Login

Fiu le LBJ e fa’atali se fesoasoani mai le malo

ausage@samoanews.com

Amata fa’amalosia si’i i le vaiaso fou

Ua silia ma le 60 aso o fa’atali le LBJ mo se fesoasoani mai i le malo ma le Fono Faitulafono, ma o lea la ua fa’alauiloa aloa’ia mai e le Ta’ita’ifono o le Komiti Fa’afoe, i sana tusi i le kovana, le sauni o le pulega e amata fa’amamalu a latou si’itaga i le Aso Gafua o le vaiaso fou.

I le tusi a Moananu Vaiala i le afioga i le matua ia Togiola Tulafono i le aso 27 o Ianuari, sa ia taua ai e fa’apea, o le fonotaga a le pulega a le falemai lea na faia ia Novema 21, 2011, na mafua ai ona faia le fa’asalalauga  ia Tesema 3, 2011, ona o se fuafuaga e siitia le totogi o ana tautua aemaise le faaaogaina e le mamalu o le atunuu o le falema’i.

O lea fa’aiuga e pei ona saunoa Moananu i lana tusi, o se fuafuaga e tau foia ai le fa’afitauli ua tulai mai i le le lava o tupe a le falemai, e mafua mai i le fa’atamala o le malo o Amerika Samoa e totogi atu i le falemai tupe ua fa’atulafono mo le tausaga tupe na tea nei 2011.

“Sa outou talosaga mai ma taitai o le fono ina ia faateletelegese a matou siitaga, ina ia maua ai se avanoa a le malo e tali mai ai i la matou manaoga,” o le saunoaga lea a Moananu i lana tusi.  “E faalua ona tolopo a matou siitaga, peitai o lea ua silia ma le 60 aso talu ona maea la tatou feiloaiga, matou te le o vaai lava i se vaega tupe lea sa tatou talanoaina e tuuina mai o lenei manaoga taua”.

Na fa’afetaia e Moananu le kovana ma taitai o le fono e tusa ai ma pili tupe ia ua maea ona fa’aulu i luma o le fono, lea foi ua maea ona fa’ataunuu iloiloga, peitai i lona talitonuga, e le avea gaioiga ia, e foia ai le fa’afitauli tau tupe o lo o tulai mai pea i le falemai, e ono mafai ai foi ona fa’agaioi tautua masani a le falemai.

“O a matou tupe o loo fuafua e maua ua mafai ai ona faailoa mai e ono le mafai ona totogi tagata faigaluega poo kamupani o loo matou aitalafu ai i le aso 22 Fepuari, talu ai la o lea tulaga, o le tusi lenei e avea o se matou faasilasilaga aloaia ia te oe, e faailoa atu ai e faapea, o siitaga mo a matou tautua e pei ona sa folafolaina, o le a faamamaluina loa i le aso Gafua, 6 Fepuari 2012,” o le isi lea vaega o le tusi a  Moananu ia Togiola.

O sii e pei ona taua e Moananu, e aofia ai le $50 e va’ai ai le fomai i le aso e tasi.  Na ta’ua e le pulega a le LBJ e fa’apea, e ui i lea si’i , peita’i afai e fa’atupe e le falemai le tautua lea, e $69 le tupe latou te fa’aaluina ai, ae mo tautua i isi potu ia ua ta’i $100 lea ua sii i ai, e amata atu i le $300 e o’o i le $600 le tau o le tautua lea, sei vagana ai le potu fanau e $5,531 lona tau pe a fa’atupe.

O le fale fa’amama toto lea ua sii atu i le $250, e ui e $345 le tau sa’o o lea tautua pe afai e agai atu i ai le atunuu.

O isi tautua a le falemai e pei o le sueina o le toto e $15, o le faata e $50, o le faia o taotoga e $200, ma le talaina o fualaau e $40.

O le kopi o le tusi a Moananu na tu’uina atu i le peresetene o le Senate ia Gaoteote Palaie Tofau, o le Fofoga Fetalai ia Savali Talavou Ale, ma taitaifono o komiti o le Falemai/LBJ a maota e lua, e aofia ai le afioga i le alii Senatoa ia Galeai Tuufuli ma le alii faipule ia Puleleiite Tufele Li’amatua.

O le taeao nei lea ua fa’amoemoe e faitau tolu ai i le maota o sui pili tupe sa faaulu e le Senate e fesoasoani ai i le falema’i, ae o isi pili tupe sa talosagaina e le kovana e lei faia lava i ai se faaiuga a maota e lua.

Saunoa le alii faipule ia Taotasi Soliai i le taeao ananafi, o mataupu tetele e lua lea o loo feagai ma le falemai o le LBJ i le taimi nei, e le gata o le polokalame e auina atu ai gasegase i fafo mo togafitiga, ae o se tupe foi e faagaioi ai le tautua a le falemai.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.