Te’ena Senatoa pili fa’asala ai ‘sponsor’ tagata ‘overstayer’

I le tele o mafua’aga e le lagolagoina ai e le Senate le pili na pasia e le maota o sui, lea e faasala ai sponsor o tagata mai fafo ua ova aso talu ona aumau i le teritori, na faia ai loa le faaiuga a le komiti a le Senate ina ia teena lenei tulafono seia i ai se isi taimi ona toe iloilo lea.

O lea fa’ai’uga a le Senate na faia lea ina ua maea se iloiloga a le komiti o Mataupu tau Tulafono ma Femalagaaiga, lea na molimau ai le afioga i le Loia Sili ma le Pule o le Ofisa o Femalagaaiga.

E talitonu le Senate, e i ai nisi vaega o le tulafono e tatau ona teuteu ao le’i pasia ma tuuina atu i le Ofisa o Femalagaaiga mo le faamalosia, ma o nisi o ia vaega e aofia ai le maualuga tele o le faasalaga o loo tuuina atu i sponsor, atoa ai ma le le tatau lea ona toe alu le vaega tupe lenei i le teugatupe Faalotoifale  a le malo.

O le tino o le tulafono na pasia e faipule, o loo taua ai ituaiga faasalaga e lua e faasala ai sponsor na aumaia tagata mai fafo, pe afai e faamaonia ua ova aso e aumau ai le tagata mai fafo i totonu o le teritori.

O sponsor e aofia ai tagatanuu taitoatasi o Amerika Samoa, atoa ai ma pisinisi poo kamupani tua na o latou aumaia tagata mai fafo e faa faigaluega i le teritori.

Mo se faataitaiga afai o se tagatanuu sa ia sponsor ina se tagata mai fafo e maua ane ua ova ona aso, e $10 i le aso mai aso uma ua ova ai le nofo a le tagata mai fafo o le a faasala ai le sponsor, ae afai o le sponsor o se kamupani poo se pisinisi tua, e $100 i le aso mai aso uma o le a ova ai le tagata e faasala ai le kamupani poo le pisinisi.

O lenei vaega tupe e pei ona fuafuaina i le pili lea na pasia e faipule, o le a tuuina atu i se teugatupe faapitoa i totonu o le Teugatupe Faalotoifale, ma le faamoemoe e fesoasoani i le fausiaina lea o galuega tetele i totonu o le atunuu.

Na taua e le afioga i le Maopu ia Ufuti Faafetai Ieremia e faapea, e le mafai ona tumau le aofai o tagata mai fafo e faamaonia ua ova o latou aso i le teritori, ona o faaiuga lava o le tausaga e tele ina toe foi ai le toatele i o latou atunuu.

Mo se faataitaiga e pei ona saunoa Ufuti, afai e silia ma le toa afe (1,000) le aofai o tagata mai fafo ua ova aso i le teritori, o le mea mautinoa lava e oo atu loa i le masina o Tesema, ona toe foi loa lea o le toatele o i latou nei, e oo atu lava i le 500 e toe foi atu i o latou atunuu, ona faaitiitia ai loa lea o le aofai o tagata o loo ova aso e ui o loo i ai pea le silia i le toa 800 o i latou nei i totonu o le teritori o loo faasolitulafono lo latou aumau ai i le atunuu.

O se tasi o itu sa tetele i ai fesili a nisi o afioga i Senatoa, pe aisea e mafua ai ona umi le nofo a le tagata mai fafo i le teritori pe afai e maea le pemita e 30 aso na malaga mai ai, aua o le matafaioi lea a le Ofisa o Femalagaaiga, o le sailia lea ma faatonu i latou nei ina ia toe foi i o latou atunuu.

Na faamanino e Ufuti e faapea, o se tasi o faafitauli ua maitauina e lona ofisa, e uma loa le pemita na malaga mai ai le tagata mai fafo, ona le toe nofo loa lea i le fale o lana sponsor ae o le a sui le isi nofoaga e aumau ai, ma o le isi lena faigata o lenei mataupu, e ui talitonu nisi o Senatoa e le o se tulaga faigata aua e le o se atunuu tele le motu o Tutuila.

Na taua e se tasi o tamalii o le atunuu o loo ia sponsor ina foi nisi o tagata mai fafo i le teritori, na te le lagolagoina le pili a faipule e faasala ai sponsor aua e le o le sponsor le pogai o le faafitauli.

“Ou te talitonu a’u ia, o le tiute tonu lava lena a le Ofisa o Femalagaaiga, vaai poo ai le tagata mai fafo lea ua uma lona pemita, saili ma toe faafoi, e leai se mea o le a amo ai fua e le sponsor le mamafa o le sala a le tagata mai fafo,” o le saunoaga lea a lea tamalii e lei finagalo e faailoa lona suafa.

O le toatele o tagata mai fafo ia e ova aso i le teritori, o tagata lava mai Upolu ma Savaii e pei ona molimau Ufuti.