Ads by Google Ads by Google

Tala mai le Fono Faitulafono

TALOSAGA FAIPULE E SUESUE RIPOTI TUPE A LE ASHC

Na talosagaina e le afioga i le alii faipule ia Larry Sanitoa le fofoga fetalai o le maota o su, ina ia maua se avanoa e iloilo ma faitau ai afioga i faipule i le ripoti o le tupe a le kamupani lea o loo pulea ma vaavaaia le uaea o fesootaiga o loo ta’i mai le sami, le fiber optic cable, le American Samoa Hawaii Cable (ASHC), ona o loo atagia mai ai i lea ripoti se vaega tupe e tusa e silia ma le $1 miliona o loo gau ai le kamupani ina ua tapuni tusi ia Tesema 2010.

I luma o le Senate, na talosagaina ai foi e le afioga i le Senatoa ia Fonoti Aufata le alii peresetene, i se avanoa e fesiligia ai e le maota le alii pule o le kamupani ia Adolfo Montenegro ina ia faamanino mai i luma o le f ono le $9 miliona lea na tuuina atu e le malo o Amerika Samoa mo le atinaeina o lenei galuega tele.

Saunoa le alii faipule ia Larry Sanitoa, e taua tele le malamalama o faipule i le ripoti o le tupe a le kamupani, ina ia silafia ai e le fono le tulaga tonu lava o loo taoto ai le itu tau tupe a lenei kamupani.

O le taimi nei, e 3 tausaga o le konekarate a le kamupani ma le Blue Sky o loo faagasolo o le faagaioiina o lenei tautua i le atunuu, ma o se tautua na viia e le fofoga fetalai o le maota o sui, ona o lea ua mafai ai ona siitia le tulaga o fesootaiga tau initaneti ma fesootaiga mai fafo mo le atunuu.

PASIA FAIPULE LE $35,000 MO FEMALAGAAIGA SWAINS

O le taeao ananafi na pasia ai e le maota o sui se tulafono taufaaofi na faaulufale i le vaiaso nei, e faasoasoa atu ai le aofaiga e $35,000 e faatupe ai femalagaaiga mo Swains.

O le vaega tupe lea e pei ona taua i totonu o le tulafono taufaaofi, o se tupe sa tuuina mai ai ina ua tuuina mai le paketi a le malo i le  fono mo le tausaga tupe lenei 2012, lea o loo faamoemoe e faatupe mai i tupe o Polokalame Faapitoa, peitai ina ua faia e le fono suiga i le paketi a le malo ma teena e le kovana i le masina o Setema na tea nei, na faaleaoga  uma atu ai lava ma galuega uma sa faamoemoe e faatupe i lalo o polokalame faapitoa.

O le agaga la o le tulafono, ia toe  faafoi lava le tupe lea sa faatulaga mai e le malo i lana paketi e faatupe ai femalagaaiga mo Swains.

O le taeao nei lea ua faamoemoe e faitau muamua ai lenei tulafono i luma o le Senate mo sa latou faaiuga.

E 14-0 le palota na pasia ai e le maota o sui le tulafono.

PASIA SUIGA TULAFONO FAAIPOIPO AI TAMAITAI

E 14-0 le palota na pasia ai e le maota o sui i le taeao ananafi le tulafono e sui ai tausaga e mafai ai ona faaipoipo se tamaitai pe afai e maitaga ma malilie i ai ona matua, mai le 14 i le 18 tausaga le matua.

O lea suiga ua tulai mai ai, o le a tutusa le matutua o le alii ma le tamaitai e agavaa ai ona faaipoipo i lalo o le tulafono.

O le afioga i le alii faipule ia Lemapu Suiaunoa Talo na faaulufaleina lenei tulafono, ma i lona finagalo i le mafuaaga na ia faauluina ai nei suiga na ia taua ai e faapea, ua fai lava si laititi o tausaga e agavaa ai ona faaipoipo tamaitai pe afai ae tulai mai ai ni faafitauli e pei o le maitaga, ma malilie i ai matua e faa nonofo.

Saunoa le alii faipule, o le 14 tausaga e agai atu i le 17 tausaga le matua,  o le taimi lea e lei taitai ona sauni le mafaufau o le tamaitai e avea ma tina o se aiga, e lei sauni foi e faavae sona aiga, o le molimau foi lea a le tamaitai faatonu o le matagaluega o tina ma tupulaga talavou  ia Leiataua Leauga Turner ina ua molimau i luma o le komiti.

Saunoa Leiataua, o le toatele o fanau laiti e faaipoipo i le tausaga lea, e le umi se taimi ae toe malepelepe o latou aiga, o nisi foi e lei sauni i latou e atinae ma faavae o latou aiga.

LAGOLAGO SENATE SUIGA I LE TULAFONO SUAFA MATAI

Ua i luma nei o le maota o sui le tulafono taufaaofi lea ua pasia e le Senate, e faatulaga ai suiga i tulafono o suafa matai ma faamasinoga.

O ia suiga e aofia ai le tulaga lea, afai ae manumalo se itu i le apili ona o se faaiuga a le faamasinoga ua toe apili e le itu sa faiaina, o le a toe toe maua uma e le itu ua manumalo tupe sa faaaluina ona o le mataupu apili, pe afai e tuuina mai le faaiuga a le faamasinoga ae le toe i ai se isi talosaga a le itu faiaina e toe faia i ai.

O le vaiaso fou lea ua faatulaga ai suesuega a le komiti a le maota o sui mo lenei tulafono taufaaofi.