Login

UA 'FACEBOOK" FO'I PAGOTA

ausage@samoanews.com

TETE’I NI ISI SENATOA I LE MEA UA TUPU I LE FALEPUIPUI

Na o'o lava fo'i i le ali'i Senatoa o Mauga Tasi Asuega sa ia ta'ua le fa'ate'ia tele o lona loto ma lana fa'alogo, ona o ripoti e uiga i mea o lo o tutupu i le falepuipui i Tafuna i le taimi nei.

"Ua ou te’i ina ua ou fa'alogo i se ripoti mai luga o le leitio i le taeao nei, e uiga i ni pagota o lo o mafai ona latou fa'aaoga computer ma initaneti a’o taofia ai i le to'ese i Tafuna," o le saunoaga lea a le afioga i le Maoputasi i luma o le maota i le taeao ananafi.

E le’i i ai se ripoti a le Samoa News i le vaega o le Lali na faia fa'asaga i lenei mata'upu, e ui sa mafai ona fesiligia ni isi o leoleo e uiga i le fa'afitauli e pei ona tula'i mai.

Na ta'ua i le ripoti a le leitio i le vaiaso na te’a nei e fa'apea, o ni tusitusiga sa faia e ni isi o  pagota  o lo o tuli a latou fa'asalaga i luga o feso'ota'iga tau initaneti e ta'ua o le ‘facebook’, sa va'aia ai ni ata a ni isi o i latou ia o lo o tapu’e ao i ai i totonu o le to'ese.

Sa fa'apea fo'i ona faia i ai ni tusitusiga i luga o le initaneti ma fesilisili ai ni isi o pagota i a latou uo o lo o i tua e uiga i le tulaga o lo o i ai i latou i totonu o le to'ese.

Saunoa Mauga, o ituaiga mata'upu fa'apenei e tatau lava ona silafia e le fono ina ia manino ai fa'afitauli o lo o tula'i mai i le to'ese i Tafuna.

Saunoa se tasi o ali'i faipule e fa'apea, e le tatau ona manatu mama le matagaluega o leoleo i le su'esu'eina o lenei mata'upu, ina ia mautinoa le saogalemu o isi pagota o lo o taofia ai i le to'ese.

Fai mai le ali'i faipule lenei, afai o tutupu ni tulaga fa'apenei i le to'ese, o lona uiga e i ai le tagata o lo o mafua ai tulaga ia.

O le saunoaga fo'i lea a Senatoa Lualemaga Faoa ina ua fesiligia e le Samoa News e uiga i lenei mata'upu. Sa ia ta'ua, e tatau ona su'esu'e le mafua'aga o fa'afitauli ia o lo o tutupu mai i totonu o le to'ese.

E le o se taimi muamua lenei ua tula'i mai ai ni fa'asea fa'asaga i ni fa'afitauli o lo o tula'i mai i le to'ese i Tafuna.

O le tausaga fo'i na te'a nei na fa'afeso'ota'i mai ai e ni isi o le atunu'u le Ofisa o le Samoa News, e uiga i se ali'i pagota o lo o taofia i le to'ese e fa'atali ai le taimi e lau ai lona fa'asalaga, ae sa va'aia e tagata o lo o ta'ele i le sami i le vaega o lo o i ai le paka liona.

Ua talosagaina e Mauga le Peresetene o le Senate ina ia fa'atulaga se iloiloga e fesiligia ai le komesina o leoleo fa'apea ai ma le fa'atonu o le ofisa o le Puipuiga o le Saogalemu Lotoifale, ina ia tu'u mai ni o latou manatu e uiga i lenei mata'upu.

E le o i ai i le atunu'u le ta'ita'ifono o le komiti o le Saogalemu ma le Puipuiga o le Saogalemu Lotoifale, se'i vagana ai le sui ta'ita'i komiti ia Alo Dr. P. Stevenson o lo o i ai i le taimi nei, ma ua fa'amoemoe o se taimi o le vaiaso fou lea ua fuafua le komiti e ono fa'atulaga ai sa latou iloiloga e uiga i lenei mata'upu.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.