Login

Tala o Faamasinoga

ausage@samoanews.com

FAAI’U I LE FALEPUIPUI LE VEVESI NA MAFUA ONA O SE FANUA

O se vevesi na tulai mai i le va o ni aiga se lua i Coconut Point i Nuuuli, i le faaiuga o le vaiaso na tea nei, na faai’u i le lokaina o ni isi e to’alima, lea na tutula’i i luma o le Fa’amasinoga Fa’aitumalo, i le amataga o le vaiaso.

Na maua i suesuega a leoleo, le fa’ao’olima o le to’alima lea, ii se tina matua ma sana tama, e mafua, ona o fanua.

E toalua ni tina ma ni fanau talavou na taofia ma tu’uaia i le moliaga o le fa’atupu vevesi i nofoaga faitele atoa ai ma le fa’ao’olima i le tulaga tolu.

O tina e to’alua na aofia ai Sema Lemalu ma Le’aniva Fanene-Saifoloi, lea le te’ena tuuaiga faasaga ia te i latou, tau ala atu i le latou loia o Mark Ude.

Ina ua maea le iloiloga muamua sa faia a i latou nei i le vaiaso nei na toe tatala ai loa i latou uma i tua mai le toese i lalo o ni poloaiga a  le faamasnoga e ao ona latou usitai ma mulimuli i ai, e faatali ai le isi iloiloga lea ua faatulaga e faia i le aso 17 Fepuari.

MAUA I TOTONU O LE POTU O SE TAMA’ITA’I

O le alii lea o lo o tu’uaia e le malo i lona ulufale fua i totonu o le potu moe o se tamaitai i Fagaitua, ua molia nei i le moliaga mama o le fa’atupu vevesi i nofoaga faitele ma le fa’amoemoe o le malo, e ono i ai nisi moliaga fa’aopoopo latou te toe failaina.

I fa’amaumauga a le fa’amasinoga o lo o taua ai e fa’apea, na alu atu lava le alii o Lagovai Isamaeli, 24 tausaga mai Auto, ina ua matua ova lava lona ‘ona, ma alu i totonu o le fale o se aiga i Fagaitua, ma alu ii totonu o le potu o se tamaitai o lo o moe.

E le i iloa e le teineititi le mea na  tupu peitai o lona tina na ia lagonaina le taimi na alu atu ai Isamaeli i totonu o le potu o lana tama, ma ia vala’au loa leoleo. Na fa’amatala e le tina, e le masani latou ma le alii lea, e le iloa foi le mafua’aga na ala ai ona alu atu i totonu o le potu o lana tama.

Na te’ena e Isamaeli le moliaga mamafa lea ua tuuaia ai o ia e le malo.

MATTHEW YANDALL

Ua talia e le Fa’amasinoga Maualuga le talosaga na fa’aulu e le tamaitai loia o Ruth Risch-Fuatagavi, lea o lo o tulai mo Matthew Yandall, ina ia toe tolopo le uluai iloiloga a le ua molia, ona o lo o fa’aauau pea talanoaga ma le malo mo se maliliega aufaatasi e faamuta ai lenei mataupu.

Ina ua vala’auina le uluai iloiloga a Yandall i le vaiaso nei, na fa’ailoa ai e lana loia i le faamasinoga, e lei i ai se maliliega ua mafai ona sainia e itu e lua i le taimi nei. O Yandall o loo tuuaia i le moliaga mama o le faaoolima i le tulaga lua, ona o le faalavelave lea na tulai mai i le vaiaso mulimuli o le masina o Tesema 2011, ina ua ia faaoolima i lana uo teine e pei ona tuuaia ai o ia e le malo, i le maea ai lea o se taugaupu na tulai mai i lo la va, ma taofia ai loa le tamaitai i le falemai ona o le tulaga matuia i ona manu’a.

O loo teena e Yandall tuuaiga faasaga ia te ia, ma ua faatulaga lana uluai iloiloga e toe valaauina i le aso 22 Fepuari.

MAEA FUSUAGA AE MOLIA FANAU AOGA I LE TULAFONO

Mai le silia i le toa 20 fanau aoga mai le Aoga Maualuga a Tafuna na taua le aafia i se fusuaga tele sa faia ma tamaiti aoga mai Vaitogi ma Nuuuli i le vaiaso na tea nei, na faaiu puta ai le olaga aoaoina ina ua faamalolo le tumau le silia i le toa 20 o i latou nei, e aofia ai le tusa ma le toa 10 ua tietie ai moliaga a le malo i o latou tumua’i.

O lea vevesi na tulai mai i totonu o le lotoa o le aoga i le vaiaso na tea nei, ma taofia ai loa e leoleo tamaiti aoga e toa 11, lea na tutulai ai loa i latou nei i luma o le faamasinoga faaitumalo, ma latou teena ai tuuaiga o le faatupu vevesi i nofoaga faitele, e ui o loo faaauau pea suesuega a le malo pe ono i ai ni moliaga faaopoopo e faia faasaga i nisi o i latou nei.

Na taua e le tamaitai loia sili lagolago o Terri Bullinger, o le vevesi na amata mai e ni tamaiti aoga toalaiti i totonu o le fale taaalo a le aoga, pe tusa o le itula e 7:00 i le taeao, peitai na faaiu ina ua toatele fanau aoga na aafia ai, ma iu ina manu’a ai se tasi o faufautua a le aoga ao taumafai e faatoa filemu le vevesi.

Na taua e Bullinger e faapea, i le ripoti mai le Ofisa o Leoleo e tusa ai o le faalavelave na tulai mai, o loo taua ai le manunu’a o ni alii aoga se toatolu, o le isi toatasi na gau lona vae ae o le isi na manu’a ona foliga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.