Tula’i Ta’ita’i i le Vaega Fa’aupufai Tautua - Fa’amasinoga

O se mea e ofo ai, ona o sailiga o fa’amatalaga, e o’o ai lava tagata i le Fa’amasinoga, ma ua le fa’atafa lava lea tulaga i e sa tutula’i e avea ma ta’ita’i o le Vaega Fa’a -Upufai a le Tautua i le Palemene a Samoa.

O le sa avea ma Ta’ita’i o le Tautua Party, Va’ai Papu Vaelupe Va’ai, ua toe tula’i nei e tali i ona moliga, e fa’apea ai, sa ia togitupe le mafutaga a tina o le SPBD i Asau ina ia palota ia te ia, e fa’aauala atu i lona tuafafine o Fo’ilagi Masoe.

O le fa’alua ai lea ona tula’i Va’ai Papu e tali i nei moliga i luma o le fa’amasinoga, ae o lea o le a toe o’o i le isi palotaga a le Malo o Samoa. O le taeao o le aso Lua i Samoa lea na faia ai lea iloiloga, peita’i, e le o malie lava le fa’amasinoga i fa’amaumauga o tu’ua’iga, ae maise o le iloiloga e ao ina taga’i toto’a ma fa’afofogaina e i latou e fa’ato’a faia ai se fa’ai’uga a le fa’amasinoga i le ali’i ta’ita’i o le Tautua Party.

A’o le’i fa’atautaia e le susuga le Fa’amasino Mata Tuatagaloa le iloiloga o lana afioga Va’ai Papu, sa fesiligia e ia se lagona o itu na lua o le fa’amasinoga, ona o lona tulaga i le ua molia, e i ai le la’ua so’otaga tau aiga, e vavalalata lo la’ua so’otaga ma le to’alua o le ua molia, Va’ai Papu Va’ai.

Peita’i, ina ua mae’a le malologa pu’upu’u e faia ai se fa’ai’uga a le ali’i ma tama’ita’i loia o lo’o tutula’i mo itu na lua o le fa’amasinoga, sa toe tula’i mai lava le tama’ita’i fa’amasino, Mata Tuatagaloa e fa’aauu iloiloga o le ta’ita’i o le Tautua Party.

Na fa’aauau le iloiloga i le aso Lulu, ma na fa’ato’a folasia ai e Va’ai Papu le mea tonu na tupu. Na ia fa’amatala:

“O a’u na ou aitalafuina le tupe mai lo’u tuafafine, le ua molia fa’atasi i ma’ua i lenei mataupu. O le tinoitupe fo’i sa va’ai tina molimau i lenei fa’amasinoga o ou taua’aoina i lo’u tuafafine, o le toe totogi lea o le seleni sa ia aumaia mo lo’u mana’omia, o le fa’atupega o lafo mo le nu’u o Auala ma Vaisala ia tesema 23, 2010.”

O le tinoitupe na nono mai e a’u i lo’u tuafafine, sa ia toina mai lea i le tupe mo nogatupe ma toe pasene a le SPBD, peita’i o le aso na fa’ato’a ou taua’aoina ai le tupe i lo’u tuafafine o Ianuari 4, 2011 ma o lea na va’ai uma ai nei tina o ou faia lea tulaga.

O loia o lo’o tutula’i mo Va’ai ma lona tuafafine o Fo’ilagi Masoe, o le ali’i loia o Papali’i Ta’eu Masipa’u ma e i ai ana loia fesoasoani e aofia ai, Precious Chang ma Tanya Toailoa. Ua molimau Va’ai, “ O lea tupe e matua leai se so’otaga ma sa’u taumafaiga i le tofi o le itumalo i le palemene.”

O le mafuaga o le o’o atu o ia i le aso 4 Ianuari e fa’ao’o le tupe i lona tuafafine, ona o le aso lea o le fonotaga a tina uma lava o Auala ma Vaisala, ma e mo’omia ai se vaega tupe e ao ina fa’a’aitalafu atu e tina mo le toe totogia mai fa’atasi ma latou pasene i le isi fonotaga o soso’o.”

“Ina ia o’o le tupe i lima o Fo’ilagi, sa ou mautinoa muamua lava e alu le matou malaga ta’amilo i Savai’i, le vaega fa’aupufai a le Tautua lea.  Na ou saunia na’o le afa o le tupe sa ou nonoina, e $500.

O lea se finauga a tina o le nu’u lea e molimau i lo’u taua’aoina o lenei seleni i lo’u tuafafine, “e le o iloa e a’u latou, pe o le a se isi fa’aupuga na faia i lea tupe, ae le’i fai atu fo’i se tala a le ta’ita’i o le Tautua, amea e faia ai se mea’ai, e leai lava!”

O Fo’ilagi o le peresetene o lea mafutaga a tina, ae ina ua ia umia le tupe mai lona tuagane, sa ia faliu ane ma taua’ao se vaega i le failautusi ma fa’ailoa i ai, o le tupe mo se latou aisikulimi. Peita’i, na ala ona mafua uma nei fa’aletonu ma le pisa ua o’o mai i le fa’amasinoga, ona ua toe o’o mai se fa’amatalaga a le to’alua o Fo’ilagi, ua ia fa’ailoa ai, o le alagatupe lea sa taua’aoina mai e Va’ai.

O le tali a Fo’ilagi i lea folasaga mai se tasi o tina, sa ia fa’ailoa ai, “O lo’o i ai i tatou uma i luma o le malaga ta’amilo a le Tautua, e le mafai ona ou fai atu se tala e seu ai lo’u to’alua o lo’o ia faia mai se tala mo le tatou mafutaga, na ala ai ona ou le fai atu ia te ia.”

Na tufaina se vaega o lea tupe i le aso lea, ma toe fa’atau ai le aisikulimi e pei ona folafola ai e fa’atau ai. E fa’aauau lea fa’amasinoga ona fa’ato’a maua mai lea o se fa’aiuga a le fa’amasinoga i moliga o le ali’i sa ta’ita’i i le Tautua Party.

saunia: Leua Aiono Frost