerika Samoa nei, i se tulaga maualuga ma televave lona faatinoina, ina ia mafai ai ona ausia nisi o faamanuiaga mai le IRB o loo maua e isi atunuu tetele o le lalolagi e aofia ai ma Samoa,” o le saunoaga lea a Tauiliili, o ia foi lea o le sui o Samoa ma Amerika Samoa i totonu ole IRB.

Saunoa se tasi o sui o le Iuni Lakapi a Samoa ia Tuilagi Saipele e faapea, afai e vave le aapa mai o aoga e opogi ma lagolago le taaloga lakapi, e le umi lava ae vaaia e Amerika Samoa le lumana’i o ana tama fanau i lenei taaloga.

“O le taimi nei i Samoa ua matua saoasaoa ma televave le atina’eina o le lakapi i totonu o aoga, e oo foi i nuu ma kalapu i tua, ua matua televave lava, afai la e faapena le teritori nei, o lona uiga o le isi 3 i le 4 tausaga o le a matagofie ai se au a fanau aoga e i lalo o le 19 tausaga e avatu i Amerika Samoa nei,” o le  saunoaga lea  a Tuilagi.

Saunoa Togiola, o le autu ua  manatu ai le ASRU e tatala le lakapi i tua i aoga, ina ia faigofie ai ona tuu faatasi se au lakapi a tama i lalo o le 19 tausaga, ma faamasani ai tama aoga i le faatinoina o le taaloga atoa ai ma tulafono.

“O lo’u manatu ia lelei se tulaga o se au a tama e i lalo o le 19 tausaga e avatu i Amerika Samoa nei, ina ia tausinio i taamilosaga a le IRB lea o loo tausinio  ai isi atumotu o le Pasefika e aofia ai ma Samoa,” o le saunoaga lea a le alii kovana.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.