Login

Teena Vaega Iloilo le talosaga a le Sui Fofoga Fetalai

ausage@samoanews.com

Ua teena e le Vaega Iloilo o le Faamasinoga Maualuga a Amerika Samoa le talosaga na faaulu e le afioga Talia Faafetai Iaulualo, o ia foi lea o loo avea ma Sui Fofoga Fetalai o le Maota o Sui i le Fono Faitulafono, ina ia solofua moliaga o loo tuuaia ai o ia e le malo.

E le gata ua teena e le Vaega Iloilo lana talosaga, ae na taua ai foi i se vaega o lea faaiuga le faatumauina pea lea o le avea o le alii loia Tutoatasi ia Fa’amomoi Masaniai o loia tutoatasi na tofia e le Faamasinoga.

O Iaulualo o loo tuuaia e le malo i moliaga mamafa e tolu e aofia ai lona ave faagaoi lea o ni tupe sa tuuina atu i lalo o lana vaavaaiga, e afua mai i se mataupu o loo tuuaia e le malo sa aafia ai o ia, a’o avea ma Faatonusili o le Matagaluega o Tautua Lautele a le malo i le fa tausaga talu ai.

Na taua e lana loia o Sharron Rancourt i lana faafinauga na afua ai le faaiuga a le Vaega Iloilo o le Faamasinoga e faapea, o le poloaiga na tofia ai e le Faamasinoga le alii o Masaniai e avea ma loia tutoatasi o le malo i le 2009, ua le o toe aloaia i le taimi nei.

O lea faafinauga mai le loia a Iaulualo o loo faavae i luga o le faaiuga a le faamasinoga sa tuuina mai i le masina o Me 2010, ma taua ai le le toe aloaia lea i lalo o le Faavae o le poloaiga na tofia ai e le faamasinoga Masaniai e avea ma loia tutoatasi i le 2009, ina ua tuuina mai le faaiuga a le Vaega Iloilo faasaga i le talosaga na faila e  Filifaatali Mike Fuiava ma Marie Ripley, ia foi na faila e Masaniai moliaga faasaga ia te i laua.

O le uluai mataupu na faila faasaga ia Iaulualo e Masaniai na faialea i le 2010, peitai sa toe solofua e le faamasinoga i le aso 8 Oketopa 2010 i le maea ai o ni faafinauga mai itu e lua e uiga lava i le poloaiga na tofia ai le loia tutoatasi, o lea foi faaiuga e lei toe apili e Masaniai, e lei tuuina atu foi se faaiuga a le faamasinoga e taofia ai le faataunuuina o lea poloaiga, e pei ona taua e le loia a Iaulualo i lana faafinauga.

I le tausaga e 2011, na toe faila ai e Masaniai moliaga lava ia e tasi faasaga ia Iaulualo, lea la o loo tatalaina ai nei o ia i lalo o ni poloaiga mai le faamasinoga ina ua maea ona ia totogiina se vaega tupe sa faatulaga e le faamasinoga.

Ae na finau le loia a Iaulualo e faapea, afai e i ai se isi mataupu fou e faila faasaga ia Iaulualo, e manaomia se isi tofiga fou a le faamasinoga mo se loia tutoatasi fou na te failaina lea mataupu.

Peitai na finau mai le itu a le malo e faapea, ina ua tuuina mai le faaiuga a le faamasinoga apili e uiga i le poloaiga na tofia ai le loia tutoatasi, sa na o le mataupu a Filifaatali ma Ripley na aofia ai, ae sa le’i aofia ai le mataupu a Iaulualo.

Na taua e alii faamasino i le la faaiuga e faapea, o le poloaiga e pei ona tuuina mai e le Vaega Tofia o le Faamasinoga Maualuga e tofia ai Masaniai e avea ma loia tutoatasi, o loo tumau pea ona aloaia ma faaaogaina i le taimi nei.

Fai mai alii faamasinoga, e le mafai e se malosi o le faamasinoga ona toe faaleaoga se vaega o le tulafono sei vagana ua faaleaoga mai e le Fono Faitulafono.

E talitonu faamasino i le la faaiuga ua tuuina mai, e tumau pea le i ai o le tulafono mai le taimi na pasia ai e le Fono sei vagana ua toe faia i ai e le fono se isi suiga ona faatoa faaleaogaina lea.

E pei foi o le poloaiga sa tofia ai Masaniai e avea ma loia tutoatasi, e ui o lea ua fai mai le Vaega Iloilo o le faamasinoga ua le o toe tusa ai ma le Faavae le poloaiga na tofia ai le loia tutoatasi, peitai e le avea lea ma itu e faaleaogaina ai le tulafono e tofia ai le loia tutoatasi.

I se faaiuga e 6 itulau na tuuina mai e le faamasinoga i le vaiaso na tea nei, na taua ai e le afioga i le alii faamasino sili lagolago ia Lyle L. Richmond ma lona sui lagolago ia Mamea Sala Jr le faamalieina o le faamasinoga i tulaga uma o mau sa o la iloiloina, e faavae ai le faaiuga tete’e e pei ona tuuina mai i lenei mataupu.

Na taua foi e alii faamasino le i ai lea o le malosi i le faamasinoga maualuga na te faaleaogaina ai se faaiuga pe afai e maea ona iloilo toto’a e le faamasinoga mau uma e lagolagoina ai sana faaiuga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.