Login

Lagolago malo le tatau lea ona toe fa’afo’i fanua o aiga

ausage@samoanews.com
Le loia sili ia Fepulea’i A. Ripley (itu agavale) ma le tofa ia Nanai Afuola (ata AF)

E ui na taua e le Loia Sili ia Fepulea’i Ripley ma le Sui Failautusi o le Ofisa o Mataupu Tau Samoa ia Nanai Afuola, lo la lagolagoina o le pili lea ua taoto i luma o le maota o sui, e toe faafoi atu ai fanua a aiga ua le toe faaaogaina e le malo, peitai na la taua, le tatau foi ona vaavaai alofa nei aiga, i le malo, i le tau sailiga o nisi alagatupe e atina’e ma faaleleia ai ana tautua mo le atunuu.

O le tulafono taufaaofi lea a le  maota o sui na faaulufale e afioga i alii faipule ia Vaamua Henry Sesepasara ma Tapumanaia Galu Satele Jr.

O le aano o lenei tulafono o lo o taua ai e faapea, afai e i ai ni vaega o fanua o aiga sa tuuina atu mo le malo, ae ua le fa’aaogaina e le malo i le mafuaaga na foa’i atu ai ia fanua, e tatau ona toe faafoi fanua o aiga e faaaoga mo nisi atina’e aoga.

Na saunoa Nanai e faapea, o se tasi lenei o mataupu tuga e masani ona o’o atu i luma o le Ofisa o Mataupu Tau Samoa, ma e umi se taimi e lalafo i ai le Ofisa ma sui o aiga i le tau faatoa filemuina o faafitauli e tutupu mai ai.

“Ou te lagolagoina le aano o le tulafono, pau le itu e ao foi i le Fono ona toe silasila toto’a i ai, afai ae manaomia e le malo ni fanua e tua i ai i le lumana’i, o fea o le a sulu i ai le malo pe afai o le a toe faafoi fanua o aiga,?” o le saunoaga lea a Nanai.

Na faatepa e Nanai le komiti i fanua a lona aiga lea foi o lo o faaaoga e le malo i nisi o fuafuaga, ma e ui e le o le mafuaaga tonu lea na ala ai ona tuu atu e tuaa eleele o le aiga i le malo, peitai o lea ua fausia ai se tasi o atina’e aoga a le malo e pei ona i ai le faleaoga i totonu o le latou nuu.

O le lagona lava foi lea o le loia sili ina ua ia saunoa e uiga i le aano o le tulafono. Saunoa Fepulea’i, e ui na te lagolagoina le toe faafoi atu o fanua a aiga pe afai ua le faaaogaina e le malo, ae tatau foi i aiga ona vaavaai i mataupu faapenei aua o fanua nei e tua i ai le malo.

Saunoa Fepulea’i, o le malosi o loo uu e le malo i le taulimaina o mataupu faapenei, aemaise ai lava pe afai o le a maua mai ai e le malo se vaega tupe mai le fanua lea e fesoasoani ai i le tulaga manuia mo aiga.

O se tasi o faataitaiga sili na tuuina atu e Tapumanaia e faatatau i fanua ua ese le auala ua faaaoga i ai, o le fanua lea o loo fautuina ai le Bowling Alley i Tafuna. Fai mai Tapumanaia, e ese le faamoemoe na mafua ai ona tuuina atu le fanua lea mo le malo, peitai e lua pisinisi ia ua fausia ai i luga i le taimi nei, e aofia ai ma le fale e faatau atu ai ma pia, peitai i lalo o le tulafono o loo faasaina ai le faatauina atu lea poo le taumafaina foi lea o se ‘ava malosi i soo se fanua o le malo.

E lei tali le loia sili i le mataupu lea, pau lana saunoaga, e le o ia te ia aiaiga o le feagaiga e uiga i le fanua lea, ae atonu o loo i ai se aiaiga e aofia ai ma le faatuina o le falepia e pei ona faasea i ai le alii faipule.

Na aumai e le alii faipule ia Larry Sanitoa le mataupu tau fanua i Fagaima lea o loo vavao ai nei le aiga ma le malo e fai ma faataitaiga o le mataupu lenei, peitai na fautuaina e le loia sili le maota ina ia faatuatuana’i mataupu ma tulaga ua tuana’i, ae agai i luma galuega mo se manuia o le atunuu.

O is atugaluga mai faipule, o nisi o fanua ua penefiti ai tagata ma pisinisi, pe afai e lisi atu e le malo i le kamupani le fanua i le $10 i le masina mo se faataitaiga, ae nofo le kamupani tua lea ma toe lisi le fanua lava lea i le isi kamupani i le $2,000 i le masina, o lona uiga o loo tele atu le tupe a le kamupani tua o loo maua i le fanua nai lo le malo.

Saunoa Nanai, o le tiute o le fono o le vaavaai lea o auala e manuia ai le malo ma le atunuu, afai e silasila atu le fono o le fanua lea e maua ai se isi vaega tupe mo le malo, saili auala e mafai ai ona faataunuu lena fuafuaga.

Ua taoto atu nei le pili i le komiti mo sana faaiuga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.