Login

Pule Fou A Le Iuni Lakapi a Samoa

Tama o le Manu Samoa i le latou taumafaiga i le Hong Kong Sevens. (ata: Barry Markowitz, 3/23/12, Courtesy Tri Marine and Samoa Tuna Processors)

Ua fa’alauiloa mai e le Iuni Lakapi a Samoa ua tofia se ali’i Samoae avea ma pule fou.  O ia lea o Fred Amoa o lo’o galue nei i Aukilani Niu Sila.

O Fred Amoa o se loia na galue I le ofisa o le loia sili a Samoa ina ua fa’au’u ma i’u ana a’oa’oga fa’a loia mai le Iunivesite o Aukilani tusa ma le ova ile 20 tausaga talu ai.  E fa tausaga na loia ai i Samoa alu ese loa ile 1992 e faigaluega ile ofisa o atu motu o le Pasefika i mea tau faiga faiva, ma le ogasami iHoniara ile Atu Solomona.  O Amoa e iai lona tikeri MA i tulaga o tulafono o le gataifale mai Malta.

Ina ua ma’ea lea galuega, sa avea Amoa ma loia sili o le malo o Nauru ile tele o tausaga ma sa ia va’aia fo’ima le matagaluega o le gataifale ma ona tua’oi.  Ile uma ai o lena auaunaga ile malo o Nauru na malaga atu lea i Niu Sila ma avea ai ma loia faufautua.

E iai lona uso i Amerika Samoa ole foma’iia Jeroma Amoa.  O le au uso na a’o’oga uma i le kolisi o Sanele i Moamoa ma e fa’amatua uma i la’ua i ta’aloga o le lakapi, tenisi ma le soka.  Op lo las tua’a, o le fofoga fetalai muamua lea o Samoa I lona fa’a to’a tuto’atasi o Amoa Tausilia.  E omai Fred ma Jerome Amoa I Aleipata ma Lotofaga.

E tusa ma le to’a valu i latou sa talosaga mo le avanoa o le CEO e aofia ai ma tama’ita’i e to’a tolu.  O Amoa na apalai mai Niu Sila a’o le to’atele e aumau iSamoa.  E le’i mailoa se taimi o le’a taunu’u ai Fred Amoa iSamoa ma amata lana galuega o le CEO a le Iuni Lakapi a Samoa.  

Ole suia fa’avavave o lenei tofi lea e umia e se tasi iloga i le lakapi i Samoa, Su’a Peter Schuster na mafua lea ini faitioga a le kapiteni a le Manu Samoa ma isi o le au e fa’asaga ia Su’a ma nisi ofisa o le Manu Samoa.

Ile uma ai o ta’aloga mo le Iup ole lalolagi lea sa faia i Niu Sila ia Oketopa o le 2011, na amata ai loa ona fa’asalalau i nusipepa e aofia ai ma le Samoa News, leitio ma TV faitioga e fa’atu ia Su’a, le pule o le au, Tuala Mathew Vaea, ma le sui ta’ita’ifono o le Iuni Lakapi a Samoa, Lefau Harry Schuster.

Fai mai le kapiteni, Mahonri Schwalger, o lana sui kapiteni, Seilala Mapusua, King George Stowers, ma isi tama sinia o le Manu Samoa, o Su’a, Tuala, ma Lefau ua latou le totogia tupe sa fuafua mo tama ta’a’alo pe’a uma a latou ta’aloga ta’itasi ile taimi o le ta’amilosaga o le Ipu ale lalolagi.  O nisi o fa’asea fai mai ua ave fua e latou nei ofu lakapi na fa’a agaga mo le Manu Samoa ia latou uo ma aiga ae le tufaina itama ta’a’alo.  

O isi tu’ua’iga ua ponaia ai Su’a ma le vaega ile faia lea o ni pati, ma inu pia ma pisapisao i fale talimalo na nonofo ai le Manu Samoa ua fai lea ma fa’alavelave i sauniuniga a le au ia latou ta’aloga.

Fai mai le kapiteni ma isi tama ta’a’alo, o Su’a nao atu e tafafao ae le’i o atu e fesoasoani i le taumafaiga o le fa’amoemoe ia i’u ma le manuia taumafaiga aua se manuia mo Samoa.

Ina ua maua e le palemia o Samoa nei tu’ua’iga mai tama o le Manu Samoa, sa nanati ai loa ona fa’asalalauina o avanoa uma o ofisa sinia a le Iuni Lakapi a Samoa.  Sa poloa’ina e Tuila’epa Lupesoliai Sa’ilele Malielegaoi o le ta’ita’ifono toe palemia o Samoa ia faia se su’esu’ega i tupe na fa’amealofa atu e tagata mai Amerika Samoa, Niu Sila, Samoa ma Amerika aua le fa’amoemoe o le au ale atunu’u mo le Ipu o le lalolagi.

