Login

Alofa: Fa'avae ai Aiga— Vaega 145

toasavili@yahoo.com

Ua ‘ata le toeaina ma tilotilo ane i si ona to’alua, e ui ina ua matutua, ae o lo’o iloa pea le mata manaia o Tagiilima. Ua toe ‘ata’ata Lameko ma ona mafaufuaga, “talofa e, i a Tagiilima, pe afai o le a o’o mai le vala’au, o le a le toe iloa ona foliga, ma ona uiga e na o le tau pe ai o lo’u fatu, ma tau oso ai lo’u toto maualuga.” Ua moeiina mata o Lameko ma lulu lona ulu, e le o iloa ane e Tagiilima le maligi ifo o ona loimata.

O Eteuati le fa’alogo gata, ua tula’i mai nei i se tulaga maualuga i lana galuega, o a fo’i ona uiga sa i ai i lona fia Sinilosa, ua amata ona tu’u ‘ese malie, ona o lona manatu, i fautuaga ma tima’iga lelei a ona matua, ae maise o si ona tina, ae fa’asilisili ai i le mafaufau o le tama le tala a lona tina e fai so’o ane i a te ia, “Eteuati, tago lava e fai le mea e vave ai ona e le iloa se mea.” E le galo i a Eteuati le fulafula o ona foliga, ina ua o’o i ai le a’ao malosi o lona tina.

Ua sauni mea uma mo le fa’aipoipoga a Lolesio, ma ua punoua’i nei Lameko ma Tagiilima e fa’amautu mea uma mo le aso fiafia o le la tama ulumatua o Lolesio. O  fuafuaga uma, sa taula’i pea le va’ai ma o la loto gatasi, ia lelei mea uma mo le aso fiafia o le la tama. E le i tu’u mamaina fo’i i le aiga o Tagiilima mai tua, le aso fiafia o Lolesio, e pei ona sauni nei i ai. Ua tagolima le aiga i mea uma, ua loto tetele fo’i, ua le toe loto vaivai, e pei ona i ai, i aso a’o soifua mai o latou tua’a. O aso ia e lafo so’o ai e le lo’omatua o Naomi le fa’aupuga e fa’apea, “Se loto tetele, soia tou te loto vaivai.” Ua le toe loto vaivai le aiga i aso nei, ua mautu mea ua, ua maua fo’i le nonofo fealofani ma pulupulu lima fa’atasi, aua fuafuaga lelei ma le mautu mo le aiga.

Ua toe talatalanoa nei le toeaina o Lameko ma le lo’omatua o Tagi ma toe mafaufau i lo la aso fiafia, lea na alo i ai o la aiga i tausaga e tele ua mavae. Na o la toe manatua fa’atasi le tulaga sa i ai, sa lagona le le tagolima, o a lava nai mea na maua, sa fa’atino ai lo la fa’amoemoe.

E ui fo’i ina sa utiuti le fa’asoa, ae sa o la va’aia ma o la molimau fa’atasi le sagisagi fiafia o tagata. Ua toe manatua vave nei e Lameko ma Tagiilima le tulaga sa i ai, o mea nuti uma ia sa fa’atino ai lo la aso fiafia. Ua tali e, ae sa o la lagona fa’atasi i lea taimi tulaga le loto fa’afetai, e ui ina fa’apea o mea nuti, ae sa maua le agaga o le foa’i ma loto malie, foa’i ma le alofa, foa’i ma le le toe mana’o i sona taui. O mea sa foa’i e le tagata i na vaitaimi, ua pau o se mea ua mafai, ona o le lima vaivai, ua talia mai ma le loto fa’afetai. O aso na o le mativa. O aso o le le tagolima. O aso o faigata. Peita’i, e le i tu’u maia ia aso faigata ina ia taofia ai i tatou, e leai, na tu’u mai aso faigata ia o le olaga, ina ia o tatou loto tetele ai, ma ia o tatou malolosi, e tali atu ma le le fa’alogologo tiga.

Ua le toe va’aia ni mea nuti i aso nei, ua na o mea atoatoa lava, o mea atoatoa la ia, lea o le a alo i ai Lameko ma Tagiilima, e fa’atino ai le aso fiafia o Lolesio Lameko Tagimaiala. Ua le toe va’ai ni mea ta’i ‘afa’afa, ua na o mea atoatoa lava lea ua o tatou va’aia i aso nei. Ona lagona ai lea o le loto ma le agaga fa’afetai o le tagata, ona o le tamaoaiga o lo’o fa’asoasoa mai pea e tausi ai le ola i lea aso ma lea aso.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.