Login

Mana’o Senate e fa’avae loa se Komiti Suesue

ausage@samoanews.com

O le tele o fa’afitauli tau tupe ma le anoanoa’i o mataupu e le o manino lelei i le silasila a le Fono, i le vae feagai ai ma le malo aemaise ai o nisi o ona lala tumaoti, na mafua ai ona lagolagoina e le maota maualuga i le vaiaso na tea nei se manatu na faatulai e le alii peresetene, ina ia tuuina mai loa i luma o le maota la latou iugafono lea sa faaulu i le tauaofiaga na te’a nei, e faatulai ai le Komiti Suesue a le Senate, le SSIC e pei ona iloa ai.

O lea manatu na faatulai e le afioga ia Gaoteote Palaie Tofau i le maea ai o le tauaofiaga a le maota i le aso Faraile na tea nei, ina ua maitauina le tele o mataupu o loo nenefu ai pea le maota e oo mai lava i le taimi nei.

O nisi o mataupu na taua e Gaoteote e manaomia le malamalama i ai o le Senate, o le mataupu e uiga i le ASPA ma faafitauli e pei ona tulai mai ai, o faafitauli tau tupe o loo feagai ma le falemai o le LBJ, o tupe fesoasoani na maua mai mo le galulolo, o tupe totoe mai le nonogatupe e $20 miliona a le malo, atoa ai ma le anoanoa’i o isi lava tulaga tau tupe a le malo.

“Tele naua mataupu eseese e le o malamalama i ai le maota, e le gata o tulaga tau tupe, ae o lea foi ua tulai mai le faafitauli a le falemai,” o le saunoaga lea a le alii kovana.

Na faailoa e Gaoteote i le maota e faapea, o le $3 miliona lea na maua mai a le Fono mai le nonogatupe $20 miliona e toe fausia ai se fale fono fou,  ua faaaoga e faamaea ai le Ofisa fou a le  fono lea o loo faagasolo i le taimi nei, ina ua le lava le tupe na tuuina mai i le malo e fausia ai lea galuega.

Saunoa Gaoteote, sa tuuina atu se talosaga a le fono i le kovana mo se isi vaega tupe mai le ARRA e faamaea ai le galuega, peitai sa lei talia le talosaga, ma faaaoga ai loa le tupe a le fono. O le taimi nei, pe a ma le toe $2.5 miliona o loo totoe a le Fono mai le latou tupe e $3 miliona e pei ona saunoa Gaoteote.

Na faamanino e le alii peresetene i luma o le maota e faapea, e leai se manatu e faatulai le SSIC ina ia suesue ai ni faiga faasaga i ni tagata poo ni taitai o le malo, ae o le agaga  maualuga, ia mafai ona manino le maota i auala uma ma faatautaiga tau tupe a le malo.

“Aveese outou manatu le maota faapea o le SSIC e tulituli aupu ai se tagata pe sailiili masei ai foi i se tasi, o le agaga autu ua mafua ai ona ou manatu e faatulai le SSIC, ina ia faamanino ai mataupu o loo nenefu ai le maota,” o  le saunoaga lea a Gaoteote.

Na toatele afioga i Senatoa na o latou vave lagolagoina le finagalo o le alii peresetene, ina ia faatulai loa le SSIC e faamanino ai mataupu e pei ona tuu fesili i ai le fono.

O le tofa Velega Savali Jr na muamua faaali lona finagalo na te lagolagoina ai le faamoemoe lea, sosoo ai le afioga ia Lualemaga Faoa, Galeai Tuufuli, Paogofie Fiaigoa, Fuamatau J.V Fuamatu ma Fonoti Aufata.

Na pau popolega o nisi o Senatoa, e le tatau ona avea le ita o le fono i faaiuga ua aumai e le alii kovana ma itu ua a’e ai le manatu e faatulai loa le SSIC.

Saunoa le afioga i le alii Senatoa ia Lemanu Peleti Mauga, sa ia teena le manatu le faatulai le SSIC i le uluai taimi na faatoa tuuina atu ai i luma o le maota, peitai o le tele ai o lona nenefu i le tele o mataupu tau tupe faasaga i le malo, ASPA ma le Falema’i, ua mafua ai ona ia lagolagoina le manatu ua tatau loa ona faatulai le SSIC.

Saunoa Lemanu, o ia lea o le taitaifono o le komiti o le Paketi a le Senate, o le faafitauli faasaga i le malo na amata tulai mai i le ASPA, sosoo ai ma le kolisi tuu faatasi, peitai o lea ua oo atu i le falemai ma le talitonuga, e toe amata mai foi i le ASPA, kolisi tuu faatasi ma toe oo atu ai foi i le falemai i tausaga uma.

O se tasi o mataupu na suesue e le SSIC ma i’u atu ai i se taunuuga manuia, o le tulaga i le faatauina atu o totoga o pasi aoga mai le Ofisa o Aoga a le malo, lea ua i’u ina molia ma tausalaina ai nisi sa umia tulaga sinia i le matagaluega o aoga a le malo, e aofia ai ma le susuga ia Paul Solofa, lea sa avea ma pule o le polokalame o le School Lunch, ina ua tausalaina o ia i moliaga o lona taumafai lea e faaleaga molimau a le malo, atoa ai ma lona taumafai e faalavelave i galuega a le faamasinoga.

O le vaiaso nei lea ua faamoemoe e toe tuuina atu ai i luma o le Senate la latou iugafono lea mo le faia i ai o se finagalo o le malo.

Saunoa Fonoti, e ui o se mataupu taua le SSIC, peitai o lona itu leaga, ona o le tausaga lenei o faiga palota, ma e ono aafia ai ma tulaga faapolokiki i le faatinoina o galuega a le komiti.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.