Login

Tusi Fa’alauaitele i le Fono 2: “Saili se vai fofo tumau ma le tonu”

Avea lenei avanoa e molimoli atu ai la’u fa’afetai ma le fa’amalo i le Senate, i lana fa’ai’uga mae’ae’a ma le tonu na folasia, e ala i lana palota “leai” i pili taufa’aofi a le malo e pei ona alo atu iai i lena vaiaso ua tuana’i.  Fa’amalo fai o le faiva, fa’amalo ta’ita’i alofa.

Avea fo’i lenei avanoa e fa’asoa atu ai ni manatu i le galuega o faia nei e le Maota o Sui, i lea lava pili taufaaofi.  I lipoti a le au faasalalau ua maua ai ua faa’ofu e le Maota lea pili i se ofu fa’amanu, i ni a latou suiga i le pili, ma le fa’amoemoe e pasia ma fa’aauau atu ai lona iloiloga i le Senate.

I molimau a le au faipisinisi, e latou te le sapaia le pili taufaaofi a le malo ona e ono afaina ai tupe maua a pisinisi ma oo atu ai i se tulaga e vaea ai tagata faigaluega.  A vaea le tele o tagata faigaluega ona faapea foi lea ona oo nai nei aiga i se tulaga fita ma le faigata o le olaga.  I le ma le isi, e talitonu le au faipisinisi e le oo ni tupe maua mai le pili taufaaofi i le tulaga ua fuafua le malo e maua e toe totogi ai le nonoga tupe lenei, e fa’atupeina ai le polokalama mo gasegase siitia i fafo a le LBJ. 

Na sa fa’apea foi ona molimau le teutupe a le malo, le susuga i le sa’o ia Magalei, ina ua fa’afesiligia, ua tau le lava tupe maua mai i lafoga o aoina i luga o le uafu, mo sikaleti ma ava malolosi, e toe totogia ai le tupe nono muamua a le malo ($20 miliona) lea na faia i le pe a ma le lua i le tolu tausaga ua tuana’i.  O le molimau lenei a Magalei ua sapasapaia ai le molimau a le au faipisinisi, e le oo ni tupe maua e totogi ai le nonoga tupe fou lenei a le malo ($10 miliona) e pei ona fuafuaina; ona o lafoga lava ia o lea e totogi ai le nonoga tupe muamua.

I se vaaiga fa’alemafaufau, e pei o lenei pili taufaaofi e foliga mai o se taumafaiga faanatinati, e aunoa ma ni fuafuaga maumaututu, ona o ni itu nei e tolu.  Muamua, sa toe fa’atopetope le suiga o le faamatalaga o le pili taufaaofi ae ua uma ona tu’uina atu aloaia le pili I le fono mo lana iloiloga- e aveesea mai ai le lafoga fa pasene (4% wage tax) mai le pili taufaaofi.  Lona lua, sa le mau manatu le alii loia faufautua a le kovana, ina ua fesiligia i le vaega o le pili e siitia ai laisene faipisinisi mo kamupani i le $2000 i le tausaga; ma lona tolu, o le o gatasi lea o le molimau a le teutupe a le malo ma le molimau a le au faipisisnisi e le palani tulaga o tupe o le a maua i nei faiga ma le aofai ua fuafua e le malo e maua mai i lafoga nei e pei ona ta’ua I luga.  E foliga ua fa’apopoleina le teutupe a le malo i lea tulaga ona o le ono oo o nei faiga ise tulaga e to’omaunu ai le totogina o nonoga tupe nei mai le litaea a le malo; ona o le teutupe a le malo, o ia foi o se tasi o le komiti fa’afoe o le litaea a le malo.

O ia la tulaga sa tupu ai so’u lagona o le a otometi ona teena e le Maota o Sui lea pili a le malo, e pei ona teena e le Senate.  Ae peita’i, ua feula pea le motumotu e le Maota of Sui i le faia o ni suiga i le pili ina ia paasia ma molimoli atu ai loa i le Senate mo le latou iloiloga i suiga a le Maota.  I se va’aiga fa’alemafaufau i suiga ia a le Maota pe a tu’u fa’afegai ma le pili a le malo e pei ona faauluina mai ai, e maoa’e le tomai ma mafaufau o le Maota nai le tomai ma faiai na fausia ai le pili taufaaofi a le malo.  Ae peita’i, poo a lava teuteuga a le Maota e toe fai, e le mafai ona suia i le lelei se pili taufaaofi e sameme solo lona fa’avae, ma fa’ailoga fesili lona taunu’uga ma fa’amoemoega, ona e aunoa ma ni su’esu’ega maumaututu e atagia ai lo latou alofa moni i le loaloa o le atunuu.   O le upu moni, o le ulupo’o lava ia o le ulupo’o, e le masuia.

 

Ma ua fa’atupula’ia ai ni fesili taua e tatau ona fa’atalanoaina ma fa’amalamalamaina e le Maota a’o fa’aauau le latou galuega.  Muamua, a pasia le pili e sui a’i le pili a le malo ma avea ma tulafono, o fea e toe maua mai ai tupe e fa’aauau ai le tautua a le LBJ mo gasegase siitia i fafo pe a mae’a le $2.4 miliona pei ona iai le suiga a le Maota (mai le $10 miliona)?  O lenei pili ma suiga a le Maota o se atina’e tumau e faaauau ai pea le nonoga tupe I tausaga taitasi aua gasegase siitia I fafo?  Poo se faiga mo lenei tausaga e tasi ona o lea e loma le palota a le atunu’u; a uma foi ona tatou toe se’e lava lea I tulaga masani o le leai o se tautua mo gasegase siitia I fafo, se’i aulia foi le isi fa tausaga? Pe aisea o fuafua ai le Maota e tiposi le nonoga tupe lenei I le tusi tupe a le malo ae le o le tusi tupe a le LBJ?  O iai se fuafuaga a le malo ma le Maota e sui ai le pulega ma le fa’atautaia o le tautua mo gasegase siitia i fafo mai le LBJ i le ofisa o le Kovana?  A fa’apea o le sa’o lea, pe ai sea?  Pe ao foi ona faaauau le fai fua o lenei tautua, pe atonu ua oo i le taimi e lafo maa uma iai le atunuu i totonu o lenei atina’e poo le tautua?

