Login

PASIA FONO IVY AVEA MA FA'ATONU OFISA PULEA 'OLOA MALO

ausage@samoanews.com
Ivy Aiumu-Taufa’asau

Ua pasia e le Fono Faitulafono tofiga a le ali'i kovana mo le faletua ia Ivy Aiumu-Taufa'asau, e avea ai o ia ma Fa'atonusili o le Ofisa e Pulea 'Oloa a le Malo, ina ua fulisia le palota a le maota o sui i le aso Tofi na te'a nei i le palota e 15-0, soso'o ai ma le palota e 13-2 a le Senate i le aso ananafi.

O ia fa'ai'uga a maota e lua sa tu'uina atu i le mae'a ai lea o ni iloiloga sa fa'atautaia e le Komiti o le Fa'agaoioiga o le malo a le maota o sui a maota e lua, i lalo o le ta'ita'iga a le ta'ita'ifono ia Faimealelei Anthony Allen mo le maota o sui, ae o le afioga i le Senatoa ia Fonoti Aufata, o ia lea o le sui ta'ita'ifono mo le komiti a le maota maualuga, lea sa fesiligia ai agava'a ma ni isi o galuega fa'atino a le faletua ia Ivy mo le Matagaluega.

Na tomua le saunoaga a Ivy i lona fa'afetaia lea o faipule e tusa ai o lo latou talitonuina o ia, ina ua o latou pasia o ia i le taimi na tu'uina muamua mai ai lona igoa e le ali'i kovana, ae fa'ai'u ana 'upu tomua i lona toe fa'aoloolo ma'au atu lea i le komiti, ina ia fa'atumauina pea lo latou talitonuina o ia mo le tau'aveina o lenei galuega.

O le tele o faipule e le'i i ai ni a latou fesili po o ni manatu ina ua tu'uina atu i ai e le ta'ita'i komiti le avanoa.

Na saunoa fa'aataata lafoga le Sui Fofoga Fetalai ia Talia Fa'afetai I'aulualo e fa'apea, o ia sa talitonu ia Ivy, peita'i ua tau le talitonu i ai ona ua alu atu so'o i luma o le Fono, ma o se saunoaga na alu ai le tali e a le komiti atoa ai ma le molimau.

Na pau le mata'upu na  fesiligia e le Sui Fofoga Fetalai, o le tulaga i le va'a mo Manu’a lea na fa'alogo o lo o taumafai i ai le malo, po o ai tonu le matagaluega e maua mai ai se ripoti e uiga i lea va’a, na tali Ivy,  o le Matagaluega o Galuega Lautele a le malo o lo o gafa ma le fa'atautaia o tauofoga mo le mata'upu lea, ma le fa'amoemoe o le masina o Fepuari fa'atoa tapuni ai tauofoga mo le va’a.

Na va'aia le tu'u fesili o ni isi o sui o le komiti po o le a lea va'a e ta'ua mo Manu'a, peita'i o le va'a e pei ona fesiligia e le faipule mai Manu’a, sa aofia i se tasi o saunoaga a le ali'i kovana i luga o se tasi o ana polokalama i le masina o Tesema na te’a nei, ina ua fesiligia o ia e ni isi o to'oto'o mai Manu’a, po o i ai sana fuafuaga mo le fa'aleleia o femalagaa'iga mo Manu’a, ona o le tula’i so'o mai o le fa'afitauli i le fai lea ma leaga le va’a o le M/V Sili lea o lo o tautuaina Manu’a.

Saunoa le ali'i kovana e fa'apea, o lo o latou galulue pea ma le Ofisa o Galuega a le malo mo le fa'atauina mai lea o se va’a mo Manu’a, ma o se va’a fo'i e mafai ona 'ave ai le pasese e silia ma le toa 30, fa'apea ai uta e fia la’u mai i le  isi motu e aga'i atu i le isi motu.

O isi faipule e lei i ai ni a latou fesili ina ua tu'u atu i ai le avanoa e aofia ai Va'amua Henry Sesepasara, Simei Pulu ma Pulelei'ite Li'amatua Tufele Jr.

Na fesiligia e le afioga ia Taotasi Archie Soliai le molimau pe i ai ni lu’itau o lo o feagai ma ia talu ona avea o ia ma Fa'atonusili le tumau o le Matagaluega, ae na saunoa Ivy, na pau lava le fa'afitauli o lo o fa'afeagai ma ia i le taimi nei, o le le mafai lea ona toe fa'atumu atu 'oloa a le malo e pei ona tatau ai.

Na fa'amanino e Ivy e fa'apea, mai masina e 11 talu ona tofia o ia e avea ma Fa'atonusili le tumau o le Matagaluega, o lo o matauina pea le fa'afitauli lea i le leai o se tupe e mafai ai ona toe fa'atumu 'oloa a le malo ua mae'a ona fa'aaoga.

I tausaga ua te'a e pei ona ia ta'ua i lana molimau, sa tu'u 'ese ai e le Teutupe a le malo le vaega tupe e toe fa'atau mai ai 'oloa e fa'atumu ai 'oloa ua fa'aaoga, peita'i o le taimi nei, e le o toe faia e le Teutupe lena tulaga, ai ona o tulaga fa'aletonu i le itu tau tupe a le malo.

“O le fa'afitauli la lea ua feagai nei ma le 'aufaigaluega, ua leai ni galuega a ni isi o i latou nei e faia ona ua leai ni galuega e mafai ona fa'atinoina,” o le saunoaga lea a Ivy.

Na pau 'oloa o lo o mafai ona toe fa'atau mai e le Ofisa ma toe fa'atumu ai' oloa ua mae'a ona fa'aaoga, o 'oloa laiti e pei o pepa e fai ai kopi, o pepa mo fale le taua, atoa ai ma isi 'oloa laiti e fa'aaoga mo galuega i totonu o le  Ofisa.

Na fesiligia foi e le afioga i le ali'i faipule ia Taotasi A. Soliai le molimau pe o le a se isi fuafuaga ua toe fai i kamupani ia sa tauofo mo le fausiaina o le Call Center lea ua toe fa'amaamulu 'ese a laua tauofoga, ma e ui e lei mautu mai se atoga o lea mata'upu ona o le Matagaluega o Tagata Faigaluega e maua mai ai, peita'i na ta'ua e Ivy, o lo o i ai pea le tupe sa fuafua e fausia ai lenei galuega.

Ina ua tu'uina mai e le kovana le suafa o Ivy i le tausaga na te'a nei, sa pasia e le maota o sui i le palota e 14-3 ae na te'ena e le Senate i le palota e 7-6.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.