Login

Falepuipui Julia Matau ae faanofovaavaaia lana tama o Andrea

reporters@samoanews.com

E tasi le tausaga ma le aso e tasi lea ua faasala ai e le faamasinoga feterale i Oakland i Kalefonia, le tina lea sa vaavaaia tulaga o tupe fesoasoani mai le feterale mo le Ofisa o le U’una’i Legal Service Corporation, i le falepuipui feterale, atoa ai ma lona toe totogia o le $159,763, ae o lona alo, ua faanofoaavaaia mo le tausaga atoa, faatasi ai ma le poloaina na te toe totogia se vaega tupe i le malo feterale.

O le aso 29 o Me lea ua poloaina ai e le faamasinoga feterale ia Julie Matau, e tatau ona ripoti atu ai i le toese e amata ona tuli lona faasalaga, i le maea ai lea o le fofogaina o a la faasalaga ma lana tama o Andrea Matau i le vaiaso nei.

O Julie na tali ioe i le moliaga mamafa o le faia lea o ni gaioiga tau faasese i tupe a le feterale, ae o Andrea na tali ioe i le moliaga mama o le gaoiina lea o tupe a le feterale.

E lata i le $160,000 le tupe na tuuaia e le feterale Julie ma lana tama na o la gaoiina, peitai i faamaumauga a le faamasinoga na taua ai e faapea, o le $128,000 o lea tupe sa alu lea ia Julie ma lona aiga, nai lo le tuuina atu i tagata e vaivai le tamaoaiga na aafia i faiga sau ma tulaga tau feusuaiga, lea na mafua ai ona faatula’i le tautua a lenei Ofisa.

Na talosaga le malo feterale i le faamasinoga e loka Julie mo le 30 masina, ae faanofovaavaaia lana tama mo le 12 masina, peitai i le faaiuga a le faamasinoga, ua poloaina ai lona tuliina o le tausaga atoa ma le asoe tasi i le falepuipui, 3 tausaga e nofovaavaaia ai, ma le ta’i 8 itula i le vaiaso mo le taimi atoa lea o le a faanofovaavaaia ai na te tuliina, na te faatinoina ai galuega mo tagata lautele.

Ae mo Andrea, e 12 masina lea  ua faanofovaavaaia ai o ia, e aofia ai le 6 masina e taofia ai o ia i lona aiga. Ua poloaina foi lona faatinoina o galuega mo tagata lautele i le umi e 8 itula i le vaiaso mo le umi o lana faanofovaavaaia.

O le ali’i loia lea sa fa’auluulu i ai le Ofisa o le U’una’i ia Wagner ua ta’usalaina i moliaga o le ave fa’agaoi lea o tupe a le feterale, lea ua fa’amoemoe e lau lona faasalaga i le aso 2 Aperila, i le faamasinoga feterale i St. Lousi, Missouri.

E ui e lei tuuina mai se tali a le loia a Julie o Elizabeth Falk ina ua fesiligia e le Samoa News e uiga i lenei mataupu, peitai i lana faafinauga sa tuuina atu i le faamasinoga, sa ia teena ai le faafinauga a le malo e faapea, e le o taliaina lava e le ua molia lana mea sese sa faia.

Fai mai Falk, na saini e Julie se tautinoga umi toe tele e faailoa ai le sese o lana mea sa fai, e ala i le faia lea  o gaioiga e aafia ai tupe a le feterale.

Fai mai Falk, sa iloa e Julie e sese le mea sa ia faia, o le ala foi lena e lei tuuina atu ai lenei mataupu e faamasinoina, ae ua faaiu i se maliliega e pei ona ia tali ioe ai i lona moliaga.

Sa teena foi faafinauga a le malo fai mai e leai se mea lelei na faia e Julie mo tagata Amerika Samoa, ao galue ai mo le U’una’i.

faaliliu Ausage Fausia



Related



Comment Here