Ua loa tausaga o leai se tautua mo gasegase siitia i fafo ona o le leai o se tupe sa fa’aagaaga mo lenei tautua; ma i lea vaitau sa mafatia fifilemu ai lava nai nei tagata, ma oo ai ina uma le soifua o nisi.  Ana lagona leo o nai tagata nei atoa ai ma leo o aitu o e ua fai i Pulotu le folauga, oute talitonu o se tau’alaga a Solomona i taitai o le malo ina ia saili se fofo tumau ma le tonu (fea) o lenei mataupu, ina ia aua ne’i si’i Prince ae toso Loimatamaligi.  A leai, ona sili lea ona tu’u; aua e tatou te taunuu uma lava i le uati, e tasi fo’i le taunuuga o le tuligasi’a o lenei olaga- o asoua, o aso folau.

Sa iai se ta’ita’i o le Maota sa fa’asoa i lana vaega fa’aupufai a’o talanoaina le pili lenei- “a sao atu a si ona ulu I totonu, ona faigofie lava lea ona sao atoa atu le tino o le kamela I totonu o le fale’ie”.  O nei upu fa’amalosi’au e fa’atatau i le fa’afaigata ona totogi o lafoga ma laisene e le au faipisinisi ma tagata lautele i le amataga, ae i’u lava ina malu le tai ma masani ai lava pe a mavae ni nai masina.  O le tima’iga foi lea a le Kovana ina ua fa’aulu mai ana pili taufaaofi pei ona iai, ma sa ia toe tatao mai ai i lana polokalama o le aso To’ana’i a se’i mavae atu nei.

O le fesili autu ua tula’i mai, poo nei faiga a le Maota o fa’avae i le alofa moni i le atunuu, poo le fa’apolokiki aua le palota o loma nei?  O le ave’esea o le lafoga fa pasene (4% wage tax) ma le tu’utu’u ifo o lafoga ma laisene o pisinisi, o se faiga ea e fa’afaigofie ai ona fa’aulu atu ai o le ulu o le kamela i totonu o le fale’ie; a o’o ina uma le palota, ona matua sunu’i atoa atu ai lea o lona tino tele i totonu?

I se vaaiga faa-le-mafaufau, e iloa ai ni uiga e taufa’amata’u ma fa’a-terorisi lona natula o loo lilo poo tanumia i totonu o nei upu fa’amalosi’au poo tima’iga; ae maise lava pe afai o nei pili taufa’aofi e le o fa’avaeina i luga o le alofa moni i le atunuu e ala lea i ni su’esu’ega maumaututu ma le soalaupule, e pei ona alia’e mai i molimau ua tau’a i luga.  Atonu o le ala foi lea ua tevateva solo ai le folauga fa’aatina’e a le teritori i le toafa, ma le ‘ausia ma sopo’ia le Vaitafe o Ioritana ma to’aitaunu’u atu ai i le nu’u na folafolaina; ona o polisi ma pulega “faa-Kamela”  ma “faa-Terorisi” lea ua tatou iai nei.

I se saunoaga a le alii Senatoa, o Dr. Fuata, o le mataupu lenei o gasegase siitia i fafo o se mataupu e faigata ma lavelave; ma ona o le taua tele o lenei mataupu e ao ai ona lava le taimi e soalaupule ai ma taunu’u ai i se polisi mautu ma le fea mo tagata uma.  Fetalai foi le Tofa i le Tootoo, le alii Senatoa ia Velega, pe aisea ua laga fa’atopetope-fa’a’alope ai lenei mataupu taua, ae ua loa tausaga o feoi nai tagata mama’i sa mana’omia lea tautua.  O ia folasaga atoa ai ma isi e atagia ai le fa’autautaga loloto a le Senate, o lea ua ta’atia ai nei so latou finagalo fa’a-ta’ita’i alofa ia toe saili le tofa, mo le fausia o se polokalama lelei, talafeagai, mausali, ma le fea mo tagata uma o le atunuu. 

O lea oute fa’alatalata atu ai i le Maota of Sui ma lo’u fa’aaloalo tele e tatau ai, ia faimae’ae’a le faiva o Pili, e fa’atino ai lo outou alofa moni i le atunu’u ae maise a outou tagata palota o itumalo ta’itasi o loo tapua’i ma tu’i mai le mulipapaga. 

Aua na saunoa lava lo tatou Fa’aola o Iesu Keriso a’o le’i maliu tiga i luga o le satauro ma toe afio manumalo i le Lagi, e mana’omia e le alofa moni ia ni fa’atinoga.  E mafai ona tatou tautala i le alofa i le aso atoa- e mafai foi ona tatou tusia ni faamatalaga poo ni solo e folafola mai ai, ma lagiina ni pese e vivii mai ai, ma lauga mai i sauniga e faamalos’auina ai- ae se’iloga ua tatou faaalia lena alofa i ni faatinoga, e le aoga a tatou upu ua na o se “apa memea taalili, poo se sumepalo tagitagi”.

Ia manuia le Eseta!

Soifua



Related