Login

Alofa: Fa'avae ai Aiga— Vaega 103

toasavili@yahoo.com

Ua lologo le fale atoa i le tautalaga a le lo’omatua o Tagiilima i lona aiga, ua lagona e le lo’omatua le fa’anoanao, ua lagona le manatu e fa’apea, ua le maua e lona aiga se fealofani, ina ua maliliu ona matua ma matua o tausoga o lo’o fa’atasi nei i le talanoaga.

“O le itu o le a aga’i i ai la’u tautalaga, ia o tatou manatunatu loloto i le fa’aiuga o le mataupu lenei. Afai e i ai se tasi o outou e le o loto i le fa’aiuga o le a ou fai atu ai, o lou lava faitalia e te talia ai, o lou fo’i faitalia e te amanaia mai ai la’u fa’aiuga o le a fai atu i le afiafi lenei. A i ai fo’i le tagata o outou e le mana’o pe loto se’i i lau fa’aiuga, ou te le popole i ai i lea itu. Ae fa’apenei, o le a sauni mai la’u tama o Lolesio e nofo i le suafa o le tatou aiga, e le toe i ai nisi au upu. O le po lenei, ia alu le tagata ma mafaufau loloto i la’u tala ua lafo atu. Afai ua outou le maua se tasi o o outou fingalo i le mataupu lenei, ou te fa’amalulu atu, o le fa’aiuga le na ua ou fai atu, o le a sauni mai Lolesio e nofo i le suafa o le tatou aiga, ia ua uma a’u upu.”

Na fai si umi o fa’atalitali se tasi e tali mai i a Tagiilima, peita’i, ua gugu Sakalia i lea taimi. O tausoga fo’i o le lo’omatua na auai lea na fai vesiga ma le lo’omatua o Silia, ua leai se tasi na toe gagana i lea taimi, ua sao le fale atoa. Na iloa lelei lava e Lolesio, Tomasi, Toetu ma Tovi’o le uiga o fa’amatalaga a lo latou tuafafine matua. O le ala fo’i lea na leai ai se tasi o i latou e toe tali, ae ua fa’atalitali pe i ai se tasi o o latou tausoga e tautala ane i le fa’aiuga ua faia e Tagiilima.

Ua tali mai le toeaina o Liu ma sa leai se upu na ga se i le tautalaga a le toeaina, ua malie i le fa’aiuga ua fai atu e Tagiilima. E le i umi ae fai le tautalaga a le toeaina o Ponifasio, ua ‘au fo’i lona manatu i le fa’aiuga ua fai ane e Tagiilima. Na pau le manatu na ‘ese ai, o le manatu o le lo’omatua o Faiane lea na fai a la finauga ma le uso o Tagiilima le lo’omatua o Malia. E le talia e Faiane le fa’aiuga ua faia e Tagiilima, ona o lona mana’o e fa’amatai lana tama ulumatua le tama o Amosa lea e nonofo nei ma lona to’alua i le isi nu’u i le taulaga.

“Fa’afetai atu i manatu ua fa’aalia i lenei afiafi, ua tauga fo’i i le fa’alogologo atu le lafolafo mai a le tina i a Tagiilima. Ae taga’i fo’i, ou te le auai i le fa’aiuga ua fai mai e Tagiilima ona o le tama a Tagiilima o lo’o nofo i le aiga o lona tama i le taulaga afai o lo’o nonofo ia ma lana fanau i le aiga o lona to’alua, e tutusa pau lava la itu ia, e pei fo’i ona i ai la’u fanau. Ma ou te tautino atu i le afiafi lenei, e le fetaui le fa’aiuga ua talanoa mai ai Tagiilima, e tutusa pau a tatou fai a i le aiga lenei, ua uma atu a’u upu.”

O iina na iloa ai e Tagiilima le loto o lona tausoga lenei, e loto leaga, e loto ‘ele’elea, o lea ua iloa atu nei le mafua’aga o le le maua o se tasi i lo latou aiga. Ua toe manatua nei e Tagiilima, o Faiane e fuifui lua ma le to’alua o lona tuagane, le lo’omatua o Sunema, lea la ua aliali mai i le afiafi lenei uiga leaga ia, fa’atasi ai ma le loto ‘ele’ele ma loto leaga.

Na toe tali Tagiilima e uiga i le tautalaga a Faiane, “Ia o le a ou toe tali atu ona ua ‘ese le isi finagalo lea ua folasia mai i lenei afiafi, o le manatu lea na ou lafo atu i luma o le tatou aiga, ina ia fai mai i ai ni o outou finagalo, a lea ua maua mai le manatu ua silisili ona leaga, o le manatu e le lelei ai se aiga, o le manatu e le maua ai se filemu o se aiga. O mea uma e fai e le tagata o upu e tautala i ai lona gutu, o ona uiga e fa’aalia, o ona manatu e folasia atu, o mea uma ia e sau mai totonu o le ta’ele o lona loto, a tu’u atu la i le tagata e ‘ele’elea ma palapala le loto, e fiu lava e toe fa’amama, ua matua’i palapala lava, ai se’i iloga e sau le masini sua palapala a le malo e fa’amama ona toe i’ila manaia lea ma aulelei mai.” O nisi ua talie, a’o nisi ua matua’i usi lava le fa’aofofaga i le lagiga a le lo’omatua ua fai nei i lona aiga, a’o le tagata ua sili ona tiga ona fa’alogona i lea taimi, o le lo’omauta o Faiane.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.