Login

ALATAUA & VAILOA - SIVA MA LE PESE FALELIMA I SISIFO

frostlehualani@yahoo.com
Olioli mai o kama’ika’i e le’i taitai lava nai teineiti, ae o le onomea latou e 100% fa’atafafa! [ata: Leua Aiono Frost]

O le pese ma le siva fa’asamoa lona lua, o le sao o le Falelima i Sisifo lea, ua saunia lelei mai ai le itumalo o le Alataua mo le latou Pese matagofie fa’atasi ai ma nisi fo’i teuteuga masani o fa’afiafiaga fa’asamoa ua masani ai le tatou atunu’u.

Peita’i, ua tofia fo’i e le afioga Satele Galu Teutusi, o le kovana Itumalo o le falelima i sisifo, le ausiva uiga ese mai Vailoatai, i le mea e afio ai le Satele o le Alo o Salamasina, afifio Alo o Fanene , susu ai Sa’o ma le Aiga Sa Tuiasina, ae palepuipui e le fetalaiga a le faletonu ma le falealili, o le a faia lo latou sao o siva Samoa e fa’aatoa ai tino o le fa’afiafiaga mai lea itu o le atunu’u.

“Ona o lenei vaitau ua a’ave tala o nei ituaiga o fa’afiafiaga i le atunu’u, o lea ua tatau ai ia te a’u o le fa’atama fo’i o le itumalo, ona tu’u i ai se avanoa e fa’afiafia ai e i latou le atunu’u atoa i le aso fa’ailogaina o le tatou fu’a!”

O sui nei o le falelima i sisifo, ua alo mai e fa’afiafia, o le Asosi a le ‘SOFIA.’ E le toe faia se tala i le fa’afiafiaga, ua mae’a silamio i ai le vaega o tusitala, ae ua fai mai i latou, “Aua, aua lava nei faia se tala, se’i latou va’ai i ai i le taimi e pa ai le pomu i le Malae i Tala o Lupelele!”

Ua usita’i nei le tusitala, aua e tau le mafai fo’i e upu ona fa’amatala le fa’afaifiaga lea, ua lava saunia i latou uma e silia ma le 100 o tama’ita’i lalelei e su’eni le aulapa tai ma le aulapa uta i tu ma aga fa’afiafia a le atunu’u.

I le agaga o le fa’afetai na saunoa ai se tasi o i latou nei e fa’apea, “Ona o le fa’aaloalo ua maualuga ia i matou o fanau e matele ina tau le amana’ia ni o matou lagona, o lea ua matou fuli ai e faia le mea sili ua gafatia mo le fa’afiafiaga lenei. O le a tala measina ae se’i maimoa le atunu’u, aua ailoga e toe maua se isi avanoa i nisi tausaga a sau.”

‘Aua la e te talatu’u mai sou avanoa e te maimoaina ai, “Aue le Kovana e, ua e fa’afiti, e te le iloaina o se fana ta’avili!”  Le pese o le a fai ai le ‘ai a le vaega sese, ae se’i silasila le vaega sasa’o! Fai mai latou, “Iesu e, le uo alofa, na te tau’aveina a’u agasala, pe aisea lava?” Le isi lea fesili ua fa’alogoina e le tusitala o lo’o sisiva ai le vaega sese lea?

A maka e le tusitala le fa’afiafiaga lea, ua moni uma lava nei mea ua latou folasia! Ae se’i e fa’alogo i si ana fa’ato’ese, e toe sau ai i le laina sa’o! E moni lelei, e sese uma a tatou!

O le Komiti o lo’o latou va’ai toto’a i lenei fa’afiafiaga ma fautuaina fo’i le fanau i faiva ma aga o fa’afiafiaga, o lo’o  tutula’i mai ai le afioga Leota Joyita Satele, Liupapa Laumoli, Tualatai Laumoli, Mau Laumoli ma Ms. Tupea.

