Login

Alofa: Fa'avae ai Aiga— Vaega 102

toasavili@yahoo.com

Ua sao le fale atoa, ua leai se tasi na toe tautala, na liliu ane nei Tagiilima ma ua amata loa lana tautalaga. “Fai mai lagiga a le faisalamo, “Ierusalema e, a fai e galo ‘oe ia te a’u, ia galo lava i lo’u lima taumatau; a fai ou te le manatua ‘oe, ia pipi’i a’e lo’u laulaufaiva i lo’u gutu, pe a le fa’asilisili ‘oe i mea uma ou te fiafia i ai.”

Ua leai se tasi o le aiga e toe gagana i lea taimi ua fa’alologo uma nei i le tautalaga a Tagiilima. “O le aiga lenei, o le tino ma le toto, o le a’ano ma le ivi, o le uso tu’ofe, e aiga ma fa’afesaga’i tagata uma. Fa’alogo mai outou, o le tagata o lo’o faiava ma nofotane i totonu o le aiga lenei, ou te fa’amalulu atu, ae tatau ona outou tula’i ma o atu i tua fale tou te mapu i ai. O le talanoaga lenei, ua patino tonu lava i tau toto, ivi, ma a’ano, e le tatau ona outou i ai i le talanoaga lenei, se i sau se taimi ona outou fa’afofoga lea i le iuga e taoto ai fingalo o le aiga.”

Ua tula’i uma nei le vaega lea  ma ua lavevea atu ai ma le lo’omatua o Analosa le to’alua o Lolesio ma le lo’omatua o Sunema, le to’alua o Tovi’o.

 Na va’aia e Tagiilima le to’atele o le au faiava ma le au nofotane o lo’o i totonu o lona aiga ina ua tula’i ‘ese i lea taimi. Ina ua iloa e le lo’omatua ua malu le fale, na liliu ane loa i ona tuagane ma lona uso, fa’atasi ma ona tausoga.

“Fa’afofoga lelei mai outou, sa i ai lo’u manatu o le a i ai se isi o outou o le a faia le tulaga lenei. Ua leva ona tatau ona tula’i ‘ese, e moni lava ua i ai fai a i totonu o le aiga lenei, ae tasi lava le auala, o fanau. A o’o loa ina si’isi’i le tai loloto o faigamea a se aiga, o iina e tatau ona fai ai le tulaga lea ua ou faia i le afiafi lenei.” Ua leai se tasi na toe gagana, ua na o le punonou lava.

“O le isi lenei itu o le a ou tautala atu ai ia te outou, afai ua le maua se to’afilemu o le feiloa’iga lenei ua tatau ona o tatou toe fo’i i tua i tulaga na o mai ai o tatou tua’a. Afai fo’i o le a le maua se nofo fealofani ona o tulaga fa’apenei, ia o tatou toe tepa i ala o le vavau, o iina e maua ai le fa’aiuga o le mataupu lenei. Tatou toe tepa i tua i ala na asa mai e o tatou tua’a. O le vaofilifili ma le sami loloto na o latou asaina, aisea, ina ia maua e i tatou fanau le nonofo fealofani ma le fetausi a’i.

“O fea o i ai nei, a lea ua ou fa’alogologo atu, o lenei ua tolu aso o tatou fesaga’i, tolu aso o tau sa’ili po’o fea o ta’oto ai le fa’autaga loloto i finagalo o lo tatou aiga potopoto i le mataupu lenei. O le tolu fo’i nei o aso, lea fa’atoa ou tautala atu i luma o le aiga potopoto. Sa ou nofo ma ou fa’alogologo pe a tua ma ni a lenei fa’atasiga, sa nono manu i le Atua, ina alofa ma fa’asino mai le auala sa’o ma le tonu ina ia mapu ai o outou finagalo i le mea e silisili ona lelei e ao ona fai”

Ua pe i o se maliu ua fai nei i le aiga i lea taimi, ua leai se tasi na toe tautala. “O le aiga lenei, o se aiga ua sili ona to’atele ona tagata, o le a le mafua’aga ua fa’apea umi ai, ona o le felotoa’i ma le fai loto o le tagata lava ia. Ua alofa ifo lava le tagata ia ua na o ia ma lana fanau. E moni, ae ia o tatou manatua lelei, ia fa’asalafa le alofa, ina ia aofia fa’atasi ai uso, tuagane, tausoga o aiga lata mai.

“Tatou tepa i ala o le vavau, ona o tatou iloa lea o le amataga mai o le tatou aiga ma ona tulaga tuma’oti ua uma ona fa’ata’atia e o tatou tua’a. O lea ua au mai le tali i le fanau a Naomi mai Niu Sila, e leai se tasi o la’ua e toe fo’i mai i le aiga, se i vagana ai o ni fa’alavelave e fai ona o’o mai lea tatou te feiloa’i.  O Naomi, o le ulumatua lea o le fanau a o tatou tua’a. Ua uma atu la le itu lea, ona o tatou toe tepa lea ma o tatou toe manatunatu, po’o ai e soso’o ma Naomi, o lo matou tama o Falaniko, lea na matai i le suafa matai o lo tatou aiga o Puleimeauma. O ai le ulumatua a Puleimeauma, o le tagata lenei e tautala atu. E i ai se fanau a le tagata lea e tautala atu, ioe, o lo’o i ai lana fanau tama e to’atolu, e ulumatua Lolesio, o lo’o i ai Emani, ma le tama o Eteuati fa’apea Loimataoapaula lea e nofo atu. O le fa’asologa le na o se aiga, ae se i vagana, ua ou loto malie e lafo atu i se tasi o a outou fanau, ona fa’atoa fai lea. Oi, o le a fai lava outou ae le se i fai ma va’ai mai i lo’u nofo atu. Ua alu lava le tagata latou ua leai se tapasa o lona va’a, ae le se i alu ma tilotilo mai i tua po’o le a le tulaga e sili ona lelei ina ia mautu ai le mataupu lenei.”



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.