Login

6 Paga Fusu – Sa’ilia ai Tama Fusu i le Oceania

O le aso Malolo o le Peresetene o Amerika na te’a nei, sa fa’aaogaina e le American Samoa Amateur Boxing Federation e faia ai la latou ta’amilosaga fusu mo le sa’iliga o ni sui o lea fo’i fa’agatama e ao ina auaina atu mo le Ta’amilosaga Fusu a le Oceania i Ausetalia ia Mati, 2012.

Na faia lea ta’amilosaga fusu i le Nofoaga o le Matagaluega o Paka ma Malae Ta’alo i Tafuna, ma sa fa’atumulia fo’i lea fa’amoemoe i le to’atele o aiga, matua ma i latou e masani ona fiafia e maimoa i lenei fa’agatama i a latou ta’amilosaga faia mo le filiga o ni isi e agava’a ae a le fa’amoemoe e auina ni isi i le Oceania, ma soloa’i atu ai i le Olimipeka 2012 i Lonetona.

O le ta’amilosaga lea sa fa’atulaga ai le ono paga fusu, ma sa aofia ai i lea to’aono le paga fa’apitoa i le va o le ali’i o Alapati A’asa ma Abel Soli’ai mo le tasi le ta’amilosaga, ae o le isi ta’amilosaga na sipa ai ma Joshua Ane, ona ua leai se paga ua maua e fetaui ma A’asa i lea lava aso.

  Ua tula’i mai, o lea alo o le atunu’u, o le a fa’ao’o lava  i le Oceania ina ia fusu muamua ai, pe a mai lana taumafaiga, afai ae sao mai ai lana taumafaiga o le a malaga sa’o lava o ia i le Olimipeka i Lonetona ia Aukuso o le tausaga nei. O le tatalo ia, fa’amanuia le Atua i lea alo o le atunu’u, aua a maua mai ai se pine mo Amerika Samoa i le Oceania ma soloa’i atu ai i le Olimipeka.

Ona o fusu’aga e matele lava ina maua muamua mai ai pine mo lo tatou atunu’u fa’apea fo’i Samoa Tuto’atasi, o la tatou lea mau e ao ina fa’amausali i ai o tatou fa’amoemoe mo se pine fo’i i lenei tausaga.

Na mua’i fusu le paga a le ali’i o Kelepi Fata e 141 pauna lona mamafa mai le Kalapu Fusu a Henry Tavake, ma na fa’ailoa mai le mata’utia o lima o lea ali’i talavou ina ua taofia le fusu’aga lea ua le mafai e le ali’i o Tavake Foma’i mai le Kalapu fusu a le Lion Heart ona fa’aauau le la’ua fusu’aga lea. E le’i toe mafai e Foma’i ona toe tula’i mai mo le ta’amilosaga 2.

Na soso’o ma le fusu’aga a One Tuala mai le Kalapu Fusu a Henry Tavake, e 161pauna le mamafa, na fetaui ma Simon Foma’i 166 pauna le mamafa mai le kalapu fusu a le Lion Heart, na taofia fo’i lea fusu’aga ae le’i uma le ta’amilosaga muamua, ma ua ‘avatu fo’i ia One Tuala le manumalo i lana lea paga. O le paga lea sa manumalo ai One i le TKO ia Foma’i.

E to’alua tama fusu a le Lion Heart na toe fetaui lava la’ua i le paga na soso’o ai, ma sa fetaui ai Mata Samana e 170 pauna le mamafa ma Nel Pite e 180 pauna le mamafa ma na uma lelei la’ua ta’amilosaga, ae na manumalo ai le ali’i o Mata Samana i ‘ai ia Nel Pite.

O le ali’i fusu mai le Kalapu Fusu a Henry Tavake  o Riley Tuala  e 206 pauna le mamafa e le’i umi lava fo’i ona ia topea le ali’i o Telesi Patu mai le Lavalava Boxing club ae KO le ali’i o Patu i le tusa ma le 1:45minute o le ta’amilosaga muamua o le la’ua fetauiga.

Peita’i, sa sili ona fiafia le aumaimoa i le taimi na fetaui ai le ali’i o George Tanoa Jr, 168 pauna le mamafa ma lana paga o Junior Aiomanu 170 pauna le mamafa  mai le Kalapu fusu a le  Booyaa Gym i Mesepa. Ma o se fa’ai’uga ‘ese lea fa’ai’uga na maua mai le vasega o fa’amasino i lea aso, aua e tutusa lelei o la’ua togi na maua mai fa’amasino uma na maimoaina le la’ua fetauiga. O le fa’ai’uga fo’i a le Laufali, sa ia si’itia uma lima o nei sui e to’alua, aua e tutusa lelei le la’ua fetauiga lea.

O le mea ua fiafia ai tagata i lea fusu’aga, e tutusa lelei a la’ua taumafaiga, ae toe uma lelei fo’i a la’ua ta’amilosaga o fa’afiafia i le mamalu na molimauina lea ta’amilosaga fusu.

Na i ai se paga a tama’ita’i na fa’atautaia i le va o Moana Sunia e 165 pauna le mamafa mai le Kalapu fusu a Mesepa ae na fetaui ma le tama’ita’i o Mina Pala mai le kalapu Fusu a le  Booyaa Gym mai Mesepa, O se va’aiga fo’i i lea fusu’aga, e matua tutusa lelei lava aua e tutusa lelei fo’i o la’ua pauna,

O le paga mulimuli loa sa fa’afetauia ai loa le tama ta’uta’ua o Alapati A’asa ma ni sui se to’alua. E ta’itasi ta’amilosaga mo lenei to’alua o sui, ae fetaui ma A’asa. O le ali’i o Abel Solia’i    na muamua mai peita’i, sa ‘iloga fo’i ona afaina le ali’i ia Alapati. Na fa’apena fo’i le ali’i o Joshua Ane ma na tauga fo’i le lavea a lea sui i le tau’au malosi o A’asa i lea afiafi ma fa’amae’a ai fusu’aga faitaulia o le aso ‘iloga mo le Asosi Fusu a Amerika Samoa.

Na maua se avanoa e talanoa ai ma le susuga Mapu Jamias, le Peresetene o le ASABF e tusa ai o sana va’aiga i le taumafai o le fanau fusu i le teritori i lea aso, ae sa ia fa’ailoa ai e fa’apea, “O la tatou su’ega muamua lea ua pasia nei, o le a se’e atu i le lona lua, e fai fo’i si faigata, ae a sao mai ai loa se alo o i tatou, o lona uiga ua fa’asasa’o loa lava i le Olimipeka  Lonetona i le tausaga nei lava.

E lua lava malo o lo ’o popole aga’i i ai Mapu e tusa o le tauvaga lea a le Oceania, O niu Sila ma Ausetalia, ae le taulia ai fo’i ma le malo tele o Samoa Tuto’atasi, aua o atunu’u na ua masani ma le manumalo i Fusu’aga.

O lana fa’amatalaga, “O le ali’i lea o Alapati A’asa, e ‘iloga mai lava, e tauau lava e o’o ai Amerika Samoa i se pine o le Olimipeka i lenei tausaga.”

O le susuga fo’i ia Mapu Jamias, o le Taitaifono le Komisi o Talavou ma Tagata Fusu a le AIBA, le Asosi fusu a le Lalolagi atoa, ma ua fiafia o ia e galulue fa’atasi ma A’asa ma la latou fo’i Kalapu e fa’ataunu’u lea fa’amoemoe maualuga.

saunia: Leua Aiono Frost



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.