Login

E taunu'u le solo tete’e tagata faigaluega ...

ausage@samoanews.com

LBJ taeao nei

Na fefiloi finagalo o nisi o tagata faigaluega a le falemai o le LBJ i se latou fonotaga sa faia i le aoauli ananafi, pe tatau ona fa'ataunu'u le latou solo tete’e lea ua faamoemoe e faia i le taeao nei, ae na fa'ai'u le fonotaga ina ua tasi le filiga, o le a fa'ataunu lava lea faamoemoe.

E silia ma le toa 100 le aofai o tagata faigaluega a le LBJ na auai i le fonotaga lea na faia i le malumalu a le falemai ananafi, na aofia ai alii ma tamaitai fomai, fa'apea ai ma tagata faigaluega eseese i totonu o le falemai, atoa ai ma i latou ua a'afia i le vaea  lea ua fuafua mo le aso a taeao.

O nisi na o latou faailoa o latou lagona o le ita faasaga i taitai o le malo, lagona le toe talitonu faasaga i le alii kovana, atoa ai ma le mau fesili ua tulai mai, poo ai tonu ua mafua ai ona tutupu nei mau faafitauli tau tupe i le falemai.

Peitai o nisi sa faaali o latou lagona tuu alalo ma latou fautuaina ai i latou o loo faauluulu i ai le solo tetee ina ia toe vaavaai pe o se tulaga talafeagai le faataunuuina pea o lea faamoemoe.

Na finau nisi o tagata faigaluega e sili pe a faatutu la latou savali i le alii kovana, le afioga i le matua ia Togiola Tulafono, peitai o nisi sa latou taua e tatau ona latou agai sao lava i le Fono Faitulafono, o iina e maua mai ai le tali sa’o mo le falemai.

“E leai se mea tatou te toe o ai fua i le alii kovana, ua faafia ona pepelo tatou e le kovana, talu lava ona amata mai lenei mataupu, e tasi lava le tali a le kovana, ua sauni lona ofisa e ofo mai se fesoasoani mo le falemai, o lenei lava ua toe o ni nai aso faamalolo tatou mai a tatou galuega o tatou faatali pea i le fesoasoani a le alii kovana,” o le avavau mai lea a se tasi o tina ma ia faatuina le manatu

Peitai na taua e le isi tina, e tasi lava le auala e maua ai le mapusaga ma tagata faigaluega o le agai sao lea o le latou savaliga i le Fono Faitulafono.

“O lea ua vili mai le isi o’u uso lea e faigaluega i le Fono, fai mai tatou o atu i le Fono taeao lea o le a fai ai le latou fono e uiga i le pili tupe mo le falema’i, o la’u fautuaga, tatou o sa’o i le Fono e maua mai ai le tali sa’o mo tatou,” o le fautuaga lea a le isi tina sa tuuina atu i le fono.

O le taeao nei i le 8:30 ua faamoemoe feiloai ai maota e lua mo le talanoaina lava o le mataupu e uiga i suiga a le maota o sui lea o loo teena e le Senate, i le pili a le Senate e faasoasoa atu ai le $3 miliona o le falemai, atoa ai ma le lafoga e 2% mai totogi e tuuina atu foi mo le falemai.

E uma ona fono komiti teuteu tai to’a tolu ma le ta’i toa ono a maota e lua e le maua lava se tasi i lenei mataupu.

Na faailoa e nisi o sui o le Asosi a Foma’i i le fonotaga ananafi e faapea, ua maea ona latou talanoa ma le alii kovana i le taeao ananafi, ma ua fautuaina i latou e le kovana ina ia fo’i e faatino a latou galuega, e leai se mea e tupu e pei ona folafola e le pulega a le falemai, ua sauni foi lona ofisa e saili se fesoasoani mo le falemai i le vaiaso nei.

Sa fautuaina e nisi o tamaitai fomai tagata faigaluega ina ia faateletelegese lo latou manatu e faataunuu le solo tetee, ae faatalitali ma le faatuatua i le fuafuaga lea ua sauni le kovana e tapena mo le falemai.

O le fautuaga foi lea na tuuina atu e nisi o tagata faigaluega Sinia a le falemai ananafi, ina ia taofiofi laitiiti le faataunuuina o le faamoemoe, nei maoluma o latou manatu ae avea ma itu e ponatia ai se taumafaiga lelei o loo taumafai atu i ai le kovana.

Peitai na taua e nisi o tagata faigaluega, e leai se isi taimi e toe faatali ai le faataunuuina o le solo tetee, o lea ua faailoa mai le faaiuga a le pulega a le falema’i e faamalolo ai latou mai a latou galuega, ma o se tulaga foi o le a afaina ai o latou aiga, aafia ai le tau totogiina o a latou pili, aemaies ai lava le fafagaina o a latou fanau.

Fai mai isi, ana manatu mamafa le pulega a le falemai ma alolofa i ana tagata faigaluega ona o le mea ua tupu, e auai i latou i le fonotaga ananafi, peitai sa faaalia e nisi, e leai ma se sui o le pulega a le falemai na auai i le fonotaga ananafi.

Faitau i le tele o isi vaega eseese o lenei fa'afitauli i tala i le vaega a Le Lali i totonu o le tatou nusipepa.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.