Login

SIAMUPINI TAMA O LE MUA’AU MA TEINE O LE MANU’ULA I LE LIKI KIRIKITI O LE FU’A 2012

sports@samoanews.com
Siamupini o le Liki Kirikiti a tama’ita’i o le Fu’a o le 2012, Teine o le Manu’ula mai le alalafaga o Vatia. (ata: LF)

FO’I TAMA O LE MUA’AU MA LE IPU O LENEI TAUSAGA

Ua siamupini nei le 'au o Tama o le Mua'au i le liki kirikiti o le Fu'a i le tausaga nei 2012, le 'au kirikiti e le'i i ai se faiaina i lenei ta'amilosaga atoa, le lupe lea na seu silasila a e tu'i atu le tapuaiga e le afioaga o Faleniu, lele la ua tau ai lupe o Lefao, ma ua sili mea nei le seuga ina mae'a le ta'amilosaga o le 2012.

Le Afioaga le Sa'o o Magalei ma le Matua ia Mua'sau, Afio mai Aiono ma Solatoa o tei o Magalei, Afio ai le Falefia o Taupolo, Afio mai le tama o Aitulagi, Susu mai Taumafaalofi, Susu mai le ma'opu o Tuia'ana, Alala mai i laua na totoe, Maliu mai le fetalaiga ia Si'uolefanuafiga.

Lele ua sa'asa'a ai nei Taigafouga, Toomanu, Manu oso fusi, Fuata tautu, Taigafouga ae sa alo atu o Tuia'ana ma lona aumaga i fa'agatama o le kirikiti.

E le vavaea le fala o'oto i Feagaiga a le Atua i so'o Fata fai taulaga i totonu i le Afioaga, lea sa outou tapua'i ma tu'i atu le mulipapaga a'o alo le Afioga i le Matua ia Muasau, ma le 'au kirikiti i fa'agatama o le atunu'u, ia o lea la ua a'e malo le latou faiva, ua siamupini i lenei tausaga 2012.

Fa'amalo fo'i ia outou sa le mafai ona aua'i atu i Vaovai i Fagaalu i tagata ua matutua, ma le 'au vaega ua maua i tino gasegase, po'o e e taua, 'O upega le talifau' fa'amalo le tapua'i, a lele ua fo'i mai i fanua a outou alo sa outou tu'u atu e fai le taua.

Ua fa'amalo atu i le ta'alo fa'atamali'i, sa outou le fa'alogologo tiga, ae fai lava le mea sa finagalo tasi i ai o le fa'atino lea o outou ta'aloga se'i tau lava i le fa'aiuga, lele la ua outou sapi i ma'amalie ina ua outou siamupini ma le Fu'a o le tausaga lenei.

Tae tae fatu manava laia o le mea na outou fai atu nei, ia e fai fo'i ma fa'ata'ita'iga lelei mo fanau lalovaoa i le Afioaga, ia manaia le Fu'a ma manuia le outou Siamupini.

MANUMALO LE MANU’ULA I TA’ALOGA A TAMA’ITA’I

E ui lava e na o le tolu ta'aloga a nai teine, ae ua fa'amanuia nei le 'au mai le Afioaga o Vatia, i le latou 'au tamaita'i o le Manu'ula i lene tausaga i le liki o le Fu'a 2012.

Le Afioga e Susu mai le Tamaita'i o le Ao, Susu mai Tagoilelagi, Susu mai Nofoafanua, O i laua o le tao veloaluga, Susu mai Usoali'i, Mamalu mai oulua Tama Matua, ma upu ia te oulou le Saofaiga ma le Lautinalaulelei.

Ua sivasiva ai nei Toleafoa ma le 'aumaga ina ua a'e mai le tamaita'i o Sinaita'aga ma lona au-a-luma o le Siamupini o le Fu'a 2012.

E ui lava ina na'o le tolu ta'aloga o le 'au e tasi, sa tatau lava na lua ni a outou ta'amilosaga e talamasenia ai le outou galagala i le fia ta'aalo, ae paga lea, e pule a le faimea i lona uto, pe sasa'a mai pe tu'u ai pea.

Na'o fa 'au kirikiti a tamaita'i na auai i le liki, o le Pisisami mai i Vaitogi, Aeto mai Pago Pago, ma le Alo-i-afi mai i Masefau ua pau na o 'au na i ai i lenei tausaga i le tatou liki.

Fa'amalo uma i 'au a tamaita'i i lenei tausaga, fa'amanuia atu le Atua ia outou faiva i lenei tausaga atoa, ma ia manuia le sisiga Fu'a 2012.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.