Login

Tala mai Samoa

reporters@samoanews.com

FA’AOLAINA SE ALI’I 23 TAUSAGA NA SOGI E SE ‘ONA I LE PELU

Na fa’aalia e se ali’i e 23 tausaga mai i le afio’aga o Malie, le fa’amanuiaina tele o ia, ina ua mafai ona fa’aolaina mai o ia, ina ua osofa’ia o ia e se ali’i ‘ona ma se agaese.

Na fa’amatala e Olosega Hunt, le laki tele o ia ma o se lesona ua na mafai ona a’oina mai i lenei fa’alavelave, o le aua lea ne’i ona toe fa’afetauia se tagata ‘ona.

Na ta’ua e Hunt e fa’apea, a’o aga’i atu i le fale i le Aso Sa na se’i mavae atu nei, na la fetaui ma lona uso la’ititi o Tiso ma fa’amatala atu e Tiso ia te ia, na fasi o ia e seisi ali’i.  Na fa’aalia e Hunt, na aga’i sa’o lava i le mea na faia ai le inuga pia e lea ali’i ma nisi o ana uo, ma fesiligia o ia pe aisea na ia fasia ai lona uso.

E le’i tali le ‘ona, ae ua tamo’e i le latou fale ma fo’i mai ma se agaese, ua fai tuliga ma Hunt.  Na ta’ua e Hunt, na ona lagona le tau o le agaese i lona papatua, ma ia manatu ai, o lona iuga lea.

E toe te’i ifo Hunt, ua si’o o ia e ni tagata, sa mafai ona feosofi atu e taofi le ‘ona ma fa’asao le ola o Hunt.  E 12 filo na mafai ona togafiti ai le tua o Hunt ma toe te’a lava i tua mai i le falema’i i le aso lava lea e tasi.

Ua fa’amaonia e leoleo le lokaina ma ua molia lenei ali’i na fa’ao’olima ia Hunt.

MOLIA ALI’I TO’ALUA SOLOSOLO I LE SUSUNUINA O LE FALE O LEOTA

Na tutula’i i luma o le Fa’amasinoga Fa’aleitumalo ia ni ali’i se to’alua, o lo o molia i le susunuina o le fale o le susuga Leota Ituau Ale, lea na avea ma Fofoga Fetalai, i vaitaimi ua tuana’i.

O le susuga i le fa’amasino, ia Vaepule Alo Vaemoa o lo o fa’afoeina lenei mata’upu.  Ma o lo o molia uma Ioane Vaipapa ma Tauali’i Lemusu i lo la fa’atama’ia o se fale o se aiga, e ala i le susunuina.  O Rosella Papali’i Viane, na sui tulaga i le loia a nei ali’i, o Shane Wulf, ma sa ia talosagaina le toe tolopoina o le mataupu.

Na ta’ua e Viane, sa fa’atonuina o ia e Wulf ina ia talosaga le toe tolopoina o le mataupu, ae se’i tu’u atu se avanoa e latou te feiloa’i ma talanoa ai ma Vaipapa ma Lemusu.

Sa taliaina e Vaepule le talosaga ma fa’atonuina i la’ua ua molia, ina ia toe o’o atu i luma o le fa’amasinoga i le aso 24 o Aperila.  Ua mae’a ona totogia e nei ali’i tupe sa fa’atulaga e le fa’amasinoga, e mafai ona tatala ai i la’ua tua.  Ae ua fa’atonuina i la’ua ia o’o atu i le ofisa o leoleo i Aso Lulu uma e saini o la suafa.

Source: Samoa Observer

TATALA I TUA LE ALI’I UA TU’UA’IA I LE SUSUNUINA O LE FU’A A SAMOA

Ua mae’a ona tatalaina i tua, ia le ali’i o Faataui Tapuaiga Paepae, e 31 tausaga, mai i le afioaga o Mulivai i Safata, lea o lo o molia i lona susunuina o le tagavai a le malo o Samoa, i luma o se tasi o fale o le malo i apia, i le vaiaso ua mavae.

O le susuga i le ali’i loia ia Leuluaialii Tasi Malifa o lo o tula’i mo Paepae, lea ua tu’ua’ia i moliaga e tolu, o le fa’ao’olima, fa’aleagaina o se mea totino a le malo o Samoa ma le fa’aleagaina, i lona loto malie, o le tagavai a le malo.

Na taliaina e le ali’i fa’amasino ia le tatalaina i tua o Paepae, ina ua mae’a ona ia totogia le tupe fa’atonuina e le fa’amasinoga, ma sa fa’atonuina Paepae ina ia o’o atu i le ofisa a leoleo i Poutasi i Falealili, i Aso Lulu uma o vaiaso ta’itasi, e saini lona suafa.

FUAFUA LE TOE SI’I O LAFOGA I LE MALAE VA’ALELE I FALEOLO

Ua i ai nei se fuafuaga, mo se si’itaga i lafoga o lo o totogi i le malae va’alele i Faleolo mo pasese e malaga ese mai i Samoa, mai i le $40 i le $65.

Na fa’aalia e le pule sili o le malae va’alele, le susuga Magele Hoe Viali, e le’i o’o se fuafuaga ua mautu lenei fuafuaga, ae ua na’o se talanoaga i le va o ofisa vaalele a Samoa.

Na ta’ua e Magele, o lo o iloiloina fo’i se manatu, ina ia fa’aopoopo lenei lafoga i totonu o le pasese, e pei lava ona faia e Niu Sila ma isi atunu’u.  Na saunoa Magele, e fa’ato’a mafai ona fa’amautu lenei fuafuaga, pe afai e ioe uma i ai ofisa va’alele.

Source: Radio New Zealand



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.