Login

SA'ILIGA SIAMUPINI VOLIPOLO

frostlehualani@yahoo.com

Ua matua vevela le fa’asologa o ta’aloga faitaulia o le sa'iliga o le siamupini, tulaga lua, tolu ma le fa o le Ta’amilosaga Volipolo o la tatou Sisigafu’a o lenei tausaga. E lua mea manino lava o le a tupu i ‘au pito a luga nei e fa, o i latou fo’i o le a sa'ilia ai se siamupini o le sisigafu’a i lana Liki Volipolo Fa’avaomalo lea ua mae’a fuafuaina e fa’ataunu’u i le amataga o le masina fou.

E tusa ai ma se fa’apupulaga mai a le susuga Pio Gaisoa le peresetene o le ASVBA ua ia fa’ailoa mai ai, “O lo ua mautu mai e o’o mai ‘auvolipolo mai Samoa, Tonga ma Ausetalia i lea ta’amilosaga mo le sisigafu’a. Peita’i, o la tatou liki lenei e fa’auma nei i le aso To’ona’i e mautu ai ‘au a Amerika Samoa e ulufale i lea ta’amilosaga fa’avaomalo i le Volipolo.”

I le afiafi o le aso Lua ma le aso Lulu na fa’atautaia ai pea ta’aloga, lea na toe amata mai le sa'iliga o le to’avalu pito a luga i le aso To’ona’i o le vaiaso ua te’a.  O ta’aloga na faia i le afiafi o le aso Lua, na faia ai le ta’aloga mata’ina o le va o le Tap Boys ma le ‘au malosi a le All Sports. E lua lava seti na manumalo soso’o ai le All Sports i le la’ua lea fetauiga, ae na iloga ona tigaina le vaega lena i le malosi fo’i o le osofa’i mai a tama nini’i a le Tap Boys.

I le ta’aloga faitaulia fo’i i le va o le Fiafia Boys ma le Vaitele Boys, o ‘au sa tulaga lelei fo’i i ta’aloga a Pools, na iloga ai le malosi ua osofa’i mai ai le Vaitele Boys i le sa'iliga lea o le 8 pito a luga o lea liki.

E lua lava ta’aloga ia o lo ’o fa’aletonu lava le taumafaiga a le Fiafia Boys ma ua iloa ai, e fai si matutua fo’i o tomai o le fa’asoaina o le polo e tama siamupini o le tausaga ua te’a, le Vaitele Boys nai lo le ‘au a le Fiafia i lea fetauiga. Na ave uma fo’i e le Vaitele Boys a latou seti e lua mo lea afiafi ma mae’a ai ta’aloga faitaulia o lea aso.

O lo ’o ua fa’atalitali mai nei i luga o le Vaitele Boys ma le All Sports ae ua fa’ailoa mai e fetaui le Taumafai ma le Side Out po ’o ai e aga’i i luga i le to’afa maualuga, ae sa'ili le Filemu ma le Snow Spikers i le isi ‘au e aga’i i le to’afa i luga, lea e fa’ato’a fa’atautaia lea i le aso To’ona’i a sau nei ma mae’a ai le Liki Volipolo lea.

Afio ane i le Tafuna Gym mo sau tapua’iga o taumafaiga a lau ‘au volipolo, ma ia e sauni, pe mata o lau ‘au e masi’i ma le Siamupini o lenei tausaga!

Ua fa’amautu atili mai le auina mai o ‘au volipolo e lua a Tama’ita’i mai Brisbane Ausetalia, ma ua latou fa’ailoa mai, “O matou ua leai se mea e gata ai lo matou fiafia o le a matou auai atu mo le tatou Liki Volipolo i Pago, ae sili ai, se’i tulau’ele’ele fo’i le to’atele o i matou i laueleele o Amerika Samoa.”

O se tusi mai lea a le tama’ita’i o Evelyn Pule le fa’atonu ma le faia’oga fo’i o nei ‘au o le a masi’i mai a le “SONYX” a Ausetalia.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.