Login

Silia 40 faiaoga fou ua fa’a faigaluega Ofisa Aoga

ausage@samoanews.com

Na fa’amaonia e le taitaifono o le Komiti o Aoga a le maota i le Aso Faraile na te’a nei e fa’apea, e tusa ai ma se latou fonotaga ma le Pulega o Aoga a le malo, ua fa’amaonia ai le silia ma le 40 faiaoga fou, na tau sa’ili mo a’oga a le malo.

E lei faailoa e le afioga ia Lemapu Suiaunoa Talo po o ai aoga ua fa’amanuiaina i faiaoga fou nei, pau lana saunoaga, ua mae’a ona foia le fa’afitauli na tulai mai i totonu o a’oga, i le le lava o faiaoga.

O lea fa’aaliga a Lemapu na tu’uina atu i le taimi tonu lava sa vavao ai le komiti o Fa’agaioiga o le malo, a le maota o sui, ina ua le o’o atu le Fa’atonu o le Matagaluega o Tagata Faigaluega a le malo, ia Evelyn Vaitautolu Langford, i se iloiloga sa fa’ataunu’uina.

Saunoa Lemapu e fa’apea, atonu ua aoga le le fa’ataunuuina o le iloiloga sa fuafuaina ma itu ua fa’ataunuuina ai loa le faa faigaluegaina o faiaoga.

Ae i se tusi na tu’uina atu e Langford i le taitaifono o le komiti o Faagaioiga a le maota o sui ia Faimealelei Allen, sa ia faamaualalo ona o le fa’aletonu na tulai mai, lea na mafua ai ona le o’o atu i le iloiloga.

O le iloiloga a le komiti na fa’atulaga i le aso 28 o Fepuari, peitai e lei auai atu i ai le tamaitai faatonu, ma, na avea lea ma itu na le fiafia ai le toatele o sui o le komiti e o’o lava foi i le taitaifono ia Faimealelei.

Na faamaualalo Langford i le alii faipule ma ia fa’ailoa atu i ai e fa’apea, o se fonotaga taua sa faia i San Francisco a le Federal Region Council na fa’atasi atu i ai, ae ua mae’a foi ona ia faailoaina atu i le ofisa o le kovana fesuiaiga uma e aofia ai ma le tofiaina o lana sui faatonusili e auai atu e fai ma ona sui i luma o le komiti.

Na ta’utino Langford i lana tusi, o se taimi muamua lea ua ia misia ai se iloiloga a se komiti ua valaauina i ai o ia.

Fai mai Langford, sa maua foi le avanoa la te feiloai ai ma le afioga i le alii faipule ia Simei Pulu i le aso 23 Fepuari, e tusa ai o nisi o mataupu e faatatau lava i faiaoga i totonu o aoga i le atunuu, sa ia faailoa atu foi i le Ofisa o Aoga atugaluga na laga e nisi o faipule e pei o Larry Sanitoa, Tapumaia Galu Satele Jr ma Taotasi Archie Soliai e uiga lava i lenei mataupu, ma o faamatalaga sa tuuina mai i le Ofisa o Aoga ua maea ona ia tuuina atu i le vaega faasalalau mo a latou ripoti faamaumau.

I le fa’ai’uga o lana tusi, sa ia fa’ailoa ai ia Faimealelei e fa’apea, o le aso  11 o Mati e toe taliu mai ai i le atunu’u, ma ua i ai lona fa’amoemoe o le a o’o atu e feiloai ma le komiti.

O le itula e 11:00 i le taeao nei lea ua fa’atulaga e toe fa’aauauina ai le iloiloga lenei sa le fa’ataunuuina mai i le vaiaso na tea nei, ma ua faamoemoe o le sui faatonusili ia Ulugaono W. Allen o le a molimau e fai ma sui o Langford.

O kopi o le tusi a Langford sa tufatufaina atu i le alii kovana ia Togiola Tulafono, fofoga fetalai ia Savali Talavou Ale, ma le sui faatonusili ia Ulugaono.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.