Login

Tala o Faamasinoga

ausage@samoanews.com

MAUA ISI ‘OVERSTAYER’ E TOATOLU

O se fusu’aga na tula’i mai i se inugapia a ni alii se to’atolu ma se tama’ita’i, i le fa’aiuga o le vaiaso na te’a nei i Nuuuli, na maua ai e le Ofisa o Femalagaaiga, le leai o ni pepa nofomau o leisi vaega, ma o lo o taofia pea i la’ua i le to’ese e fa’atali ai le aso e toe fa’afoi atu ai i lo la atunuu.

Na te’ena e i latou uma ua tu’uaia, e aofia ai Tumama Auva’a, Luisa Toelupe, Lualima Taulote ma Silimau Omeka, o latou moliaga o le fa’atupu vevesi ma le fa’ao’olima i le tulaga tolu.

E tusa ai ma fa’amaumauga a le fa’amasinoga, na fa’ai’u puta se inugapia a i latou nei ma ave atu ai se tasi o i latou i le falema’i e tau togafiti lona ulu.

E na o Tumama ua toe tatala i tua, ae o Lusia, Lualima ma Silimaua o lo o taofia pea i le to’ese e fa’atalitali ai le isi a latou iloiloga.

NOFOVAAVAAIA NI TAMAITAI SE TO’AFA

O tama’ita’i e to’afa mai Fatu ma Futi ia na tuuaia e le malo, i lo latou fasia o se tamaitai i le taimi tonu o le Aso Fa’afetai o le tausaga na te’a nei, ua fa’anofova’ava’aia e le Fa’amasinoga Fa’aitumalo i le vaiaso nei, ina ua ta’usala i latou i le moliaga mama o le fa’ao’olima i le tulaga tolu.

Ua toe suia mai moliaga o Serah Mauga, Evelyn Mauga, Le’alai Mauga ma Simaima Mila, mai i le moliaga mamafa o le fa’ao’olima i le tulaga muamua, i le fa’ao’olima i le tulaga tolu.

I fa’amaumauga a le fa’amasinoga, na manino ai le taofia uma o i latou nei i le to’ese, mo le silia i le ta’i lua vaiaso, ma ua manatu ai le fa’amasinoga o le a avea taimi ia e fai ma a latou fa’asalaga i lenei mataupu.

E tusa ai ma fa’amaumauga a le fa’amasinoga, sa taua ai e fa’apea, o lenei mataupu na afua mai ina ua fetalia’i se tasi o le to’afa ua molia ma le tamaitai na a’afia, i luga o le facebook, ma tulai mai ai  le vevesi ina ua agai atu le tamaitai na a’afia ma nisi o lona aiga, e ta’e’ele i le matafaga i Fatu ma Futi i le Aso Faafetai na te’a nei, ae o ane ai i latou nei e toafa ma fasi.

O nisi o poloaiga a le faamasinoga ua tuuina atu ia i latou e toafa ua nofosala e aofia ai le aua lea nei o latou toe taumafai e faafesootai le tamaitai na aafia, pe latou te toe soliina foi se isi tulafono a le malo, a ia auai i ni aoaoga faa faufautua e fesoasoani ai i le tulaga o le ita vave.

Ua poloaina foi e le faamasinoga le itu a le malo, ina ia faailoa i le tamaitai na aafia, e 19 isi matafaga i totonu o le teritori e mafai ona alu e taele ai, e ese mai lo Fatu ma Futi.

TETE’E LE ULUALII I MOLIAGA A LE MALO

O le ulugalii lea ua tuuaia e le malo i le sasaina o le la tama teine i le vaiaso na tea nei, ua faatulaga e le faamasinoga le la uluai iloiloga e faia i le faaiuga o le masina nei, ina ua la teena moliaga faasaga ia te i laua i le vaiaso nei.

E tusa ai ma fa’amaumauga a le fa’amasinoga, na sasa e le tamaloa lona afafine i le le usita’i, ae oso atu ai ma le tina o le aiga ma le seleulu ma oti le ulu o le teineititi.

O lo o taofia pea le tamaloa i le falepuipui i le taimi nei, ina ua le mafai ona ia totogia le tupe sa fa’atulaga e tatala ai o ia i tua, o lona toalua o lo o tatala pea i tua e vaai lana fanau laiti, ae o le teineititi o lo’o nofo i se tasi o latou aiga.

Ua poloaina e le faamasinoga le ulualii ina ia aua nei o la toe taumafai e faafesootai le la tama i soo se auala, ma ia tausi le filemu i lo latou aiga i taimi uma, ao faagasolo ai taualumaga  o lenei mataupu.

TALOSAGA LE ALII LEOLEO E SOLOFUA MOLIAGA FAASAGA IA TE IA

Ua i luma nei o le Fa’amasinoga Fa’aitumalo se talosaga a se ali’i leoleo, o lo o tu’ua’ia i lona fa’amata’u i lona to’alua, ina ia solofua moliaga fa’asaga ia te ia.

O le aso 29 o Mati lea ua fa’amoemoe le ali’i fa’amasino ia John Ward, e lau ai le fa’ai’uga o le fa’amasinoga a lenei ali’i.

O le vevesi i le va o le alii leoleo ma si ona faletua, na afua mai ina ua foi atu le fafine i le vaega sa tu ai lana taavale ma ia iloa ai, ua leai lana  pepa tala tupe (ATM card) sa i totonu o lana ato lea sa i totonu o le taavale, o lea na ia faafesootaiina ai loa lona toalua ma fesili i ai poo fea lana card, ma faia ai loa e le ua molia se tala i lona toalua, pe manao e sau e fana o ia, e pei ona tuuaia e le malo.

O faaupuga ia na fefe ai le fafine ma ia faafesootaiina ai loa le ofisa o leoleo e tusa ai o faamatalaga a lona toalua, ma sailia ai loa e leoleo le ua molia, fesiligia e tusa o le mea sa tupu, mulimuli ane ai taofia o ia i le toese i le po lava lea.

O loo tumau pea ona galue le ua molia i le ofisa o leoleo i le taimi nei, ae ua poloaina o ia e le faamasinoga e aua nei ona umia ni aupega malolosi, aua nei ona toe soliina se tulafono pe taumafai foi e toe faafesootai lona toalua i soo se auala.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.