E le’i nofonofo Su’a, Tuala, Lefau ae na tapena fo’i la latou kemupeni mo le fa’a leleia o latou igoa mai nei tu’ua’iga ua fa’asaga atu ia ilatou.  O lea sa fa’atalatalanoa ai le to’atolu nei i leitio, TV ma nusipepa e tali atu i fa’asea a tama o le Manu Samoa ua fa’asino ia latou.

Ile amataga o le tausaga nei a maua ai le liptoi ale au su’e tusi ma iloa e leai se fa’aletonu o le tala o le tupe a le Iuni Lakapi a Samoa i tupe na sa’ili mo le ta’amilosaga o le Ipuo le lalolagi.  I’u ina fa’ato’ese Tuala ia Samoa ia fa’amagalo lona tagata ini sese sa ia faia a’oia ta’ita’ia le au.  Sa iai se fa’asalaga a lona nu’u e matai ai o Leauva’a na faia ia te ia.

O Tuala ua le toe ta’ita’i au ae ua toe fo’i i lana galuega masani o le kolenia lea o le tupulaga fai mai a Samoa ile lakapi i nofoaga koleni ua saunia lelei i Alafua.

O Fuimaono Titimaea Dick Taufa, lea sa faia’oga mo le Manu Samoa I le taimi o le Ipu o le lalolagi o lo’o fa’atalitali fo’i pe nate toe mauaina le avanoa o le faia’oga ile au a le Manu Samoa.  O Su’a e le’itoe apalai ile tulaga o le CEO.  Fai mai a ia ise talanoaga ma le tusitala a le To’asavili, ua o’o fo’i ile taimi e tatau ai ona tilotilo i nisi vaeaga o le lakapi e fa’aaoga iai le taleni na tu’uina mai ele Atua ia te ia.

“O lea lava oute talavou ma o le’a fa’aaoga nisi o o’u taimi e atina’e ai le lakapi i tupulaga talavou o le atunu’u,” o lana tala mai lea ise talanoaga ile telefoni mai Apia ile aso Tofi.

Fai mai Su’a o tu’ua’iga ua a’afia ai nei lana galuega ma o le’a tula’iese mai ai, e le moni ma e le fa’amaonia fo’i.  “Oute le’i alu oute tafao iNiu sila.  Na ala ona ou alu o le fesoasoani ma galulue fa’atasi ma tama ta’a’alo imea latou te fia fai pe maua.  E leai fo’i nisi o lo’u aiga na tufa fua iai ni ofu lakapi ma ni pati sa matou pisapisao ai ma uo pei ona tu’ua’iai a’u ma isi.  O nei mea uma e ala mai lea ise tagatae to’atasi.  O le ali’i lea o Fatu ua ia fa’aoso’oso ia Mahonri ma tama o le Manu Samoa e fai nia latou faitioga ia te a’u ma le au Malaga ona e ita ia te a’u,” o le fa’asoa mai lea a Su’a.

Na fa’amalamalama mai e Su’a o Fatu Tauafiafi, o se tagata tusitala sa avea ma so’o upu a le Iuni Lakapi a Samoa ma sa i lalo o lana va’ava’aiga.  Sa iai se ela i lana tautua ma fa’amuta ai lana galuegha e Su’a i le Iuni Lakapi.

Ona alu lea o Tauafiai ma galue i le nusipepa o le Samoa Observer I Apia.  Mulimuli ane ina ua su’e se so’o upu a le Manu Samoa e malaga ma le au ile ta’amilosaga o le Ipu a le lalolagi na faia i Niu Sila ia Oketopa o le tausaga ua te’a, na toe ofi ai Tauafiafi i totonu o le Iuni lakapi a Samoa.

“E iai ni uo malolosi a Fatu  itotonu o le iuni na ala ai ona  toe fa’a faigaluega ai o ia ae sa ou te’ena lea faiga.  Sa maua fo’i lana alauni ile taimi na avea ai o ia ma so’o upu o le au.  O lona ita ia te a’u ina ua ou tulia o ia mai le galuega o lea na ia faia ai ni so’otaga ma le kapiteni ma tama sinia o le Manu Sama e tusi ni tusi fa’asea ile palemia ma nusipepa ia afaina ai a’u ma la’u galuega,” o le tala lea a Su’a.

“Sa le tatau ona tutupu nei mea aua o fa’afitauli na fegai ma le Manu Samoa, sa matou talanoaina ma le kapiteni ma isi ma toe teuteu mata’upu sa alia’imai.  O nei tu’ua’iga ua fa’alau iloa mai ua te’i ai lo’u tagata,” o le fa’aopo’opo mai lea a Su’a.

