Silia $3 miliona ua pasia e le Fono mo le LBJ

E silia i le $3 miliona lea ua pasia e le Fono e tuu atu e fesoasoani ai i le tulaga pagatia tau tupe lea o loo feagai ma le falemai o le LBJ i le taimi nei, ina ua pasia e le maota o sui i le taeao ananafi pili tupe e lua a le Senate, e faasoasoa atu ai le $3 miliona ma le $800,000 e faatupe ai gaioiga a le falemai.

Ae ui o lea, o le fesili tele lea ua tulai mai i le taimi nei, pe faamata e sainia e le kovana pili tupe nei ua pasia.

O pili tupe a le Senate na pasia i le vaiaso na tea nei na taua ai, e $3 miliona o le a fa’atupe mai i Teugatupe mo Taui o Tagata Faigaluega, ma le $1.6 miliona mai tupe totoe o le tausaga tupe 2011, lea o le a avatu ai le $800,000 mo le LBJ, ae o le isi $800,000 e tu’uina atu i tupe ia e fa’afetaui ai tupe mai le feterale, o lo o fuafua e tu’uina mai e fesoasoani ai i le falemai i vaega sa fa’aleagaina i le galulolo na mae’a atu nei.

Peitai ina ua maea iloiloga sa fa’atautaia e le komiti o le paketi a le maota o sui i le vaiaso nei, na o latou pasia ai le le toe fa’aaogaina e le malo o le $3 miliona mai Teugatupe o Taui mo Tagata Faigaluega, ae ia fa’a aitalafu ma le fa’amoemoe, e toe totogi i le tupe e maua mai i le lafoga 2%, lea o le a to’esea mai i totogi a tagata faigaluega.

Na faailoa e le Teutupe a le malo, le susuga Magalei Logovii, i luma o le komiti a le maota o sui i le vaiaso nnei, e silia ma le $4 miliona le tupe o loo i totonu o le teugatupe o Tupe mo Taui o Tagata Faigaluega, ae tusa foi ma le $4 miliona le tupe sa ao e le malo mai le lafoga 2% o totogi o tagata faigaluega ina ua pasia e le Fono ma sainia e le Kovana i le tausaga na tea nei.

Peitai i le manatu o le maota o sui, latou te lagolagoina pea le toe tipi o le lafoga 2%, ae o le a ave e totogi ai le $3 miliona lea o le a tu’uina atu mo le falemai, ma le faamoemoe afai ae maea ona totogi, o le tupe e totogi ai, o le a tuuina atu le 50% o lea  tupe mo le falemai ae o le isi 50% o le a tuuina atu i totonu o teugatupe lautele a le malo,

Ina ua saunoa faafetai le afioga i le fofoga Fetalai ia Savali Talavou Ale i le taeao nei e tusa ai o galuega a le komiti, sa ia taua ai lona lagolagoina o le fuafuaga ina ia vaelua le tupe e totoe mai i le totogiina o le aitalafu mo le falemai ma le malo, ona e i ai lona talitonuga, e le taitai maea le faafitauli tau tupe lea o loo feagai ma le falemai faapea ai foi ma le malo.

O le isi pili tupe lea na pasia e le Senate e faasoasoa atu ai le $253,000 e fesoasoani ai foi i galuega a le Fono, ua manatu le maota o sui o le a taofi le faitauina faatolu i le aso ananafi, ona o loo i ai nisi o suiga e manaomia le fia tuuina atu i totonu ina ia faaleleia atili ai lea tulafono taufaaofi.

I se tusi na tuuina atu e le taitaifono o le komiti faafoe a le falemai ia Moananu Va i le alii kovana i le vaiaso na tea nei, ua ia taua ai le sauni o le falemai e faamamalu  ana siitaga i le aso Gafua o le vaiaso fou, ina ua tuanai le 60 aso o faatali pea le falemai i tupe fesoaosani sa aofia i se latou talanoaga ma taitai o le fono, e fesoasoani ai i le faafitauli o loo feagai ma le falemai.

O nisi o faipule sa latou taua  lo latou tetee i le toe faaauauina lea o le lafoga e 2% e tipi mai i totogi o tagata faigaluega, ona o le manatu o le a toe faaee atu foi i luga o tauau o aiga e vaivai le tamaoaiga lena avega, pe afai o le a toe toese mai foi lea vaega tupe mai o latou totogi.

Ui o lea, ua manino lava le faaiuga a le fono e lagolagoina ai le faaauauina pea o le 2% e tipi mai i lafoga, ma ua faamoemoe o le a tuuina atu i le ofisa o le alii kovana  pili tupe nei mo le sainia ma aloaia loa.

E talitonu le Fono Faitulafono e pei ona taua i a latou iloiloga, o le manu lauti a le falemai e faia mo le atunuu, o le ofoina atu lea o le tautua mo le soifua maloloina o tagata, peitai ua tuutaia lea tulaga ona o lea ua feagai le falemai ma faafitauli tau tupe, e mafua mai ina ua faatamala le malo i le totogiina atu o vaega tupe ua faatulafonoina, e fesoasoani ai mo le falemai.

O le aso 6 Fepuari lea ua faamoemoe le falemai e faamamalu ai loa a latou siitaga.