Login

Fa’atali se avanoa o Vaitele Soi i fusuaga a Cameron ma Barrett

Satiamaalii Vaitele Soi ma Le Mamea Ropati Mualia ma Vaovasamanai Winston Peters. [ata: eventpolynesia.com]

O loo fa’atalia nei se tali mai a le pulega a Duco Events pe o tumau pea le avanoa o Vaitele Soi e fusu ai o se isi paga fa’apitoa o le fusuaga a Shane Cameron ma Monte Barrett o loo fuafua e faia i Aukilani i le aso 30 Me.

Fa’aalia e Pa’u Fereti Puni o le pulega a le Event Polynesia, “O loo taoto la matou talosaga ia David Higgins ma Dean Lonergan mo se avanoa o Vaitele e fusu ai i le fusi a le WBO Asia Pacific i le fusuaga a Cameron ma Barrett, ma o le ala lea o le auai atu o fa’atonu ma sui o le pulega a le Duco Events e maimoa i le fusuaga a Vaitele i le po o le Aso Faraile.”

Na manumalo Satiamaalii i le la fusuaga e ono ta’amilosaga ma le alii Samoa o Junior Iakopo i ai (majority decision); ua atoa ai nei le luasefulu o fusuaga fa’apolofesa a Vaitele, luasefulu manumalo, e leai se faiaina.

Peitai ua iai le popolega i le ono suia o lea tulaga ona o fa’aletonu na tulai mai i le fa’atinoina o le ta’aloga a Vaitele i lea po, ma e ono fesiligia ai lona gafatia o fusuaga tetele fa’avaomalo e pei ona tau sailia ai sona avanoa i le fusuaga a Cameron ma Barrett.

Fa’aalia e Pa’u, “O Vaitele o le ‘cruiserweight’ peitai na fusu i le aupaga ‘heavuweight’ i lea po ona o le leai o sana paga ma o se isi lea o fa’afitauli sa tulai mai. Masalo fa’atoa tolu ai lea o ni fusuaga a Vaitele ua oo i le ono ta’amilosaga mai le luasefulu o ana fusuaga fa’apolofesa; o se tulaga e lelei i se isi itu mo lona gafatia o fusuaga tetele tai sefulu lua ta’amilosaga.”

O Vaitele poo le tofa Satiama’alii o se tama fusu talenia tele, e malosi, e lelei le loto ma o loo talavou foi e pei o le toatele o tama fusu Samoa sa lautogia i ta’aaloga fa’avaomalo ‘amateur’.

Peitai e tele se aoga o fa’aletonu na tulai mai mo le siitia o tapenaga a Satiamaalii ma faiaoga i ana koleniga mo le fusuaga o loo fuafua i le fa’aiuga o Me.

Fetalai Pa’u, “O le lu’i o loo tuuina atu pea i tama fusu o loo vaaia e Event Polynesia e pei foi o Satiamaalii, o le koleni lea o maso o le mafaufau pe a fia oo i le tumutumu o faigamea a le lalolagi.”

Fa’aalia e Pa’u, “O le mafaufau e fa’atupuina le loto finau mo le mea silisili ae aua le maliegofie. O le mafaufau e fa’aputu iai silafia eseese e tua iai pe a oo ina faigata le taaloga. O le mafaufau e fa’amalosia le fa’amaoni i koleniga ae aua le fa’alogologotiga. O le mafaufau e fa’amanatu i le tama ta’aalo le taua o le amio pulea. O le mafaufau e fiu e fa’atumu e le tumu.”

Maualuga le tapuaiga mo Satiamaalii i lea po i le auai o le afioga i le Minista o le Malo o Samoa, Le Mamea Ropati Mualia fa’apea le Konesula o Samoa i Niu Sila, le afioga Faolotoi Reupena Pogi. E sili foi ona fa’afetaia le auai o le taitai o le vaega fa’aupufai a le New Zealand First, le afioga Vaovasamanaia Winston Peters ma le tamaitai faipule Samoa o le Palemene o Niu Sila, le fetalaiga Leaufa’amulia Asenati Lole-Taylor, o nisi na fa’atau pepa e fesoasoani e fa’atupe ai le fusuaga a Vaitele.

A o talia le fa’amautuina o le avanoa o Satiamaalii i le fusuaga tele a Cameron ma Barrett ia Me, ae ua olioli mai nei le aufusu fa’apolofesa a Samoa e auai i le ta’amilosaga a le Pasefika e faia Niu Sila i le Auckland Boxing Association stadium i le Aso Toanai, 28 Aperila 2012 lea o loo fuafua e fusu ai le alo o Samoa ia Warren Fuiava i le fusi o Niu sila i le aupaga Light Heavyweight.

O isi paga o le ta’amilosaga fa’avaomalo o le Pacific Rim Boxing Championship, e aofia ai Gogosina Ulutoa o Samoa e fetaui ma Clarence Tilman o Amerika i le aupaga ‘heavyweight’. I le aupaga ‘cruiserweight’ o le a fusu ai Saipeti Asiata o Samoa ma Temoo Temaititetahio o Tahiti, ae fetaui Francis Mamoe Tui ma Taito Raturere o Niu Sila. I le aupaga ‘super middlweight’ o le a fusu ai Iosia Nanai ma Junior Naliva o Fiti. O Michael Fonoti o Samoa e fetaui ma Johnny Singh o Fiti i le aupaga ‘welterweight’ ae o Tony Iapesa o le a fusu ma Tinitua Neagle o Tahiti.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.