Talia le talosaga a se alii pagota

Na i'u fiafia le iloiloga a se ali'i pagota na loka talu mai Tesema, ina ua talia e le fa'amasinoga sana talosaga, mo se avanoa e toe foi atu ai e tausi lona toalua ma lana fanau.  Ae na lapata'ia o ia e le fa'amasinoga, o le taimi lava na te toe solia ai se tulafono a le malo, po o tuutuuga o lona faanofovaavaaia, o le a le gata ina loka o ia i le toese, ae o le a toe faafoi o ia i le atunuu na malaga mai ai.

O le alii o Kosema Leafi, o se tagatanuu o Samoa, ua ta’usala i le moliaga o le umia faasolitulafono o ni vaega o mariuana, ma ua poloaina e le faamasinoga na te totogia se salatupe e $2,000, o se tasi lea o tuutuuga o lana faanofovaavaaia mo le lima tausaga.

Na faatoese le ua molia i le faamasinoga, ma sa finau foi lana loia o Leslie, ina ia faanofovaavaaia o ia, ae aua nei toe tuuina atu i ai se isi faasalaga faafalepuipui. Na taua foi e lana loia e faapea, o aso e 92 lea na taofia ai Leafi i le toese, ua tele se lesona ua ia a’oa’oina mai ai ma ua ia talitonuga ua lava lea faasalaga mo ia.

Na faailoa e lana loia, o Leafi, o se tama sa galue malosi mo le tausiga o lona aiga i le tele o tausaga. O ia o se tagata kamuta, o se tagata ekalesia e tautua ma le faamaoni i lana lotu, o se totino foi o le aufaipese a lana ekalesia, ma o ia foi o se tagata amio lelei e le’i solitulafono.

Na lagolagoina e le loia a le malo ia le talosaga a le itu tete'e, ae na ta'ua e le malo, o le tausaga e 2009 na tulai ai foi le ua molia i le faamasinoga ona o tuuaiga i le faaoolima, ma faanofovaavaaia ai e le faamasinoga o ia.

Na tuuina atu foi i luma o le faamasinoga mea molimau sa maua e leoleo i le tino o le ua molia, lea e aofai aai sikaleti mariuana e lua ma lana ato faafafa sa i ai ana mea faigaluega, o lana  pepa sikaleti, o lona mitiafu ma le tupe e $67.40.

Na fesili le faamasino sili ia Michael Kruse ia Leafi pe o le aiga lea e faatatau i ai lana talosaga e toe fia fo’i i ai, o lona aiga i Samoa, ae na tali le ua molia, o lona aiga iinei lea o loo i ai lona toalua ma si ana fanau.

E 5 tausaga na manatu le faamasinoga e loka ai Leafi i le toese, peitai o lea faasalaga o le a faamalumalu, ae o le a faanofovaavaaia o ia mo le 5 tausaga i lalo o poloaiga a le faamasinoga, ma, o se tasi o ia poloaiga e aofia ai lona tuliina o masina e 20 i le falepuipui.

Peitai o le tuliga o masina e 20 i le toese o le a taofi, fuafua lea i le usitai o le ua molia i poloaiga uma a le faamasinoga ua tuu atu ia te ia, e aofia ai le faasaina ona ia toe tagofia le ava malosi, fualaau faasaina pe toe soli foi se isi tulafono, a ia auai i aoaoga e fesoasoani ai i aafiaga o le ava malosi ma fualaau faasaina i lona olaga.

Na fautuaina foi e Kruse ia Leafi e faapea, o le taimi lava na te toe tagofia ai le pia poo ni mariuana, o le taimi foi lea e faatietie ai loa o ia i le vaa ma toe faafoi atu i Samoa.

Na poloaina e le faamasinoga le faatamaia o fualaau faasaina sa maua ia Leafi, ae o ana mea faigaluega o le a toe faafoi atu ia te ia, sei vagana ai le tupe e $67.40 o le a tuu atu i le faamasinoga e amata totogi ai lana salatupe.