Login

Tala o Faamasinoga

ausage@samoanews.com

MATAFUA MATAIPULE

O le aso 9 o Mati lea ua fa’atulaga e faia ai le ulua’i iloiloga a le alii leoleo po o le Pago Plaza, o Matafua Mataipule, ina ua ia te’ena ona moliaga  i luma o le Fa’amasinoga Maualuga i le taeao ananafi.

O lo o tuuaia Mataiuple i lona umia fa’asolitulafono o mariuana, ma lona fa’amoemoe e fa’atau atu i isi tagata.

O lo o taofia pea Mataipule i le toese i Tafuna, sei vagana ua totogi le $40,000 ona fa’ato’a mafai lea ona tatala o ia i tua.

FAAAUAU ILOILOGA ALII TOATOLU SA GALULUE PULEGA UAFU

Ua talia e le alii faamasino o Mataupu Tau Pulega se talosaga na fa’aulu e le malo, ina ia toe tolopo le iloiloga sa fa’atulaga e fa’asaga i ni alii faigaluega e toatolu mai le Ofisa o Pulega o Uafu ma Taulaga.

O nei ali’i, e aofia ai Ierenimo Graf, Tuufuli Tuufuli ma James Memea, na fa’ate’a mai a latou galuega ina ua latou le ausia le tulaga e tatau ona i ai i latou i se su’ega mo fuala’au fa’asaina, lea sa faia i tagata faigaluega o lea Ofisa.

O i latou uma ia sa o latou tau’a’aoina se tusi mai le pulega i le masina o Iulai 2011, e fa’ailoa atu ai le tulaga ua i ai a latou galuega.

Na fa’ailoa e le loia sili lagolago o lo o tulai mo le  malo e fa’apea, o lo o aofia le pulega o uafu i lalo o se va’ava’aiga a le Coast Guard fa’apea ai ma le Matagaluega o le Puipuiga o le Lotoifale, o nisi ia o nofoaga e tatau ona mautinoa le tulaga saogalemu, e tatau foi ona su’esu’eina ona tagata faigaluega ina ia mautinoa o lo o mulimulitai i tulafono a le feterale.

Na fa’amaonia foi e le loia sili lagolago le toe foi atu o i latou nei i a latou galuega, e ui ua eseese tiute ua tofia i latou e galulue ai i le taimi nei, ao faagasolo ai a latou mataupu i luma o le faamasinoga.

O le aso 3 Aperila lea ua faatulaga e le alii faamasino ia Toetagata Albert Mailo e toe vala’auina ai lenei mataupu.

O nisi o molimau ua faamoemoe le malo e valaauina i le taimi e iloiloina ai lenei mataupu e aofia ai le faatonusili o le pulega o uafu ma taulaga ma lona sui lagolago, faapea ai foi ma le faatonusili o le matagaluega a tagata faigaluega a le malo.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.