Gugulu nisi tagata faigaluega i le lafoga 2% ua toe pasia

“O se fa’afafa i luga o ua o tagata lima vaivai”

E le o nofonofo lelei nisi o le to’atele o tagata faigaluega i le atunuu, ina ua sainia e le alii kovana le pili e fa’a’aitalafu mai ai le $3 miliona mai le Teugatupe mo Taui o Tagata Faigaluega mo le LBJ, ma le fa’amoemoe o le tupe e maua mai i le lafoga e 2%, lea ua toe si’i, o le a toe totogi ai le aitalafu lea.

Na fa’amatala e ni isi o tagata faigaluega e maualalo a latou tupe maua, o le lafoga lenei, “o se fa’afafa i luga o ua o tagata lima vaivai.”

“O se avega mo tagata e maualalo totogi o lo o latou maua le lafoga lea ua sainia nei e le alii kovana, ma o se tulaga foi ua vaaia ai le amo e le atunuu o le avega sa le tatau ona o latou amoina, ona o le faatamala o i latou o loo avea ma taitai i le falema’i ma le malo,”  o le saunoaga lea a le susuga ia Fiafia Mikaele, o se tama e to’a 4 se fanau, o lo o galue i se tasi o kamupani faufale i le atunuu.

Ae na taua e se alii e 31 tausaga e galue i se tasi o Ofisa o le malo e fa’apea, o le  lafoga lenei, o le a avea ma fa’afitauli ia te ia ma lona aiga, aua o lea ua manino e le fa’atapula’aina le umi e ao ai le lafoga lenei.

“Ou te lagolagoina le tuuina atu o se fesoasoani mo le falemai, atoa ai ma le tipi o le lafoga e 2% mo le tausaga e tasi, peitai o le leai o se tapula’a e taofia ai le faaauau pea lea ona tipi le lafoga e 2%, ou te lagona ai o se avega lea ua faaee mai e le kovana ma le fono i le atunuu, aemaise lava i tagata e vaivai tupe maua e pei o a’u ma lo’u aiga,” o le molimau lea a lea alii i le Samoa News.

O le tina o Fuarosa Amituana’i mai Leone sa ia ta’ua e fa’apea, e le tatau le fa’aiuga a le malo i le fa’ae’e mai o le lafoga e amo e tagata faigaluega, ae o le fa’afitauli o lo o mafua mai i le le fa’amalosi o le malo e fa’atino ona tiute tauave.

“Ua ou le iloa poo ai e mafua ai le faafitauli i le falemai, poo le le lelei ona faaaoga e le pulega a le falemai o tupe, pe o le le faamaoni o le malo e faatino lana vaega o le tuuina atu o tupe i le falemai, ae pau le tulaga lea ua manino mai, ua amo e le atunuu le mamafa tu o le avega, o le mea moni, o le a pagatia ai foi a’u ma lo’u aiga,” o le molimau lea a Fuarosa i le Samoa News.

E toa’lua isi tagata faigaluega a le malo sa o la ta’ua i le Samoa News lo la lagolagoina o le lafoga e ave mo le falemai, peitai la te le lagolagoina le fa’aauau pea ona tipi o le 2% i tausaga taitasi.

Na ta’ua e le vaega lea, e le afaina i tagata e maualuluga o latou totogi le lafoga e 2%, sei vagana ai lava tagata e maualalo totogi e pei o i laua.

“Afai e alu ese atu se $20 mai lo’u totogi i le lua vaiaso, o se tupe tele lea ua aveese mai i faasoasoaga tupe mo lo’u aiga, afai lava o piriota totogi uma lava e aveese mai ai le tupe lea mai lo’u totogi i tausaga taitasi, o se tulaga pagatia o le a feagai ma a’u ma lo’u aiga,” o le molimau lea o le tasi o le toalua lea e lei finagalo e faailoa o laua suafa.

O le taimi nei o lo o totogi e tagata faigaluega uma i le teritori le lafoga e 4% mai o latou totogi, ae a o’o atu loa i le ogatotonu o le masina o Mati, ona suia loa lea i le 6%.

I le tulafono lea ua sainia e le kovana, o loo taua ai le faaauau pea ona tipi e tagata faigaluega o le lafoga e 2% e aunoa ma se taimi faatapula’a, sei vagana ua toe faia se isi suiga i le tulafono.

Na ta’ua e sui o le malo na molimau i luma o le Fono e fa’atatau i le tulafono lenei, e tusa ma le $4 miliona le tupe e ao e le malo mai le lafoga e 2% i le tausaga, o le tupe lea, lea ua fa’amoemoe e totogi ai le nonogatupe e $3 miliona lea ua tu’ uina atu mo le falemai ma le faamoemoe a maea, ona tuuina atu loa lea o le tupe e totoe mo le faatautaiga a le falema’i, lea e aofia ai le 50% mo le polokalame e ave ai