Fai mai Su’a e tele ni tama ta’a’alo o le’a fesoasoani iai i le taumafai ona maua ni konokalake e ta’a’alo ai i atunu’u ifafo.  “E le fa’apea o le’a mafai uma e tama ta’a’alo ona tui le ofu Olopeleki, le Wallabies ma le Manu Samoa.  O le’a ou fesoasoani malosi ilea tulaga e fa’alauiloa atu le latou taleni ile lalolagi.  Atonu e iai se aso ona toe fo’i mai lea ma ta’a’alo ile Manu Samoa,” ole tala lea a Su’a.

O Su’a o se tagata lauiloa ile lakapi ilona tulaga fulupeki a’o ta’alo ile Manu Samoa.  Ina ua litaea mai le ta’aloga sa avea o ia ma se tasi o laufali iApia.  E le’i umi ave tofi loa Su’a e fai ma faia’oga a le Manu Samoa ile taimi tonu na tofia ai Papali’i Peter Fatialofa nate kapiteni ina le Manu Samoa.

Ile tausaga 1991, na ta’ita’i ai e Su’a le Manu Samoa i fa’aga tama o le Ipu o le lalolagi na faia iEuropa.  O i’ina na fa’ato’a tofo ai le lalolagi ile saua ma le mata’utia o le pu’e, ta’alo ma toa o le tama Samoa.

E leiloa ele to’atele Samoa ina ua ta’a’alo ae ina ua uma le ta’amilosaga, ua pepese ma alalaga tagata ma maofa ise atunu’u la’ititi, fa’atauva’a, toe tino mimiti latou tagata ta’a’alo ae pei o le tagi male fe’ai o le liona i taimi o ta’aloga.

Na tulaga ono ai Samoa ile fa’atulagaga o au ale lalolagi ilena tauasaga.  Sa toe malaga Su’a ma le Manu Samoa i Aferika i Saute ile ta’aloga o le Ipu a le lalolagi ile 1995.  Ile toe fo’i i Samoa ole au na litaea ai Su’a ma le faia’oga o le Manu Samoa ae tula’i mai ai se tasi fa’amatua o le Olopeleki, le Samoa ia Tuifa’asisina Bryan Williams e avea ma faia’oga a le Manu Samoa.

Sa tele nisipolokalama na galue ai Su’a mai lea vaitaimi ile fa’aleleia o a’a’a’oga o le tupulaga ile lakapi.  Ile tausaga 2007, sa vala’auina ai Su’a e le Iuni Lakapi a Samoa e tula’i mai ile tofi o le CEO e suia ia Tuilagi Sapiele ua ale ese.

Na fesiligia Su’a ini matati’a na ia fa’atuina i lana lima tausaga a’o pule ile Iuni lakapi a Samoa.  Fai mai Su’a o le sini pito i sili o le siamupini lea o Samoa i le lalolagi atoa ile ta’ito’afitu ini nai tausaga ua mavae atu.   O isi matati’a o le faia’ina lea o Ausetalia ma le tulaga ua iai nei Samoa ua i luga o au e 10 ua au pito i malolosi o le lalolagi.  

“O Italia ma Sikotilani ua i lalo ane ile apefa’i o le fa’atulagaina o au malolosi ua ia nei.”

Na ta’ua e Su’a o le ta’amilosaga ile Ipu a le Pasefika lea e au atu iai le Manu Samoa ia Iuni e faia lea iIapani, o le’a fetaui ai Samoa, Fiti, Toga ma Sapani.  A uma lea ona malaga sa’o mai lea o le Manu Samoa i Apia e faia ai sa latou ta’aloga ma le au masi’imai Sikotilani ia Iuni 23.  

Fai mai a Su’a e ma’eu le aga’i i luma o le fa’aleleia o le ta’aloga lakapi a Amerika Samoa talu ona tula’i mai kovana Togiola Tulafono i le tulaga o le ta’ita’ifono.  “Matou te talatalanoa ma le kovana pe’a malaga mai i Apia i pisinisi fa’a lakapi ma e atagia mai ai lona sogasoga i lona taumafai mo le atina’eina o le lakapi mo tupulaga a Amerika Samoa,” o le tala mai le a Su’a.

Fai mai a ia ona o le’a alu ese ma le tofi o le CEO, o lo’o tau mafaufau pe tafao mai i Amerika Samoa ile vaitaimi o le fitu ale TMO Marist Pago lea e faia ile aso 13ma le 14 o Apelia.

“E manaia fo’i ia avanoa pupu’u e asiasi atu ai ile tou motu e matamata i ta’aloga ma feiloa’i ai i uo ua leva ona au mau i le Tutuila,” ole fa’amataga lea a Su’a.

 



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.