Login

Lu’itau a Togiola mo Amerika Samoa i lona lumana’i

O le afioga i le kovana sili, le matua ia Togiola Tulafono, i lana saunoaga mulimuli fa’alekovana, i le ulua’i aso o le Sisiga Fu’a 112 a Amerika Samoa, i le aso ananafi. [ata: TG]

Saunoaga mulimuli fa’alekovana a Togiola

I le toe saunoaga faa ta’ita’i a le afioga i le kovana sili ia Togiola Tulafono, i le faamanatuina ai o le  112 tausaga talu ona sisi le fu’a a le malo o Amerika i laufanua o Amerika Samoa, na ia toe fa’atepa ai tagata o le atunu’u, i le taimi na sisi ai le tagavai o le malo tele o Amerika i luga o Sogelau, ae le gata i lea, o le Feagaiga a malo tetele (Amerika Siamani ma Peretania) lea na sainia i le 1899 i Perelini i Siamani ma vavae ai Samoa i Sisifo mai i Samoa i Sasa’e, ma tu’uina atu i lalo o va’ava’aiga a nei malo tetele.

Na saunoa Togiola “112 tausaga mo Tutuila ma Aunu’u, 98 tausaga mo le Manu’atele, mai ia tausaga uma, o lo o tatou galulue i lalo o le ta’u “e le’i tu’ufa’atasia” (unorganized)...e le’i tu’u i totonu (unincorporated)...112 tausaga o tatou fua ta’ape ai lava ma le tu’uina i totonu...o le fesili ou te fa’atula’i...o e fiafia i lea tulaga? Ua tatou malilie ea e tatou o fa’asalalau ai lava fa’apea mo leisi 112 tausaga?”

Na sa o itu e fa o le malae a le VA Stadium i Tafuna, e leai se mea na toe gase poo se leo na toe faalogoina, a’o lele malie le ti’a a le afioga i le matua ia Togiola, mo le tuuina atu o lana toe saunoaga faataitai i le taimi o le sisiga fu’a a le atunuu.

Saunoa Togiola, i lana suesuega sa faia i le maliliega lea na sainia e tuaa ua taooto mai tia sa ma taitai o le malo o Amerika, ua atagia mai ai le le mautu  ona faataunuu o tiute faatagatanuu o lo o i ai nei.

“Ua atagia mai ia te a’u...le le lelei ma mautu ona faataunu’u o tatou tiute fa’atagatanu’u.  O le a le mea na finagalo ai o tatou tuaa ina ia tuu fa’apea lenei maliliega?”

“Ua alu le 112 tausaga o tatou taumafai pea e tau faamatala le uiga o upu ae ua tatou le faia o tatou tiute faatagatanuu, o le faitau lea o le feau o lo o ta’u mai totonu o le maliliega.  Ua alu uma tatou taimi e tau fa’amatala le upu, ae galo le agaga o le maliliega ma le feagaiga.”

“Pe ua le o’o ea i le taimi, tatou va’ai i totonu o le agaga, o ia feagaiga, po o taunu’u pe leai, pe tatou o fa’asalalau ai pea fa’apea mo seisi 112 tausaga?  O le tatou tiute mo tupuaga lumana’i, SAILI...FA’ATONU...FA’ALELEI...FA’AMAUTU ina ia manuia tupulaga o le lumana’i.

I lana tautalaga fa’aperetania na saunoa ai Togiola, o nei vaitaimi o lo o tatou faatino galuega, i se pule a leisi.  Na ia toe fesili e fa’apea, o fiafia ea Tutuila ma Manu’a i le tulaga o i ai lona faigamalo i nei vaitaimi.  O le ituaiga faigamalo lenei o finagalo i ai mo fanau o le lumana’i.

Na ia saunoa, afai o i ai se mitamitaga i totonu ia i tatou, o tagata o Samoa, ua tatau ona faia se suiga.  Na ia ta’ua e fa’apea, o le tele o malo ma atunu’u, ua pulea lava e i latou latou lava.  Ae peita’i, sa ia saunoa foi, e le mafai ona o’o mai nei suiga pe afai e le galulue fa’atasi le atunu’u.

Sa u’una’ia e Togiola tagata o le atunu’u ina ia tutula’i ma faia se suiga, aua e le mafai e se tasi ona faia se’ia vagana, tagata lava o Amerika Samoa.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.