Toe te’ena foi Senate tofiga mo Elizabeth Ponausuia

Susuga Elisapeta Ponausuia [ata: AF]

Ua toe te’ena foi e le Maota Maualuga a le Senate, i le taeao ananafi, tofiga a le alii kovana, mo le faletua ia Elizabeth Ponausuia e avea ma Fa’atonusili o le Matagaluega o le Soifua Maloloina, i se palota e 8-7.

Ina ua fa’atoa tu’uina mai e le afioga Togiola Tulafono le suafa o Ponausuia i le masina o Setema 2011, e 6-7 le palota na te’ena ai o ia e le Senate, e ui na pasia e le Maota o Sui i le palota e  15-5.

O le fa’ai’uga mai i le Senate, na faia ina ua mae’a se iloiloga sa fa’atautaia e le komiti o le Falema’i/Soifua Maloloina, i lalo o le ta’ita’iga a le afioga Senatoa Galea’i Tu’ufuli.

Ao lei amataina le iloiloga, na fa’ailoa e Galeai i le molimau e fa’apea, o le fa’alua ai lea ona tuuina mai e le kovana lona suafa i luma o le fono, ma e ui e lei manuia i le uluai taimi na tuuina mai ai lona igoa, peitai e talitonu le komiti, e i ai nisi o mataupu fou e fia malamalama atili i ai afioga i Senatoa.

Na fa’aalia e Ponusuia e fa’apea, e lagona lona li’a ona o le fa’alua ai lea ona o’o mai i luma o le maota maualuga, peitai afai e pasia o ia, ua ia te ia le tomai ma le agava’a e fa’atino ai ona tiute i totonu o le matagaluega o le Soifua Maloloina.

Sa ia fa’ailoa fo’i, e 25 tausaga na tautua ai i totonu o le matagaluega, atoa ai ma le silia i le 5 tausaga talu ona avea o ia ma Sui Faatonusili, ma o ia taimi e tele ua ia maua ai le tomai masani e fa’atino ai le galuega.

O se tasi o mataupu sa tele i ai fesili a Senatoa, o lo latou fia malamalama i se finagalo o le fa’atonusili tofia, i le fuafuaga a le kovana e toe fa’afoi atu ai le falemai o le LBJ, i lalo o le Soifua Maloloina.

Sa saunoa Ponausuia, e le gata ua na o ni tala ua salalau solo ae o se fuafuaga foi e lei malamalama ai tele o ia i le mafua’aga ua manatu ai le kovana e toe fa’afoi atu le LBJ i le Soifua Maloloina, ona e i ai lona talitonuga, e eseese matafaioi a le LBJ mai i matafaioi a le matagaluega o le Soifua Maloloina.

Sa ia faailoa i luma o le komiti lona faanaunauga ina ia faaauau pea tautua a le falemai ma le soifua maloloina e pei ona i ai, ma ia aua foi nei toe tulai mai faafitauli tau tupe e pei ona tulai ma aafia ai le falemai i le taimi nei.

Na fesiligia e Senatoa Fuata Dr. I’atala, ni suiga e ono faia e Ponausuia, i le fa’atautaiga o le falemai, pe afai e avea o ia ma fa,atonu, ae toe faafoi atu ai le falemai i le Soifua Maloloina.

Saunoa Ponausuia, e ui e le,i o,o i ai sona manatu i lea mataupu, peitai i lona talitonuga, e tatau ona foia faafitauli tau tupe o lo o a,afia ai le falemai, e ala i le fa’amalosia o le aoina mai o a latou aitalafu, saili nisi auala e fa’asao ai tupe, e pei o le fa’aitiitia o itula faigaluega, ma ia saili nisi auala e maua ai nisi tupe fou mo le falemai.

Saunoa Fuata, e mafua ona le mafai e tagata ona totogi pili ona ua le gafatia le taugata ma le leai o ni tupe e totogi ai.

Na taua e Fuata, o se fomai foi o loo faaauau pea ona tautua mo le falemai i soo se taimi e manaomia ai lana fesoasoani, e manaomia ni faaiuga ina ia maua ai se  mapusaga o tagata, ae aua nei toe faalogoina le oi e pei ona i ai i le taimi nei.

Na fesili Senatoa Fuamatu J.V Fuamatu i le molimau i sona lagona e faatatau i le pili a le kovana ae na tali le molimau e faapea, o loo i ai lona faamoemoe e le tupu le mea e pei ona fuafua i ai le kovana, peitai afai ae taunuu, o le a leai loa se isi gaioiga e toe fai, ae o le a ia sailia loa nisi tupe faaopoopo mai le feterale e faatupe ai galuega a le falemai.

“O se tasi o laasaga taua e ao ona ou faia pe afai e tuuina atu le falemai i lalo o le Soifua Maloloina, o le taumafai lea ina ia mulimulitai i le paketi sa pasia atu e le fono, ina ia aua ai nei tulai mai ni faaletonu i le lumanai,” o le saunoaga lea a Ponausuia na fiafia i ai Galea’i.

Saunoa Galeai, o se molimau taua tele lea ua ia faia i luma o le komiti, ma o lona faanaunauga maimau pe ana faapea o loo faalogologo i ai isi Faatonu ina ia o latou iloa ai le taua o le mulimulitai i le paketi na pasia e le fono.

Na fesili Senatoa Velega Savali Jr i le molimau poo avea pea o ia ma faatonu le tumau ina ua teena o ia e le fono i le tausaga na tea nei, na tali le molimau, o loo avea pea o ia ma Sui Faatonusili e oo mai i le taimi nei.

Saunoa Velega, o lana fesili foi lea na fesiligia ai le faatonu tofia a le Matagaluega o Aoga ina ua oo atu i luma o le komiti, ona e i ai lona talitonuga e le tatau ona toe avea o ia ma faatonusili le tumau i le taimi na teena ai o ia e le Senate.

Ina ua fesiligia e Senatoa Paogofie le faatonu tofia i tupe o loo faatupe ai lana paketi atoa ai ma le auala o loo faaaoga ai. Saunoa Ponausuia, o le tele o tupe o lana paketi e faatupe mai e le feterale, sei vaegana ai le $1.6 miliona mai tupe lotoifale lea o loo alu ai le 95% i totogi.