Login

174 pagota i le to’ese i Tafuna, silia ma le 140 mai atunu’u i fafo

ausage@samoanews.com

E le ma’i lava le tulaga o lo o i ai faamaumauga a le pulega o le to’ese i le aofa’i o pagota o lo o taofia ai i le falepuipui, ina ua latou fa’ailoa i luma o le Komiti o le Puipuiga o le Saogalemu a le Senate e fa’apea, mai le aofa’i e to’a 174 o pagota o lo o i ai i Tafuna i le taimi nei, o le 85% o i latou ia, o tagata mai fafo.

E le’i fa’ailoa e le pule o le falepuipui po o ai atunu’u e o mai ai pagota ia e pei ona ia taua, e ui sa ia fa’amaonia i se tasi o vaega o lana molimau, o le to’atele o i latou nei o tagatanuu mai Samoa.

E toa 11 pagota tamaitai o lo o i ai i le taimi nei, ma o loo nonofo lava i latou i le fale fou lea e lei leva na maea ona fausia.

E le o pagota uma e toa 174 o lo o loka i le toese e mafai ona tatala i tua e auai i faagaioiga ma polokalama o lo o fa’atautaia i totonu o le toese i Tafuna, e pei ona molimau le pule o le falepuipui ia Lesa Lumana’i Maifea.

Na ta’ua e Lesa, e 54 pagota e lei maua fa’ai’uga o a latou mataupu, ma o i latou la ia e le mafai ona tatalaina i tua e auai i polokalame e pei o aoaoga faufautua mo pagota, sauniga lotu, atoa ai ma isi lava polokalame e aofia ai le tatalaina lea i tua o pagota i nisi o taimi, e pei ona i ai i latou o loo i lalo o le polokalama o le R.S.A.T, lea e manaomia le tatala mai i le 6:00 i le taeao seia oo atu i le 6:00 i le afiafi.

I tausaga ua mavae, sa loka fa’atasi pagota e le faailogaina ituaiga solitulafono na molia atu ai, peitai o suiga e pei ona faia e Lesa talu ona avea o ia ma pule o le toese i le 2 tausaga talu ai, e aofia ai le loka fa’atasi lea o pagota na molia i le fasioti tagata, tuu fa’atasi le au gaoi, o le au amio valea i tamaitai, fa’apea ai le au talepe fale ma isi lava ituaiga solitulafono eseese.

Fai mai Lesa, o le solitulafono e pito toatele atu tagata o lo o loka, o i latou ua molia i le faia o amioga mataga i fanau teine laiti, ma o le solitulafono foi lea ua maitauina le saoasaoa lona faatupulaia i le taimi nei.

O le tulaga i asiasiga o lo o aga’i atu i totonu o le toese, o se tasi lenei o mataupu na tele i ai fesili a le komiti ina ua fesiligia tulaga o faafitauli o lo o tutupu i le falepuipui.

Na fesiligia e Senatoa Fonoti Aufata le pule o le falepuipui, pe i ai ni masini o latou faaaoga e sue ai tagata o loo o atu i asiasiga, na tali Lesa, e leai, sei vagana ai le ituaiga suega lea e faaaoga e i latou e pei o le tago tago lea o le leoleo i le tino o le tagata, peitai e i ai foi le mamao e gata mai ai le tago tago, ona o puipuiga foi i ni faafitauli e ono tulai mai ai.

Na tali e afioga i Senatoa i le vaega lea o le molimau a Lesa, peitai mo Fonoti e lei malie i lana faafofoga faamatalaga ia, ona sa ia taua, o le isi lea faafitauli o loo mafua ai ona sao mea ia e faasa e aofia ai ma fualaau faasaina i totonu o le toese, ona e le o i ai ni masini e faaaoga e leoleo e sue ai tagata.

O le isi faafitauli e pei ona taua e Fonoti, afai e aiga pe masani le leoleo ma le tagata  asiasi, o le isi lena auala e ono le mafai ai ona faatinoina le galuega a le leoleo ma le faamaoni

Saunoa Paogofie Fiaigoa e fa’apea, ana fa’apea e toe fa’afoi uma pagota mai fafo i o  latou atunu’u, e i ai lona talitonuga e leai se manaoga po o ni fa’afitauli e tutupu mai i le to’ese i Tafuna, e le gata o le a lava leoleo ae o le a toalaiti foi pagota e vaavaai e leoleo.

Na taua e le Sui Komesina ia Leseiau Laumoli e faapea, o le taimi nei i le aofaiga o pagota ma leoleo o lo o i ai i Tafuna, e foliga mai e toatasi le leoleo ae pe a ma le toa 15 pagota na te va’aia, ma o se tulaga ua atagia mai ai le toatele naua o pagota i le toese.

Ui o lea, na taua e le Sui Komesina le taumafai malosi pea o le matagaluega e faia auala uma ina ia malupuipuia ai le atunuu ma ni tulaga e ono tulai mai ona o pagota.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.