O i latou na a’oina le siva lenei e aofia ai: Oloa Maea, Mealai Laumoli, Maria Fatu, Jason Laumoli, Jr. Laumoli, Valo’aga Vui ma Arona Nagaseu i le Okeni ma le ali’i o ,Niu Palemene, fa’atasi ai ma le fesoasoani tele a Berta Laumoli, Tu’umasina Tui, LiutoriaToetu Siagigi i le tulaga lava o pesega ma le fa’aili. O lea fo’i fa’atasiga, sa to’ia fo’i le fa’atasiga i le a’ao mafola o le tama’ita’i o Solo Tui ma Saileifi Uli, fa’afetai.

Mai le vaega o le Pese, lea e tapena mai e le Alataua, ua fa’ailoa mai ai e le tofa le tauto’oto’o Liua Pisamoa, “Ua mae’a ona tapena e Alataua le pese o matua pese, e le ta’ua atu fo’i le fe’au o i ai i le pese, se’i o’o lava i lea aso ona sofa’i lea e le pese le agaga o tagata o le malo lenei.”

O le aufaipese ua fa’ailoa mai e silia ma le 350 tagata, peita’i, ua toe manatu le vasega o Tauto’oto’o o le itumalo Alataua, “e toe fili mai le muia’a, aua le faiva i la po’o le timuga, ina ne’i i ai ni fa’aletonu e fa’alavelave i le aso o le Malo, ae o le sao o le Alataua.”

O lea aufaipese e laeia atoa le toniga i le fa’ata’ita’iga o le aso To’ona’i ma o le toe fa’ata’ita’iga lea, sauni mo le taimi e pepese ai i luma o le atunu’u i le Malae i Tala o Lupelele.

“O le Alataua, i le afifio o Fa’asisina ma Alaala Matuatala, le susu o Tauto’oto’o ma Upu i le Alataua, ua masani i faiva ia, e uma loa le fa’ata’ita’iga lea i le aso To’ona’i ona taoto ai lava lea o le fa’amoemoe se’ia fa’ato’a fa’aalia lava i le taimi o faiva i malae, o le fa’ailo lena, o lo’o ua loa ona saunia le sao mo le aso fa’amoemoeina, ua fa’atuai mai le taimi!” O se tala ‘ata lea a le tofa Liua Taifane Pisamoa.

Ua fa’ailoa mai fo’i le a’o pese ole tofa Malaeti’a o le alo o Toilolo mai Fa’ilolo o le tama fanau lava a le Alataua, ma o ia fo’i lea o le a aiaiuli i le pese a le Falelima i sisifo. O le komiti o lo’o sasao mai ai le  vasega o Tauto’oto’o le tofa Liua, tofa Faletogo, Tofa Maugaotega, Tofa Gago, tofa Noa ma le Tofa Savali Talavou Ale le tatou Fofoga Fetalai o le Maota o Sui o le tatou Fono Faitulafono.

O le tapese o le susuga Su’e. O le tausaga lenei, ua leai se o manatu e fa’aalia se fe’au taua o latou pese o a’oina, ae ua fa’ailoa mai, “afai e te fia iloa, oso i totonu o le li’o, auai i le aufaipese, a le o lena, fa’atali se’i e fa’alogo lava i ai i le taimi o usuina ai!”

Ia faifaimalie ou faiva Alataua ma Vailoatai!

O lenei auaunaga ua mafai ona auina atu i le lagolago malosi mai a le kamupani a le KFC i Tafuna.  O le a mafai ona auina atu ai ausiva ua nofo sauni ma tapenapena aua fa’afiafiaga mo le Sisiga Fu’a a Tutuila ma Manu’a i le Aso Lua, Aperila 17, 2012 ma le Aso Lulu, Aperila 18, 2012.  O le a mafai ona lomia e le Samoa News/Le Lali ia ni tala ‘oto’oto e tusa ai ma tapenapenaga a nei ‘ausiva.  O le aso ananafi na amata ai lenei tautua, e ala i se ripoti i le tapenaga a le Manu’atele, lea ua sauni mai ai le motu o ‘Ofu.  Ma o le a fa’aauauina lenei tautua se’ia maea ona aloaia uma a tatou ‘au siva, e aofia ai au fa’afiafia mai i Pule ma Tumua.  E momoli atu ai le fa’afetai i le pulega a le KFC ma le aufaigaluega, ona o le sapasapaia o lenei auaunaga, aua le fofoga faitau a le atunu’u.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.