Login

“AFAI UA FAI I LE LBJ, FA’APEFEA LE ASPA?”

ausage@samoanews.com

O le gaoioiga a le Kovana lea ua fai e taofia ai si'itaga a le Falema'i o le LBJ, ua lagalaga ai ni isi o manatu o le atunu'u ma tu'u fesili fai mai, “afai ua mafai e le kovana ona taofi si'itaga a le falema’i, aisea la ua le mafai ai ona ia taofia si'itaga a le ASPA?”

O manatu ia o ni isi o le atunu'u na fa'ailoa mai i le Samoa News ina ua fesiligia i latou i le toe fa'afo'i ai o pili o le falema'i i le tulaga tuai sa i ai i le taeao ananafi.

Na ta'ua e i latou na fesiligia, afai ua alofa le ali'i kovana i le atunu'u ona o le fa'afitauli na  tula'i mai i le falema'i, e tatau fo'i ona tutusa lona alofa i le tulaga pagatia o lo o i ai pili a le ASPA.

“Afai e pele ia Togiola Amerika Samoa, ua tatau nei ona taofi si'itaga a le ASPA,” o le saunoaga lea a le ali'i o Tomasi Laupama, o se tama e galue o se Leoleo po mo le silia i le 10 tausaga.

Fai mai le tomumu a le isi tina mai Tafuna na alu atu e totogi lana pili vai ma le pili uila i le taeao ananafi, i le Ofisa a le ASPA i Fagatogo, o se tasi o fa'afitauli ua ia matauina i ana pili, ua aga’i atu lava ina le gafatia e lona aiga ona totogi le taugata o pili ua i ai.

“Toe pau lava lenei o le isi avega o lo o tauamo pea e tagata, o pili o le uila ma le vai,” o lana tomumu lea.

“Ou te le iloa pe aisea e faigata ai i le kovana ona taofi si'itaga a le ASPA ae faigofie ona ia taofia si'itaga a le LBJ,?” o le fesili lea a le tina i le sui o le Samoa News.

Na ta'ua e le afioga i le matua ia Togiola Tulafono i luga o se tasi o ana polokalama e fa'apea, afai e taugata pili o le eletise, e i ai le 'auala e ‘alo i ai aiga o le atunu'u e pei o le fa'aaoga lea o moli fagu kalasini e mumu ai i le po, ae afai e si'i pili a le falema’i, e leai lava se isi 'auala e ‘alo i ai tagata, ua na o le oti lava.

Na ta'ua e se tasi o tamali'i ua loa tausaga o tautua i le Fono Faitulafono e fa'apea, e le moni le alofa o le kovana e uiga i pili a le ASPA ma le Falema'i, aua e tutusa lelei lava le mafatiaga o tagata i si'itaga uma ia e lua.

“E le mafai ona ola se pusa'aisa i se kalasini, e le mafai fo'i ona ola se 'auli po o le TV i se kalasini,” o le saunoaga lea a lea tamali'i e lei finagalo e fa'ailoa lona suafa.

Sa ia ta'ua fo'i, e tasi lava le mafua'aga e le mafai ai e le kovana ona ta'oto si'itaga a le ASPA, ona o lea ua silia i le $6 miliona le 'aitalafu a le malo i le ASPA ua le mafai ona totogi.

“E le mafai ona taofia e le ali'i kovana si'itaga a le ASPA leaga o lea o lo o nofo 'aitalafu le malo i le pili o le uila ma le suavai, ma o se tulaga ua le talafeagai tele lea mo le atunu'u lautele o lo o tigaina i le tau totogiina o pili a le ASPA,” o le fa'asea lea a le a tamali'i.

E pei ona silafia, na  pasia e le Fono se i'ugafono e talosagaina ai le Fono Fa'afoe a le ASPA ina ia taofi a latou si'itaga mulimuli lea na fa'amamalu i le masina o Oketopa 2011, peita'i na te'ena e le kovana lea i'ugafono.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.