Login

Alofa: Fa'avae ai Aiga— Vaega 125

toasavili@yahoo.com

Sauni le malaga a Loimataoapaula ma Eteuati mo Tutuila

Ua tofo i tino matagi lelei e pei o lea upu. O fa’alogona ia ua o’o i ai Lameko ma Tagiilima ona o le taumafaiga a Loimataoapaula. Ua ta’ape le aofia ma le mama ua lomi ma le va’a ua goto i fa’aaloaloga na alo i ai Lameko ma Tagiilima ma o la aiga ona o le titi faitama ma le valevale alofa i fanau. Ua toe fo’i nei le aiga o Tagiilima i tua, ae ua taofi e le lo’omatua le afafine o lona tuagane ma lona to’alua se i o latou tafafao ona toe fo’i ai lea i tua, e sauni ai le la malaga i Tutuila.

O le ula tupe lea na vevesi ai Tagiilima ina ia au mai e fai ai le la fa’amau ma Pelesitene Kiligikoge, e ave’ese uma isi ula sa i le ua o le lo’omatua, ae mau lava le ‘ula lea, ua ma’ea fo’i ona mafaufau Tagiilima i le tagata e ave i ai le ula. Ina ua o’o i le taimi o le sua a le Fafifeau ma lona Faletua lea e masani ona alu i ai Loimataoapaula e fai a la feau ma tafao ai, na tula’i Tagiilima ma savali atu ma ua fa’aula ai le Fa’afeagaiga.

A’o fa’atasi ma mafuta Minalosa ma lona to’alua ma le aiga o le tuafafine o lona tama, na iloa ai e le teine uiga alofa ma uiga lelei o Tagiilima. O le tulaga lea na mata’ina e le to’alua o Minalosa, le tamaloa o Mikaele.

A fa’alogo mai Tagiilima o tau alu se tafaoga a lana fanau ma Minalosa ma lona to’alua, e taofi e le lo’omatua Mikaele, ona o le fia iloa e le lo’omatua po’o fea e tu ai Tutuila, a’o le a fo’i le olaga o ola ai tagata o lo’o nonofo i Tutuila. Ua fa’amatalatala uma nei e le tamaloa o Mikaele le tulaga o lo’o i ai Tutuila ae maise o le olaga o lo’o ola ma soifua ai ona tagata. A alu alu a la tala fetaui si tamaloa ma se tala fa’aletonuga a le lo’omatua, fa’alogo mai Minalosa ma tama o alu atu se tali e.

Ua o’o i Amerika le talanoaga, tami ane i Manu’a fa’asolosolo mai i Aunu’u, ae fa’ai’u i Olosega. Ua leai se nu’u o Tutuila e le i fa’amatalaina e Mikaele i le lo’omatua o Tagiilima. Ua uma le na ala ata, toe liliu mai i le isi ala ata. O le viliga lona tolu la o le ata, ua o’o ai loa i le aiga o Mikaele i Tutuila.

 Ua fa’amatalatala nei e le tamaloa i a Tagiilima le pisinisi a lona tama o lo’o i ai nei i Tutuila. Na fesilisili nei le lo’omatua, “Mikaele, o lea ou te fa’alogologo atu, na o lou tama o lo’o ta’u mai, a’o fea o i ai si ou tina?” Ua punou le tamaloa ua le tautala i lea taimi, na tau mafaufau pe fa’ailoa atu i a Tagiilima le tulaga o lo’o i ai lona tina pe leai. “Mikaele a e le fia talanoa ai, ona ‘aua lea e te fa’amatala maia ia te a’u, ta talanoa i nisi mea o tutupu i Tutuila.”

Ua toe fa’asolosolo le talatalanoaga ma na i’u lava ina fesili le lo’omatua, “Mika, e fia la pasi a lou tama o lo’o i ai nei?” Ua ‘ata le tama ma tilotilo ane i le lo’omatua, “Tagiilima, i le taimi nei e fitu pasi a lo’u tama o lo’o i ai.” E le i uma atu le tala a le tamaloa ae tali mai lo’omatua, “Kai kele.”

Ua ‘ata Mikaele ma tali le fesili a Tagiilima, ma toe amata ai fo’i le viliga o le alaata fa i lea afiafi.  Na fetaui lava le manava mai o le galuega a Emani ma Lolesio ma le tu a’e loa i luga o Mikaele, ua lagona le vaivai, ua fiu fo’i e tautala ma fa’amatala mea uma i le lo’omatua o Tagiilima.

“Mikaele, ai lava ua e le la va, ae o lo’o alu atu pea le fa’amasinosinoina o oe i fesili a le lo’omatua e tiga ai lou ulu a?” Na ata’ata  Mikaele ma savali e fa’afetaui le o’o mai o Emani ma Lolesio lea ua manava mai a la galuega i lea taimi.

O le aso muamua na nonofo ai Mikaele ma Minalosa i le fale o Lameko ma Tagiilima, o le aso fo’i lea na so’o atoa ai le  Fa’atoaga o Etena i le matamataga a Mikaele ma Minalosa, e pei ona fa’aigoa ai e tagata le fa’atoaga a Tagiilima.

Ua ofo le loto ma le mafaufau o Mikaele ma Minalosa i le va’ai atu i le isi itu, toe va’ai atu i le itu i sisifo, toe savavali atu i le isi itu i sasa’e o le fa’atoaga, o se fa’atoaga ua sili ona tele ma ua mautu mea uma e fa’agaioi ai. O le va’ai a Mikaele ma Minalosa, e nimonimo le va’ai atu i le isi itu o le fa’atoaga. O lea ua so’o atoa le maimoaga i le fa’atoaga o fuala’auaina, ae le i o’o atu i le itu o lo’o i ai le fa’aotaga o talo, ufi, fa’i, ta’amu ma le toga ‘ulu.

E faia pea!



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.